娛樂偵訊
自投羅網 杜汶澤撞正舊愛顏仟汶
一班台前幕後前亞視人，上週舉行每年一度的「 A記同學會」聚會，由於撞正亞視熄機「頭七」，參加人數踴躍，當中包括已過檔無綫的江美儀、陳煒等人，至於去年被指為避前度顏仟汶冇蒲頭的杜汶澤，以為今年亦缺席，但就送出一萬蚊作抽獎獎金，不過在臨散席前，阿澤玩驚喜突然出現，撞正前度未走，合照避無可避。
阿澤陳煒科水抽獎
上週五（四月八日）晚，「 A記同學會」包起尖沙咀一間酒樓搞聚會，知道仍有舊同事未有糧出，發起人之一江美儀感觸表示長痛不如短痛，結束是另一開始，兼且公開呼籲業界，以亞視員工忠心，作為聘用優先考慮，聲援一眾舊同事。
「亞視終於玩完，所以今年大家特別踴躍，有成五百人參加，但其實個場都擺唔落咁多人，有啲遲嚟嘅都要打游擊周圍黐位坐，不過大家都係志在見吓敍舊。阿澤一早講咗唔到，但佢拎咗一萬蚊出嚟抽獎，早走嘅陳煒同朱慧珊都有拎錢出嚟抽，分咗好多個幾百蚊嘅現金獎，大家開心！最特別係安排鮑（起靜）姐特別頒個最佳女配角獎俾（吳）浣儀姐，補償佢喺金像獎輸咗！」一名有出席的前亞視員工說。
大塊田講明唔到
據了解，為避開前度顏仟汶，去年缺席「同學會」的杜汶澤，今年亦講明同老婆田蕊妮繼續甩底，差不多到散席時，阿澤又失驚無神出現，自製驚喜的他一踏入酒樓，即被大家輪住集郵，又取笑他是「 TV Buddy」，搞到平時牙尖嘴利的他唔識反應。
「好多亞視人都知，當年阿田係阿澤同顏仟汶嘅第三者，所以阿澤兩公婆會盡量避開三個人同場出現。顏仟汶今年都有報名，阿澤亦講咗話唔到，不過後來有人係咁打電話俾佢，叫佢點都趕嚟影張相；阿澤十一點半左右趕到嚟，雖然兩個人都有一齊影大合照，但分到好開，亦冇傾過偈。」
葉家寶不受歡迎
田蕊妮避席外，前高層葉家寶以及公關黃守東，當晚亦意外未有現身。
「亞視拖糧呢段時間，好多同事都覺得佢兩個講嘢好官腔，完全冇企喺員工嗰邊，所以大家唔 like佢哋，好似阿東早幾日仲講緊見過司榮彬，話有消息會通知同事，但大家根本都冇奢望會有乜好消息。其實佢哋自己都知，明知不受歡迎，所以都冇報名參加，費事嚟到面懵懵。」一名前亞視人說。
顏仟汶代還賭債
杜汶澤與顏仟汶已經分開十六年，雙方各有家庭，但時至今日，阿澤仍會刻意迴避前度。
二人 97年在亞視結緣，雖然拍拖只有一年多，但顏仟汶對杜汶澤火裡火裡去，即使他只是亞視「霉菜」藝員一個，又經常欠下賭債，不過顏仟汶卻無限包容，甚至代還債項。
無限付出，換來是被狠撇。 99年，因為田蕊妮介入，杜汶澤即離棄與自己甘苦與共的顏仟汶。
有指有日杜汶澤瞓醒，就跟枕邊的顏仟汶說分手。過去顏仟汶也曾在訪問中重提舊事。「杜先生好絕，話分手就分手，用四個鐘就將屋企所有屬於自己嘅嘢搬走。」顏仟汶說分手後，她仍有跟痛錫她的澤媽保持聯絡，而澤媽亦永遠不會在她面前提杜汶澤三個字。
分手不再是朋友， 00年顏仟汶在公開活動碰上田蕊妮，記者要求影合照，阿田左閃右避，受傷的顏仟汶反而大方接受。
撰文、攝影、攝錄：娛樂組
|
鍾意就快D Share啦！
|
|
|
