求婚當晚，男友出動女方家長、音樂人徐偉賢及多名教友舉起「 MARRY ME」幫拖，結果跪地一求，即掂。
探熱針
圓洲角公園求婚 土地問題 陳明恩婚期難定
白皮黃心的 34歲鬼妹陳明恩，一口流利廣東話，連搵老公都要黃皮膚。未婚夫 Eddy花盡心思，將公園變為浪漫求婚地，又出動女友家長、教友舉求婚牌助威，成功得米，陳明恩趕及 2015尾班車，宣布有人認頭。
落咗焊！但據知陳明恩同未婚夫一日未解決土地（愛巢）問題，也無法落實婚期。
露出馬腳
自稱奶黃包，即皮白心黃的鬼妹陳明恩，與初戀男友、任職 dancer的 Eddy Cheng拍拖兩年。還趁着二○一五年將近過去，趕到尾班車做準人妻，早前在網上公布訂婚，標尾會的她，以英文寫下愛的宣言：「 Eddy我很愛你！我已經訂婚了，我可以成為你的未婚妻覺得很幸福，你是一個在多方面都很了不起的男人，我可以做你的女人感到很榮幸，非常開心。」
陳明恩冧爆有原因！未婚夫為要一求即中，即使花唔起錢，都花盡心思。求婚當日， Eddy搵埋陳明恩父母、兄長、經理人及十幾個教友徐偉賢、譚嘉儀等，夾手夾腳用氣球加 I Love U燭光，將女友寓所附近的沙田圓洲角公園布置成浪漫求婚地。
儲錢置愛巢
一心俾陳明恩驚喜的 Eddy，送女友返家途中訛稱忘記買日用品，要求一齊去補購，點知有人失誤，露出馬腳，求婚驚喜不足，靠誠意分搭夠。
「明恩一行入公園，好快就發現有個人匿埋拍 video，想扮驚喜都唔得不過佢都好感動 Eddy咁花心思，揀十二月二十九日求婚，因為 Eddy要遷就喺日本住嘅未來大舅返港探親時間，佢想對方可以在場，見證妹妹呢一刻。」陳明恩好友說。
求婚落定訂，但陳明恩幾時正式做鄭太，卻被住屋問題困擾，令婚期無法落實。
「其實佢兩個打算簡簡單單，教堂行禮，夜晚就同家人食餐飯，唔會大搞，所以結婚唔會用好多錢；因為佢哋要儲定彈藥，結婚先要搞掂個竇，一個 artist，一個 dancer，收入唔會好穩定，依家屋租貴，想婚後有自己天地，所以佢哋好努力儲錢。」陳明恩好友說。
撰文、攝影、攝錄：娛樂組
|
鍾意就快D Share啦！
|
|
|