阿旦爆 Winkie喺練習時出陰招，似有意預早打傷對手，增加自己贏面。
真面目
爆陰毒 賽前擊暈阿旦 爆 Winkie打 MMA出賤招
免費電視 ViuTV下星期開台，重頭節目《 G1格鬥會》請來 8個女藝人、模特兒同歌手真人對戰 MMA，節目未播出街就爆是非， Winkie（黎美言）被指為求上位，拳拳攞命成為犯眾僧。
其中阿旦（鄧洢玲）更爆料，指 Winkie喺賽前練習已立心不良，趁阿旦未戴齊裝備就喪打其頭部，令其暈倒幾乎不支倒地，阿旦話嗰刻：「真係有諗過會死！」
阿旦（鄧洢玲）去年 9月接受 ViuTV節目《 G1格鬥會》邀請參賽，係最遲一個答覆，只有 1個月時間練習，做開娛樂節目主持嘅佢，都認識大部份參賽者，當中跟 Winkie都會攬頭攬頸。
重拳中下巴
但阿旦爆有一日練習， Winkie帶咗 4個「朋友」嚟參觀，阿旦一如以往未有戴上牙膠就跟 Winkie練習試位，點知 Winkie突然發狂，阿旦憶述：「一嚟就好大力同埋好狠咁打，其中一下更中咗下巴，嗰下直接上到頭頂，我已即時暈到挨咗埋網，但係佢冇停，繼續打繼續打，我唔知點算就喊咗出嚟！」阿旦形容當時腦海一片空白，叫 Winkie停手，對方都唔理，好彩教練終於發現至埋嚟叫停，阿旦稱嗰刻有諗過會死：「我都未真正上場，以為未俾公司拍到我嘅努力就死咗，咁我咪好無辜囉！」
Winkie打完阿旦仍未罷休，跟其他女藝人練習時依然係喪打，阿旦指其實其他女參加者不滿 Winkie都係由嗰日開始，而因當日龍小菌並無嚟練習，至會繼續同 Winkie老友。
阿旦指 Winkie直至今日都冇一聲 sorry或解釋，後來更發現，當日 winkie嘅「朋友」原來係 MMA教練，嚟視察其他女藝人弱點。阿旦話：「我教練講，如果俾人 lockout（不省人事）過，兩個禮拜內再俾人擊中同一部位，會好容易再 lockout，所以佢喺比賽前喪打我哋，正式比賽時佢會易贏啲！」
因為保密協議，阿旦唔可以透露賽果，但阿旦指比賽期間因為爸爸重病要做 3次手術，打完其中一場比賽之後更要趕去醫院，爸爸第二日過身，阿旦傷心及要陪媽媽，又唔想週身瘀傷再刺激媽媽，故退出比賽。
女打手 Hazel：未拍前已經積怨
《 G1格鬥會》參賽者唐紫睿（ Hazel）同劉燕妮（ Rika）早前已爆 Winkie心狠手辣，拳拳打面幾乎毀容，日前 Hazel接受本刊訪問，指節目未拍攝前已經積怨。 Hazel稱：「本身大家都唔識，一埋牙就打交，你話會唔會產生恨意呢？一定係有，其實啲是是非非，出自我把口嘅 100%係真實，我都唔怕講出嚟！遲啲你哋睇節目都會知道，每個女仔都有自己諗法；真係打出火！」
佢又話打 MMA真係會死：「好多鎖技係專攻關節，可以啪斷手腳，鎖頸可以令人窒息死，踢到下顎、氣門、肋骨位都會有生命危險。我後尾有啲抑鬱，每日沖涼都忍唔住喊。」
採訪、撰文、攝影：娛樂組
|
鍾意就快D Share啦！
|
|
|
