早前拍《致命復活》撞頭受傷，他死撐唔請假，痛住去開工。
娛樂偵訊
《 EU》底褲發圍 王浩信焗加監 4年
剛播完的無綫劇《 EU超時任務》大結局，收視最高錄得 30點，劇中做圍頭仔的王浩信，著老底出場更成熱話，被媽咪網民大讚做得入型入格。小生近乎走清的大台即時做嘢，要求仍有三年約的他再加簽四年，唔應承等於自動入雪櫃做凍肉，要養家的王浩信，惟有乖乖就範，即時動筆加監。
師奶嗒糖
現年三十二歲的王浩信，一一年跟陳自瑤結婚生埋個女，人氣不跌反升。在無綫八年，做「兜巴信」先後在電視劇被劉松仁及謝雪心狂摑後，網民加晒分。
有話題，王浩信在《 EU超時任務》又有新突破，著底褲當街逃跑。
「 Vincent（王浩信）剝淨底褲喺條街周圍走嗰幕出街後， Baby Kingdom幾乎洗版，好多師奶睇完都嗒晒糖，大讚佢身形弗，又話佢愈嚟愈有戲，結咗婚都 keep得咁好，一晚多咗好多 fans。」一名無綫人說。
有機攞獎
網民力撐，更有影響性是得到高層留意，曾經在《法外風雲》被謝雪心狠摑二十四巴而突然人急氣升，王浩信更因此奪得一三年「飛躍獎」。
「外面人覺得呢啲獎冇乜用，但攞完獎後，其實無綫幫佢哋接出面啲 job都會乘機加價，變相多咗收入，所以就算係豬肉獎，點都好過冇。好似今次 Vincent喺《 EU》做圍頭仔，公司搵咗人教佢講圍頭話，聽得出佢有做功課，講出嚟似模似樣，啲阿頭都有讚佢，隨時又有機會攞獎。」
冇得唔簽
囤兵打仗，無綫亦不敢怠慢，要求人氣有上冇落的王浩信加簽四年，連同舊約餘下的三年，未來七年，王浩信都被大台揸住。
「公司走咗咁多小生， Vincent肯搏又聽話，班老細梗係要加佢監， Vincent明知唔續約冇運行；好似馬明，佢到而家都唔肯續約，公司抵制佢根本冇劇開俾佢，不過撞正搵唔到個較成熟嘅小生襯阿佘（詩曼），佢先有機會拍《賭王》。 Vincent要養家，公司又講明嚟緊會俾佢做男一力捧，所以點都走唔甩。」一名無綫人說。
自己友自己捧
無綫一直奉行只捧自己友的規條，就算近幾年逃亡潮冇人用，但如非必要，也不會重用外人，所以只要稍有潛質，例如劇接劇的陳凱琳，都被十年約綁死，被點中力捧要求加簽長約的藝人，大多會妥協唔 say no。
撰文、攝影、攝錄：娛樂組
|
鍾意就快D Share啦！
|
|
|
