網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2016年1月7日 星期四

半百鄭嘉穎逼婚 陳凱琳父母閘住:我蝕本㗎! [壹週刊 - 1348] __,凱琳,鄭嘉穎,嘉穎,陳凱琳,M1,

從未試過公開拖女友的鄭嘉穎一反常態,早前十指緊扣陳凱琳出席胡杏兒婚禮逼婚,據知鄭媽媽也有份催婚。娛頭半百鄭嘉穎逼婚 陳凱琳父母閘住:我蝕本㗎!46歲鄭嘉穎和24歲陳凱琳的父女戀打得火熱,為箍實家族資產15億的有米女友,鄭嘉穎不但一改唔認女友作風,更心急逼婚,向陳凱琳狂施壓。但另一方面,陳凱琳的父母卻嫌「未來女婿」年紀大又唔夠班,兩夫婦齊齊落閘,向寶貝女閃婚sayno!想做15億駙馬,鄭嘉穎冇咁易! ...


從未試過公開拖女友的鄭嘉穎一反常態,早前十指緊扣陳凱琳出席胡杏兒婚禮逼婚,據知鄭媽媽也有份催婚。

娛頭

半百鄭嘉穎逼婚 陳凱琳父母閘住:我蝕本㗎!

46歲鄭嘉穎和 24歲陳凱琳的父女戀打得火熱,為箍實家族資產 15億的有米女友,鄭嘉穎不但一改唔認女友作風,更心急逼婚,向陳凱琳狂施壓。

但另一方面,陳凱琳的父母卻嫌「未來女婿」年紀大又唔夠班,兩夫婦齊齊落閘,向寶貝女閃婚 say no!想做 15億駙馬,鄭嘉穎冇咁易!

杏兒婚禮上催婚

追到屋企富貴,又靚又嫩口的陳凱琳,過往奉行男尊女卑的鄭嘉穎一反常態,出盡渾身解數,箍實有米女友;公開認愛之餘,就算在大陸開工人不在港,亦全天候視像電話保持通話,只要時間配合,定必安排女友北上探班,務求人盯人,嚴防觀音兵埋身。

由於年齡、家底都有距離,明知女友條件好大把貨,為免夜長夢多,鄭嘉穎開始進一步,向拍拖只有一年的陳凱琳逼婚。

「嘉穎年紀唔細,覺得自己係時候組織家庭,而且 Grace(陳凱琳)條件咁好,佢都怕俾人撬咗去,所以近期借啲意就會同 Grace提結婚。最近嗰次,仲係响杏兒個婚禮,嘉穎見氣氛啱,問 Grace:『幾時輪到我哋?』 Grace聽到只係笑吓,冇答應佢。因為當時嘉穎飲大兩杯,都講得幾大聲,所以同枱都有人聽到。」當晚有份在場人士說。

週一( 1月 4日)記者向陳凱琳父母求證女兒閃婚一事,陳父二話不說落閘:「我個女事業先剛剛起步,邊有咁快!」

當問到可有見過女兒男友,陳母斬釘截鐵話:「喺電視機咪見過囉!」可見鄭嘉穎在女友家人眼中,印象極差。

陳父雖然家境富裕,住九龍塘獨立屋,但為人低調、踏實,喜歡自己做司機接載家人。

未成功入屋

對鄭嘉穎催婚,陳凱琳採取以靜制動的態度,除了自己仲年輕,事業仍在衝刺階段,最重要是,她好了解男友尚未過到父母一關。

據了解,陳凱琳過往曾安排鄭嘉穎見家長,但每次提出,父母都表示時間唔啱就唔到,借故拒絕。

鄭嘉穎尚未「入屋」成功,所以逢大時大節,陳凱琳要返屋企交人,焗住各有各玩。剛過去的聖誕節,陳凱琳陪家人打邊爐,鄭嘉穎只好黐住林夏薇和陳展鵬去夜蒲。

「 Grace明白爹哋、媽咪對佢期望好高,又驚佢揀錯對象,所以屋企人冇咁易會接受嘉穎,呢一點佢都好明白。畢竟嘉穎都四十六歲,只係同自己爹哋差幾年,加上家境有距離,拍拖已經好大壓力;嘉穎開始逼婚, Grace就更加煩。」知情人說。

半百鄭嘉穎想成家,難怪近日頻頻高調拍拖,早前二人孖住到銅鑼灣買餸,再返男方大坑家玩煮飯仔,體驗夫妻生活。

去年 10月,鄭嘉穎扮後生,陪陳凱琳到海洋公園玩鬼屋,之後再殺落天后食糖水,然後再雙雙返歸過夜,夠晒盡興。《蘋果日報》圖片

《蘋果日報》圖片

不急於見面

對於「未來女婿」鄭嘉穎催婚,陳凱琳父親的態度是反對,完全冇得傾!

壹:壹週刊 父:陳凱琳父親

壹:贊成 Grace閃婚嗎?

父:唔會,點會咁快閃婚呀!

壹:有冇見過嘉穎?

父:未見過。

壹:若果真係閃婚,你會介意?

父:唔會,佢(陳凱琳)一定俾我見咗先嘅。

壹:如果嘉穎真係做你女婿……

父(搶答):嘩,呢個十畫都未有一撇喎!我個女都未同我介紹,我都未見過佢。

壹:如果真係做你女婿,鍾唔鍾意呀?

父:唔可以咁早落一個結論,對大家都唔公平,所以我唔會咁快答。

壹:會否想同嘉穎快點見面?

父(猶豫):我又唔急嘅。

壹:佢哋已經發展得好穩定!

父(落閘):我個女好後生,事業剛剛起步,邊有咁快,我蝕本㗎咁樣!

父女戀打得火熱,去年 6月鄭嘉穎與陳凱琳被本刊拍得同遊法國返港。甫落機,陳再跟男友返家宿一宵,翌日才回家報到,因此已觸怒陳父。

一吻定情。去年初,陳凱琳與鄭嘉穎拍《殭》撻着。

陳父母對女兒呵護備至,經常一家出去食飯,亦順便𥄫實女兒。

睇電視見過

至於陳凱琳母親,亦跟丈夫同一口徑,對鄭嘉穎表現抗拒。

壹:壹週刊 母:陳凱琳母親

壹:有冇見過嘉穎?

母:電視機咪見過囉!

壹:如果佢哋閃婚,你贊成嗎?

母:哎吔,你哋(記者)嚇死我,等我定吓驚先!

壹:如果佢哋真係結婚,嘉穎做你女婿,你會滿意嗎?

母:都俾你哋嚇到未定神!

鄭嘉穎信奉泰國四面佛多年,似乎他要拜多幾次神,求女友父母接受他。

鄭嘉穎近年北上為家,與他 friend底的樂易玲便代為關照女友,連睇騷都陪實。

陳凱琳被封為「歷屆最靚港姐」, 13年當選時曾表示自己是虔誠基督徒,堅拒婚前性行為。

畢業於加拿大西門菲莎大學的陳凱琳,自小受父母高度栽培,細細個已是小提琴高手。如果閃婚咁就嘥料。

週一記者再向陳凱琳求證被逼婚一事,她索性封口,急步衝入電視城。

鍾意唔認數

「𡁻完唱」,衰格!但食完唔認數,一樣離譜!鄭嘉穎亦有唔認女友的習性,所以,他破格公開認愛甚至拖手,陳凱琳定是他的終極目標。

拒認周麗淇

03年合作《翡翠戀曲》發展地下情,鄭嘉穎雖然多次被拍得出入女方香閨,但仍堅決否認戀情。直至 08年暗撻佘詩曼,周麗淇怒斬 5年情。

踢阿佘落車

08年拍《法證先鋒 II》撻着,同年 9月,有日八號風球,鄭嘉穎接佘詩曼返南圍村屋遇上「死火」,要村民幫手推車令戀情曝光。多月後,載阿佘離開南圍斷正,鄭嘉穎情急下踢阿佘落車,極冇品!

即棄徐靖雯

10年被拍得窩藏 23歲國產 model徐靖雯,二人在南圍村屋禁室 72小時,但戀情見光死,鄭嘉穎懷疑有人放料,即撇!

壓力下分手

戀愛自由的年代,但到某個階段,就要面對家長一關。不少名氣界情侶,因為家庭壓力要分手收場。

賭王三太

11年何超雲與陳山聰撻着後,有傳三太陳婉珍和賭王嫌男方個底花又結過婚,反對二人一起。反叛超雲於是出走歐洲,以拒返港行動作反抗,最終三太妥協,任由寶貝女碰釘,拍拖兩年,終於因為 money而分手。

愛財何世根

何傲兒、何傲芝父親何世根向來對揀「女婿」有高要求,細女何傲兒早前便被前度周子揚踢爆,二人拍拖期間,何父對他不滿並將女兒介紹給「爺爺」林建名,又被女友胞姊苛索每月廿萬家用;年前何傲芝與蕭正楠拍拖時,亦有指何父嫌棄男方事業無成。

戴思聰

戴蘊慧與吳國敬拍拖三年,最終因家庭壓力而分手。之後戴蘊慧火速下嫁馬來西亞香蕉園太子爺謝志雅,有傳二人是戴思聰一手撮合。

撰文、攝影、攝錄:娛樂組


鍾意就快D Share啦!