爆壹爆
夜蒲女鬥事業線
大除夕夜，爆哥同咗成班豬朋狗友去「給平」，諗住一路飲酒一路睇女迎新年。損友帶咗爆哥去佐敦一間新場，點解唔去老蘭呀？原來呢間場當晚為咗搶客，竟然抵死到搞咗個「事業線比賽」，搵咗一班夜蒲女參加，鬥低胸晒事業線，冠軍仲可以獲得一部最新型號「唉瘋」添，所以吸引咗唔少女仔參賽。雖然低俗，但爆哥 like it， go go go！
入場時，個職員俾咗三張貼紙爆哥，爆哥問佢有咩用，佢就猥猥瑣瑣咁話：「陣間你就知，包你話過癮。」當晚間場好鬼多人，想搵個位企吓都難，可能呢度係佐敦，間場好鬼多 MK仔同 MK妹，蒲慣中環嘅爆哥真係有啲唔慣，不過諗到有女睇，算啦。倒數完後，好多女仔立即除咗件外套。嘩，個個都一副戰鬥格低胸上陣，唔知班女做咗乜嘢手腳，個個都夾到條事業線又長又深，男客人睇到眼定定。之後，班女仔走勻全場拉票。原來，男客人支持邊個事業女，就可以將手上嘅貼紙，貼落事業女個胸度，邊個女仔得到最多貼紙，就可以成為冠軍。男女授受不親，點好意思呀。不過，爆哥為表尊重大會，都搵咗個女仔嚟貼，不過只係貼喺佢隻手臂。但係，之後有好多女仔詐型，話明係事業線比賽，點解係鬥貼紙多嘅？
另外，可能呢個比賽太出位，當晚就有大批反黑探員嚟查牌，嚇到一班事業女即刻著番件衫。
勝和坐館轉型拍戲
呢排勝和真係多是非，當中猛人上海仔仲搞到滿城風雨，話要開記者會申寃，點知最後玩潛水，依家去咗邊都冇人知。而勝和又就快選坐館，唔少大哥近日都忽然變得高調，睇嚟江湖從此多事。
有人打崩頭爭上位，但有現任坐館就睬你都傻，開始不問江湖事玩轉型。爆哥上星期跟朋友去演藝學院後面嘅電影中心，睇一套動作片《極鬪》嘅首映，去到望望張海報。咦，點解套戲個出品人咁熟口面嘅？望真啲，原來係勝和坐館沙田 Me。朋友同爆哥講，沙田 Me投資咗二百幾萬拍呢部戲，仲搵咗港視一個導演幫手拍添，佢兩個仔都有出鏡㗎。爆哥聽講，呢套戲已經排緊期喺戲院上映，亦會賣埠去東南亞上畫。睇嚟，沙田 Me真係好想做娛樂大亨咁喎。話時話，勝和人都好鍾意做娛樂圈，好似猛人四眼柱，除咗做電影《黑社會》嘅顧問，仲出埋鏡添。
靚女呻港鐵多鹹豬手
唔少女性朋友同爆哥呻，每日返工放工坐港鐵時都好慘，因為每逢人多擠逼時，就會有啲鹹豬手出嚟揩油，就算佢哋點樣小心，都有俾鹹蟲抽水嘅危險。爆哥聽完，都替佢哋唔抵。
二十三歲嘅 Nami就話，好多時啲人都貪方便唔肯企入去，塞晒喺門口位置，搞到個個人都要面貼面手貼手。女仔好易蝕底㗎嘛，所以佢每次搭港鐵，都會打醒十二分精神。而另一位 model身形嘅 Carmaney就話，試過有朋友坐港鐵時俾人非禮，朋友即用手機反拍色狼，仲大聲話將段片擺上網，到時一傳十、十傳百，色狼都唔使再有面見人。 Carmaney就希望港鐵可以學吓日本嘅做法，喺繁忙時間設立女性專用車廂，男士一律禁止使用，咁班鹹濕佬就唔會有機會落手，女士們又可以放心。
爆哥乜料
金融界撈家，穿梭黑白政商界，朋友遍布旺角至中環，每星期都八到
唔同料，同《壹》仔讀者過吓癮！
|
鍾意就快D Share啦！
|
|
|