從未試過公開拖女友的鄭嘉穎一反常態，早前十指緊扣陳凱琳出席胡杏兒婚禮逼婚，據知鄭媽媽也有份催婚。
娛頭
半百鄭嘉穎逼婚 陳凱琳父母閘住：我蝕本㗎！
46歲鄭嘉穎和 24歲陳凱琳的父女戀打得火熱，為箍實家族資產 15億的有米女友，鄭嘉穎不但一改唔認女友作風，更心急逼婚，向陳凱琳狂施壓。
但另一方面，陳凱琳的父母卻嫌「未來女婿」年紀大又唔夠班，兩夫婦齊齊落閘，向寶貝女閃婚 say no！想做 15億駙馬，鄭嘉穎冇咁易！
杏兒婚禮上催婚
追到屋企富貴，又靚又嫩口的陳凱琳，過往奉行男尊女卑的鄭嘉穎一反常態，出盡渾身解數，箍實有米女友；公開認愛之餘，就算在大陸開工人不在港，亦全天候視像電話保持通話，只要時間配合，定必安排女友北上探班，務求人盯人，嚴防觀音兵埋身。
由於年齡、家底都有距離，明知女友條件好大把貨，為免夜長夢多，鄭嘉穎開始進一步，向拍拖只有一年的陳凱琳逼婚。
「嘉穎年紀唔細，覺得自己係時候組織家庭，而且 Grace（陳凱琳）條件咁好，佢都怕俾人撬咗去，所以近期借啲意就會同 Grace提結婚。最近嗰次，仲係响杏兒個婚禮，嘉穎見氣氛啱，問 Grace：『幾時輪到我哋？』 Grace聽到只係笑吓，冇答應佢。因為當時嘉穎飲大兩杯，都講得幾大聲，所以同枱都有人聽到。」當晚有份在場人士說。
未成功入屋
對鄭嘉穎催婚，陳凱琳採取以靜制動的態度，除了自己仲年輕，事業仍在衝刺階段，最重要是，她好了解男友尚未過到父母一關。
據了解，陳凱琳過往曾安排鄭嘉穎見家長，但每次提出，父母都表示時間唔啱就唔到，借故拒絕。
鄭嘉穎尚未「入屋」成功，所以逢大時大節，陳凱琳要返屋企交人，焗住各有各玩。剛過去的聖誕節，陳凱琳陪家人打邊爐，鄭嘉穎只好黐住林夏薇和陳展鵬去夜蒲。
「 Grace明白爹哋、媽咪對佢期望好高，又驚佢揀錯對象，所以屋企人冇咁易會接受嘉穎，呢一點佢都好明白。畢竟嘉穎都四十六歲，只係同自己爹哋差幾年，加上家境有距離，拍拖已經好大壓力；嘉穎開始逼婚， Grace就更加煩。」知情人說。
不急於見面
對於「未來女婿」鄭嘉穎催婚，陳凱琳父親的態度是反對，完全冇得傾！
壹：壹週刊 父：陳凱琳父親
壹：贊成 Grace閃婚嗎？
父：唔會，點會咁快閃婚呀！
壹：有冇見過嘉穎？
父：未見過。
壹：若果真係閃婚，你會介意？
父：唔會，佢（陳凱琳）一定俾我見咗先嘅。
壹：如果嘉穎真係做你女婿……
父（搶答）：嘩，呢個十畫都未有一撇喎！我個女都未同我介紹，我都未見過佢。
壹：如果真係做你女婿，鍾唔鍾意呀？
父：唔可以咁早落一個結論，對大家都唔公平，所以我唔會咁快答。
壹：會否想同嘉穎快點見面？
父（猶豫）：我又唔急嘅。
壹：佢哋已經發展得好穩定！
父（落閘）：我個女好後生，事業剛剛起步，邊有咁快，我蝕本㗎咁樣！
睇電視見過
至於陳凱琳母親，亦跟丈夫同一口徑，對鄭嘉穎表現抗拒。
壹：壹週刊 母：陳凱琳母親
壹：有冇見過嘉穎？
母：電視機咪見過囉！
壹：如果佢哋閃婚，你贊成嗎？
母：哎吔，你哋（記者）嚇死我，等我定吓驚先！
壹：如果佢哋真係結婚，嘉穎做你女婿，你會滿意嗎？
母：都俾你哋嚇到未定神！
鍾意唔認數
「𡁻完唱」，衰格！但食完唔認數，一樣離譜！鄭嘉穎亦有唔認女友的習性，所以，他破格公開認愛甚至拖手，陳凱琳定是他的終極目標。
壓力下分手
戀愛自由的年代，但到某個階段，就要面對家長一關。不少名氣界情侶，因為家庭壓力要分手收場。
賭王三太
11年何超雲與陳山聰撻着後，有傳三太陳婉珍和賭王嫌男方個底花又結過婚，反對二人一起。反叛超雲於是出走歐洲，以拒返港行動作反抗，最終三太妥協，任由寶貝女碰釘，拍拖兩年，終於因為 money而分手。
愛財何世根
何傲兒、何傲芝父親何世根向來對揀「女婿」有高要求，細女何傲兒早前便被前度周子揚踢爆，二人拍拖期間，何父對他不滿並將女兒介紹給「爺爺」林建名，又被女友胞姊苛索每月廿萬家用；年前何傲芝與蕭正楠拍拖時，亦有指何父嫌棄男方事業無成。
撰文、攝影、攝錄：娛樂組
|
鍾意就快D Share啦！
|
|
|