娛樂偵訊
《太陽的後裔》專訪 宋仲基宋慧喬廷續神話
大熱韓劇《太陽的後裔》紅爆，上星期更加作為 ViuTV開台劇喺黃金時段對撼無綫，結果喺慣性收視手上搶到八點，絕不簡單！兩位主角宋仲基同宋慧喬襲港宣傳，全程默契十足，接受專訪分享拍攝過程，戲裡戲外都係羨煞旁人嘅金童玉女！
香港啱啱開始播，韓國今個星期就播大結局，究竟最後可唔可以有情人終成眷屬？
希臘培養默契
《太陽的後裔》成為新一代國民劇集，宋仲基同宋慧喬紅到發紫，今次係佢哋第一次孖住出席海外宣傳，心情特別靚，喺台上不時眉目傳情，又擊拳又搭膊頭，默契十足，非常老友！宋仲基喺專訪中透露，喺希臘拍攝三十一日外景，同整個劇組建立深厚友誼：「我和宋慧喬在希臘幾乎每天都要拍攝，行程非常緊密。其他演員有休息，可以周圍遊玩，可能對努力工作的我們深感愧疚，經常買雪糕給我們吃，特別要多謝晉久哥，經常買啤酒給我喝。」
今次嘅軍人角色，就好似係為剛退役嘅宋仲基度身訂造，簡直迷死女 fans！不過話說回來，軍隊題材對海外觀眾嚟講比較陌生，宋仲基訪問時仲反問香港觀眾點睇，簡單話佢知香港劇迷對軍階唔熟，佢立即覺得好新鮮：「今次是我第一次去海外宣傳，可以直接聽到這樣的評語特別高興。今次雖然是愛情劇，當中也有地震、傳染病等等場面，軍人及醫生都會無私地參與救援工作，編劇們想強調不只是韓國軍人，而是全世界不同職業的人都是如此，這也是劇集的魅力之一。」
對白印象深刻
《太陽的後裔》之所以令眾多女劇迷神魂顛倒，宋仲基喺劇中所講嘅冧女對白應記一功！宋慧喬同過咁多男主角合作，見慣大場面，都話劇中對白令佢暈得一陣陣：「不論是作為劇中對手，還是一位女性觀眾，聽到『你想要我道歉還是告白？』這句對白，實在是很心動。」
至於宋仲基就另外有心水：「有很多都令我印象深刻，現在我突然想到的是『你做醫生，應該無男朋友吧？這麼忙！』這一句。第一次看到的時候覺得『嘩，很直接！』，將角色的性格描寫出來，由於是第一集的對白，希望引起觀眾的共鳴。」鏡頭前演繹呢啲對白游刃有餘，現實生活中邊有男仔講得出咁嘅對白？原來宋仲基都講唔出口㗎！「當初收到劇本時，讀完的時候都覺得很擔心，台詞充滿可愛的感覺，我都很苦惱可否帶出這個感覺。當開始拍攝，跟宋慧喬圍讀劇本及彩排時，她令我很自然地演出，解決了我當初的煩惱。」現實係公平嘅，喺靚女對手面前，幾肉麻嘅嘢都講得出
大結局是生？是死？
《太陽的後裔》今個星期喺韓國播出大結局，網上流傳多個版本。先聽壞嗰個，上集預告話宋仲基再次被調派去執行任務，有指宋仲基將會殉職，而宋慧喬就懷有佢嘅遺腹子，呼應番劇名「後裔」。亦有指會大團圓結局，喬妹同宋仲基會返去希臘呢個定情之地。孰真孰假，今個星期揭曉！
《太陽的後裔》
時間：逢星期四、五 8:30pm-10pm
頻道： 99台 ViuTV
撰文：關錦雯
|
鍾意就快D Share啦！
|
|
|
