俾面來港做串星，除咗因為對手是發哥、學友外， PSY對《賭 III》在內地和韓國上，也是考慮因素之一。
娛樂偵訊
鬥發哥學友 PSY大叔冇手軟
演員有演技，唧人眼淚唔難，但要引人發笑，就絕對係考牌。
估佢唔到！有份在《賭城風雲 III》客串一角的韓國 PSY大叔，唱得跳得之餘，原來做戲都有一手，同發哥周潤發在賭枱對決的一幕，劇組原定需要二至三日時間拍攝，點知 PSY大叔好快已經掌握同發哥、學友對手的節奏，生鬼的他，一日拍完所有戲份，超爽手！
專程來港做串星
睇《賭城風雲 III》，卡士組合有九十年代《賭神》、《賭俠》系列感覺，周潤發膽拖張家輝、劉華，連久未在大銀幕露面的龍五（向華強）都有份，加埋張學友、劉嘉玲，演員陣容鑽石級。
《賭 III》秉承賀歲片一貫作風，星光遍布每個鏡頭。飾演大反派的學友同發哥賭枱對決，派出三大高手上陣陪賭，席上粒粒大星，其中「撲克王」一角，角色性格設定為自信又寸嘴，劇組一度𢱑頭冇心水。「呢場係重頭戲，坐得埋枱嘅全部係大星，初時諗極都揀唔啱人做『撲克王』，後來有人話個角色好似《 Gangnam Style》個 PSY，所以就試吓聯絡對方事務所，要大叔專程來港做串星，大家都不敢抱太大期望，點知佢又一口答應。」劇組工作人員說。
一日搞掂慳唔少
喜劇好講節奏感， PSY同發哥、學友素未謀面，所以劇組預計要用兩至三日，拍攝三人對決一幕。
第一日落場 PSY大叔聽完導演劉偉強講解，一埋位便自動波，和發哥、學友出奇地有默契，最終一日搞掂，幫劇組慳番唔少。
「 PSY埋位無耐就搵到個節奏，真係無諗過咁快手可以拍完。」劉偉強說。
嘉玲眼紅學友
去年賀歲的《賭城風雲 II》中，發哥同嘉玲的感情是其中重頭戲份，據了解，當初為了氹掂嘉玲落疊，電影公司特別為她準備了十多個不同造型配合演出；為安排在《賭 II》 ending跳飛機的嘉玲在《賭 III》繼續出現，劇情安排她跳機後被做大反派的學友救走。
今次嘉玲要在發哥同學友兩人中作出選擇，至於誰是 Mr. Right，她大耍太極，反而借機埋怨：「其實我有啲妒忌學友囉，佢每套衫都價值連城㗎！」
跑贏對手
《賭城風雲》連續兩年票房大賣，今年賀歲檔對手主要有周星馳執導的《美人魚》外，還有郭富城做孫悟空的《西遊記之三打白骨精》，今年《賭 III》進步加強陣容，為預算有六十億票房的內地賀歲檔，打一場硬仗。
《賭城風雲》
14年，賀歲檔期有《六福喜事》、《金雞 SSS》、《西遊記之大鬧天宮》，各有重量級卡士，而《賭城風雲》突圍而出，一開即登上榜首，香港票房近 3500萬港幣，內地狂收五億人仔，兩地高收。
《賭城風雲 II》
去年再下一城拍《賭 II》，同年賀歲對手主要有《浮華宴》、《 12金鴨》、《衝上雲霄》，發哥一打三，《賭 II》票房一直領先，香港收 2800萬港元，內地票房高達九億人仔，成為票房冠軍。
撰文、攝影、攝錄：娛樂組
|
鍾意就快D Share啦！
|
|
|