娛樂偵訊
試揸的士搵食 甄詠珊：多勞多得！
前女子組合 Freeze成員甄詠珊 10年離隊轉投亞視，更拆彈由 D cup還原 B cup。之後傳出婚訊，但臨門撻 Q的她，日前卻被發現揸的士，素顏開工入型入格，由導彈變身的士司機的甄詠珊坦言，揸車搵食，多勞多得！
撞車留陰影
最近甄詠珊以歌手身份再戰娛圈錄歌出碟，又遠赴韓國接受跳舞唱歌訓練兼客串劇集，還有將公演的舞台劇《借用下一世的男朋友》，幾路出發。
上星期，剛由韓國集訓返港的甄詠珊，出現觀塘碼頭，著住一身便服的她，在碼頭附近跟一名中年男子在的士旁密密斟；之後更打開車頭蓋研究。
兩人傾了約十分鐘，之後甄詠珊便坐上司機位，校好後鏡開車走人。當時的士冚了旗，並冇準備載客。
「其實自從前年佢喺交通燈位俾人撞，到而家都有陰影，每次見到由黃燈變紅燈，成個人會怯一怯，更加唔可以揸得快。」知情者說。
全程龜速
一四年撞過車留有陰影的她，當日揸住冚旗的士全程龜速，由觀塘碼頭到啟德郵輪碼頭短短路程，足足花了十五分鐘，極之安全。
到達郵輪碼頭後，甄詠珊落車同中年男子調換位置，做乘客直出旺角睇中醫。
對於是否轉行揸的士，甄詠珊未有否認，「揸的士唔差呀！最緊要服務態度好，多勞多得。（咁究竟係咪轉行呢？）總之有新搞作再話你哋知。」
的士族
娛圈有藝人間唔中就會話自己撈唔掂，要走去揸的士，但十居其九都係得個講字，例如方大同和出身無綫的陳凱怡，就係其中代表。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
