熱爆娛樂: 拒養女　周永恒唔肯離婚　阿 Yu：要等多一年 [壹週刊

2016年1月21日星期四

拒養女　周永恒唔肯離婚　阿 Yu：要等多一年 [壹週刊 - 1350] 周永恒,M1,趙頌茹

雖然獨力養女好吃力，但亦因兩個小朋友，阿 Yu話：「佢哋令我由怕事懦弱，變成堅強。」

探熱針

拒養女　周永恒唔肯離婚　阿 Yu：要等多一年

為逃離家暴，零積蓄的阿 Yu 14年帶住兩個女，自力更生。但分居至今，兩個女的生活費，一直由她獨力承擔。

去年被小三 Ruby狠撇的周永恒，近期搭上𡃁模周芷儀，有錢溝女但堅持唔俾錢養女，更加唔離婚。被迫「苦候」多一年才可以正式離婚的阿 Yu，唯一安慰是兩個女，「日子再辛苦，都唔會覺難頂。」阿 Yu說。

憂柴憂米

一個女人帶住兩個女，阿 Yu無多餘錢請工人，單親生活尚可勉強應付，但親子旅行之類活動，對她來說是奢侈。當年做人妻冇度蜜月，生了兩個女，亦未去過家庭旅行，直至去年底，阿 Yu參與有線的親子真人騷，才有機會帶埋兩個女去台灣。

大女信希今年升小學，開支使費再加磅。

「呢個人生過程，確令我上咗成長一課，無論係經濟抑或管理；一個冇嘢做嘅女人，變成帶住兩個女走出嚟，每個月都憂慮交租同應付其他開支，頂到呢個月，咁下個月又點呢！不過驚又咁過，唔驚又咁過，見又過到喎！每個月好似升 level咁，心態上有進步。

「小朋友開支係多，尤其你好想培養佢，需要學吓嘢，開學又要使一筆。以前好驚知道每個月用咗幾多錢，依家咪諗吓呢度慳啲嗰度慳啲，好在未試過入不敷支，夠生活已經好滿足。」阿 Yu說。

五歲的大女信希與三歲細女愛希嗲到爆，早前同媽咪藉接拍有線親子真人騷《帶阿 B去旅行》，三母女首度出埠旅行。

阿 Yu話兩姊妹平日起身第一件事就係嗌交，但出埠拍嘢竟然合拍到爆，家姐怕污糟怕臭，細妹自動請纓頂晒餵動物的「粗重功夫」。

周永恒早前為新歌 MV劇情，安排與緋聞女友𡃁模周芷儀拍床戲。

改變初衷

與周永恒分居一年多，男方去年底與小三 Ruby姦情玩完，隨即搭上𡃁模周芷儀。外界以為他跟阿 Yu已辦妥離婚手續，但實情周永恒快活攬女的同時，又唔肯離婚，阿 Yu要「苦候」多一年，才能正式撇清關係。

對於前度唔合作，拒簽離婚書一事，阿 Yu答得隱晦。

「我循住法律途徑搞，之前諮詢過以雙方同意（方案）咁離婚，但去到依家需要改變，要等多一年先可以，依家處理緊。（對方唔肯離婚，所以要你等？）進展唔到第一個 choice。（唔離婚嘅理由係咩？）唔知，根本溝通唔到。」

早前周永恒與連詩雅前度曲赤，及被傳是𠝹女王的魏焌皓孖住夜蒲，但原來他一直未肯簽字離婚。

為令生活再可改善，去年底還開始創業，在網上賣自家設計的衫，又做埋 model。「創業過程可以建立自己。」她說。

去年學埋化妝，為想多一技傍身，賺錢養女。

有咗經歷，阿 Yu之前拍港台劇，一幕內心戲眼淚話嚟就嚟！

拒養兩女

周永恒唔肯離婚，連女兒基本生活費亦不願負責。

「之前有傾過大家點樣一齊養大佢哋（兩個女），但第一步都做唔到，唔同意離婚，就做唔到之後啲嘢。（即係分居之後佢都冇俾小朋友生活費？）我咪靠自己養大佢哋囉。（各自負責一半都唔肯？）達唔到共識。唔緊要，小朋友係我嘅，作為媽咪會盡力俾最好嘅嘢佢哋。（周永恒有冇見兩個女？）見咗，但詳情唔方便講。」阿 Yu一臉無奈。