英國萬人迷碧咸（David Beckham）一家，噚日情人節當地時間早上10點現身紐約時裝周，齊撐Victoria自家品牌嘅2016秋冬時裝騷，人見人愛嘅哈七（Harper Seven）紮住孖辮專心睇騷，見佢例牌坐喺私家位，即係碧咸大脾，旁邊就係時裝界名人Suzy Menkes，不過哈七今次就顯得有啲未瞓醒，一時咬手指，一時撩鼻哥，而大仔Brooklyn都機不離手拍下盛況。英國《太陽報》上星期獨家報道指碧咸嫂Victoria將來港開新店，指碧咸同Victoria會分居半年，而今次趁時裝品牌Victoria Beckham舉行新裝騷，Victoria即場宣佈香港已鐵定下月18日開倫敦以外嘅第二間舖，選址喺中環置地廣場，到時會打通兩店，今次係同joyce合作開店，到時Victoria會親臨香港為opening打點一切。Victoria喺時裝騷後接受訪問，佢表示一向鍾意亞洲，認為香港人都好有時尚觸覺，所以揀香港作新店嘅地方。其實去年3月來港時，Victoria已同眼鏡店溥儀合作，當時推出限定期間嘅Classic Victoria Aviator系列，睇得出碧咸嫂對香港市場真係好感興趣。據講碧咸要準備到美國邁阿密，籌備成立一隊當地足球隊，碧咸將留在美國及英國，碧咸嫂就會穿梭香港及歐洲各地，導致呢對恩愛夫妻要分開半年時間，英國《太陽報》亦指今次可能係二人婚姻嘅最大考驗。
|
鍾意就快D Share啦！
|
|
|