保養得宜嘅仟汶，千叮萬囑唔講得佢幾歲，記者只可以講，維基個資料係錯囉！
真面目
大戲癮 俾王晶老點拍 3級片 顏仟汶洗底從良復出
早排大台翻播舊劇《孖仔孖心肝》，見到有一青春少艾同星爺做對手戲，望真啲，原來係千禧年代三級片之后顏仟汶！
拍過一大堆露點戲， 04年顏仟汶退隱電影圈， 08年修心養性嫁人，閒時北上登上唱歌賺吓人仔不知幾過癮。今年好友梁焯滿開拍微電影而被邀重出江湖，不過顏仟汶拒絕再露。「太搏嗰啲留番俾啲後生，我哋呢啲，相信𠵱家有另一種韻味嘅！」
訪問地點選擇喺顏仟汶有份投資、位於西貢海傍的西餐廳，由招呼客人、傳菜、執枱一腳踢，完全冇擺老闆娘款。「當年 2004年嘅時候，成個電影行業嘅市道，慢慢淘汰，嗰陣時我都係跟住個勢去走，因為我都要生活嘛。𠵱家主力都喺返西貢呢度嘅餐廳，都有 10年喇。」
唔知為乜做脫星
去年底好友梁焯滿（ 89年港姐梁珮瑚胞弟）自編自導自演微電影《變身愛》，搵來已經 10年無拍過戲的顏仟汶做女一。「𠵱家嘅心態係，我唔係為名唔係為利，當然適當嘅片酬要收啦，但係我真係有戲癮囉！好想做一個演員演戲係一個職業。」
曾經撈過三十幾部電視劇，拍過四十多部電影， 04年話收就收， 08年連婚都結埋正式收山做良家婦女的顏仟汶，當年有苦又有邊個知？「你問我以前係咪為名為利？我可以話俾你聽我唔係！我當年係唔知為乜，基本上我由 ATV炒咗我出嚟，跟住到晶哥搵我返去拍，我係一個無靈魂嘅狀態之下拍（三級片）！我身邊無一個經理人去幫我手，全部我自己一個女仔去做，如果件事發生喺𠵱家，我相信件事唔會係咁樣。」即係俾王晶老點啫！
始終不是一線，加上係脫星，顏仟汶慶幸冇遇過不受尊重。「《獸性新人類》，嗰時係我第二套，阿滿（梁焯滿）好似係第一套，基本上我唔係好知佢係邊個，導演無講得好明白，我哋事先又無溝通， roll咗機，佢去到我耳仔邊嘅時候，『仟汶，掂唔掂得呀？』，即係佢會好尊重我，問咗我掂唔掂得。我好感恩我遇到一個咁樣嘅對手。」
現在的顏仟汶，有廿四孝老公錫到燶，難怪一提起舊愛杜汶澤時，仟汶笑笑口說：「朋友囉。有機會見到面，我相信都會打招呼囉。」
採訪、撰文：蘇詠詩
攝影：林迅景
化妝： Mandy@Bridalcorner
場地： S2 seafood& wine restaurant
|
鍾意就快D Share啦！
|
|
|
