豪語錄
加細碼 羅仲謙
為羅仲謙借衫，他公司指示要細碼，臨場，還有點鬆。
大隻仔之名一去不返了。
「加細碼都仲得！」他的加字說得很用力，令我突然醒起——「加細碼」這個 term是否邏輯謬誤？
加大碼易懂，就是從大碼加上去；怎加細呢？
羅仲謙說：「潮流興『小鮮肉』嘛，戲路會廣啲。」
本練成滿身肌肉而自願節制，的確要用力的。
正如上位電視劇男一，來到《三打白骨精》演沙僧，點計都係配角，但一邊小熒幕，一邊大電影，必經過程，角色細了，卻是加分。
你見過農夫插秧嗎？低着頭一根一根往後插，退步原來是向前。
有個年齡和地位比自己高的女友，羅仲謙沒急急宣示睇齊，人如其名仲謙啲，樂意做加細碼男友。
他是楊怡的小鮮肉。
跳幅
兩年前《西遊記》演木吒，一場戲；今次變身沙僧，不只進步，羅仲謙說：「直頭跳幅。」的確，好奇在，上次究竟發生什麼事？足以三級跳？
「好在什麼都冇發生，做足功課交足本分。那種大製作，不論大小演員都有工作人員跟場，帶去休息室，飯已準備妥。我自己都唔好意思，回心一諗，俾得咁嘅服務，就係要你交出 100%水準。」
養兵千日，用在一朝。
「鄭保瑞導演同我講，好坦白，沙僧挑挑行李，吸引幾多注意力呢？正因為形象模糊，發揮可以無限大，他教我放多啲幼稚落去，外表是鬍鬚大男人，入面是一顆少男玻璃心，產生矛盾便惹笑。」
按原著，沙僧應該冇乜對白……
「對白不用多，但要識得俾肢體反應，𢱑𢱑頭，哪怕觀眾睇唔到。」
沙僧是抵得諗的沉默英雄。
定格
入行前，羅仲謙做過救生員，大概也是沉默英雄，照計，游水叻才可以當救生員，出風頭應該做運動員。羅仲謙說：「運動員 level高，我達不到。算一項本領吧，許多人誤解了，以為只負責拯溺，其實我們主要預防遇溺。」
總想用在一朝吧？
「我落水救過一個小朋友，冇呼吸，有脈搏，救得番，當時覺得好威，但用我十多年後的思維去諗，都歸咎自己責任——點解我沒阻止危險發生？小朋友冇家長陪同喺池邊奔跑？
「寧願悶啲，工作還包括檢查水質衞生，你話頹廢都冇辦法。」
羅仲謙說，後來他諗過投考消防員，性質也相近——主要是預防火警，最好冇事發生，有事就搏到盡。
縮水
這天，外景橫風橫雨兼交通阻滯，羅仲謙二話不說，即場換衫。我唔係劉公子（傳聞中收藏他裸照的闊佬，也不禁讚嘆，讚嘆在，練成渾身肌肉固然難，更難是肯解除軍備，而且收身得均勻。
「運動耐力練出來的，就不會一下子鬆泡泡。當初諗住冇觀眾記得羅仲謙，至少記得有個『大隻仔』，《飛虎》是我巔峰期，事後自己用經理人角度睇番，呢條友仔仲可以點？脹卜卜，頭又細，著西裝唔好睇，成隻蟹咁；是時候改變，潮流興『小鮮肉』嘛，於是刻意縮番細。
「猶幸年輕，皮膚仲有彈性。」
延長
撇開過往緋聞，羅仲謙還算踏實——人夾人緣吧，這兩年與楊怡一起後，轉眼已傳到三月泰國是婚期。
「朋友睇完報導，都問是否要訂定機票；我話落實的話，一定講得清清楚楚。
「我係圍村仔，家庭觀念重，細細個已 plan定人生應該點行，有份工作就諗結婚，結婚就諗生育。工作是什麼，對象是誰，都係咁行。
「收入唔使，最緊要穩定，所以我十九、二十歲時想考消防或警察，爸爸知我讀書唔叻，起碼有宿舍住；但入了這行，頭五年求收支平衡也難，變得唔敢諗。
「踏入三十歲開始，叫做過得自己關，又着番圍村 mode，幾多個小朋友好呢？未有對象已經在儲錢買樓，不能等遇上合適才開始，會好徬徨嘅。」
說穿，因為世界複雜了。
「我今年八月就卅二歲了，冇得呃，藝人結婚不是私人 party，是大眾 party，諗住幾低調也罷，到頭來都係全港記者嚟晒。我想得到傳媒祝福，點可以令人家寫好啲？不外我敬你一尺你敬我一丈，所以要籌備耐些。真正時間表已經像 puzzle砌砌砌——咁佢（指楊怡）知啲唔知啲啦，瞞到就假嘅。
「來到現在，我已經習慣這話題，計年資，她永遠早過我，但男人演藝壽命長啲，總有日追得貼。」
報大
羅仲謙說，二十至三十歲最難捱，頭五年搵朝唔得晏，後五年是既得患失。「很多人上上吓會冇咗，我唔識唱歌又冇讀過演技，點樣再上呢？郭晉安教我，這行是個大擂台，不只得一個人。不用次次爭第一，是每次淘汰賽時爭取保持十名之內生存下去。
入行以來，他至少演過四次角色叫「阿謙」、「謙仔」之類，即係由大隻仔終於俾人記得個名，但亦等於做來做去做自己。「今次沙僧成身藍到你認唔出，連肌肉（因為已不存在）都是穿上去的。」不現真身，另一種打真軍。
還有，訪問中，羅仲謙開口埋口卅二歲，換轉其他人，一日未生日冇理由報大——有理由的，不知不覺又追貼啲卅六歲的楊怡。
陸戰
羅仲謙說，上次《西遊記》大鬧的是天宮，飛來飛去；今趟《三打白骨精》打得硬淨啲。
對，既已展示過特技無限可能，返璞歸真人性化，反而有新意。
我想起那套《無心法師》，無節制地濫用萬能 key，連布景如廚房、睡房都 key上去，有風駛盡𢃇，土豪劣根性。
計劃北上發展的羅仲謙語帶徬徨說：「其實，大陸還需要港人什麼？」
我們優勝在，至少，還懂得腳踏實地。
撰文：余家強
攝影：梁炳權
攝錄：羅錦波
協力：蘇韻詩
化妝： Leo Tam@Annie G Chan
髮型： Jan Chiu@IL Colpo
服裝： BLACK BARRETT,Ted Baker
|
鍾意就快D Share啦！
|
|
|