探熱針
車廂又嘴又啜 張景淳翻撻華姐宋雙佳
憑劇集《天與地》「家明」一角彈起的張景淳，同華姐女友宋雙佳拍拖多年，感情穩定，年前卻爆出他扮單身嗒前 HotCha成員張惠雅（ Regen），搞到分手收場！
但原來張景淳已經成功氹番女友，二人於去年尾秘密復合，本刊早前發現他送女友返屋企，情到濃時，二人在車廂激嘴！失而復得，特別肉緊。
日日寫道歉信
張景淳偷嗒 Regen，女友宋雙佳決定斬纜，但他一直冇放棄，千方百計，努力爭取對方回心轉意。
「佢哋已經認定對方，所以拍拖一年就大方公開戀情。同 Regen搞埋，事後 Stanley（張景淳）真係好後悔，亦好內疚傷害咗宋雙佳。分手後，佢每日都 send message俾女友道歉，又會親手寫信，就算對方冇反應，佢都堅持唔放棄，最後終於打動到宋雙佳。」知情者說。
車廂嘴完又啜
女友再俾機會，張景淳更加珍惜眼前人。
早前，張景淳做柴可夫，親自送女友返回將軍澳日出康城寓所；到埗後，他將車停埋一邊傾偈，其間見他攞出一盒禮物送給女友，宋雙佳即拆，跟住張景淳又捉實女友情深對望，再連番激嘴。一輪車輪舌戰後，張景淳在女友額頭再連啜六啖，愛火重燃，更加火熱。
二人在車廂調情大半粒鐘，搞到屋苑管理員都忍唔住，上前干涉，拍窗趕車，宋雙佳才依依不捨，落車上樓！
現年三十五歲，於神劇《天與地》飾演少年家明為人留意的張景淳，與曾參選《 2008年國際中華小姐》的宋雙佳一○年撻着，直至一四年尾，他背女友偷嗒本身亦名花有主的前 HotCha成員 Regen，關係四國咁亂！
感情更勝從前
事發後，「被分手」的張景淳更當街哭求宋雙佳原諒，不過對方堅拒復合！
「前年 Stanley拍《潮拜武當》，要同一班女仔去武當山幾個月，當時宋雙佳已經好唔放心，佢係個疑心比較大嘅人，平時都 check住晒，雖然 Stanley有時都覺得俾女友管住好難頂，但為咗令對方放心，都專登喺去拍劇前請假，陪宋雙佳去咗峇里島旅行，又同女友傾結婚派定心丸。
「估唔到最後 Stanley唔夠定力，同 Regen日對夜對三個月，真係撻着！宋雙佳收到風男友出軌好傷心，仲主動同 Stanley分手，當時佢企得好硬，無彎轉嗰隻；而家失而復得，兩個人嘅感情，仲好過以前。」知情者說。
四國亂局
10年，張景淳與華姐宋雙佳撻着，二人經歷多次離離合合，更一度陷入四角關係的亂局中。
2015年 2月
Regen與張景淳結伴夜蒲斷正，二人更公然甜蜜拖手，當時， Regen表示已與 Esta分開。
2015年 5月
張景淳於 Instagram貼上與宋雙佳的甜蜜接吻照，可惜事隔一個月又鬧分手。
2015年 6月
為求向正印宋雙佳箍煲，張景淳於街頭呆等個多小時，更被拍到在車廂內狂喊向女友求復合。
撰文、攝影、攝錄：娛樂組
|
鍾意就快D Share啦！
|
|
|
