被拖欠約五萬元薪金的阿肥，現時生活十分拮据。為了節省開支，他現在每日都是吃杯麵充飢，境況坎坷。
壹些事壹些情
亞視悲慘男
於一九五七年創辦的亞洲電視（最初名叫麗的呼聲），雖然收視一直低企，但總算陪着兩代香港人成長。不過，亞視最終不獲政府續牌，四月一日正式熄機關台，結束五十九年的使命。留下來的是一個爛攤子。陷入財困多年的亞視，經常出現拖糧欠薪鬧劇，台前幕後所有員工，每個月都不知道是否有糧出。
亞視員工，個個都叫苦連天。即使已熄機，仍欠下數百名員工五千多萬薪金。熄機前全港關心，傳媒悲情報導一浪接一浪，當事件過後有了新炒作，傳媒不再關心這班曾「過度消費」的人物。
煙花散盡後，本刊訪問了三名前亞視員工，都因為被亞視拖糧，令生活陷入困局，活在悲慘的現實中。有人銀行戶口只剩下四十元，每日只能以杯麵充飢；有人因無錢供養年邁父母而感內疚；亦有人擔心人到中年，做不回老本行。其實，還有很多很多……。
最新進展，亞視清盤案呈請人王征（前亞視主要投資者）又耍新招，確認正與三位投資者商討重組方案，若能順利落實，其中一名姓趙投資者，會於十月中前交出六千萬元付清員工欠薪。
不過，不少前員工都認為，還是盡快清盤討回欠薪最實際。
「戶口得番大約四十蚊，都係靠賒借度日，朋友都話長貧難顧，唔會再借㗎啦。」五十歲的吳瑞貞（阿肥），因被亞視拖糧，這數個月來都是問朋友借錢過活，但已經借無可借。
每日食杯麵充飢
九二年加入亞視的阿肥，亦做過報紙和雜誌等平面傳媒。其後紙媒低迷，他曾轉行做保安和侍應，「我雙腳有毛病，唔企得太耐，有次更導致坐骨神經痛，最終要辭工。」長期失業的他，去年九月幸得朋友幫助，重返亞視做編導工作。
本來以為從此會有安樂茶飯，怎料亞視又經常欠薪，「（去年）十二月份人工，幾乎係『搶糧』，因當時一聽到有資金存入（公司）戶口，我哋就立即去『搶糧』，（怎樣搶？）我哋會鬥快入支票，就叫做『搶糧』。」今時今日的香港，打工仔竟然要這樣去取回自己應得的報酬，的確十分可悲。
其後，想搶也沒機會。踏入一六年，阿肥已沒有收過工資，亞視欠他一月和二月的薪金，和一個月代通知金，共約五萬元。被拖糧，阿肥生活陷入困境，「食就要好慳，冇大魚大肉，唔可以出街食飯，做咗毒男。依家每日都係食杯麵，飽肚又平嘛，冇餸㗎，生活真係好坎坷。」
為了追討欠薪，阿肥不時要東奔西跑。去法庭和勞工處，又或和立法會議員會面。可是連交通費，亦負擔不來，「依家我去立法會申訴同抗議，我都冇車錢，都係懇求朋友借一百蚊俾我搭車。」他搖頭無奈地說。
問人借錢交租
一直與母親相依為命的阿肥，數年前母親過世後，被調遷到同邨的一人單位。雖是斗室蝸居，但總算有個安樂窩。不過這兩個月來，他已付不起千多元的租金，頻頻遲交租，「租金要千幾蚊，都唔知點算，惟有拖住遲些交，借到錢就交，依家嘅租金都係借返嚟交嘅。」
今個月的屋租他仍未交，房署已給了他一張單，提醒他要快些交租，「如果連呢間屋都冇埋，我真係唔知點算。」
其實阿肥在九二年加入亞視做編劇時，亦有過風光日子，「當時有個節目叫《今日睇真 D》，呢個節目幾乎全台人一齊去做，『解剖外星人』那一輯，創下三十多點收視。」因為收視好，舉行了大型慶功宴，當時的老闆林百欣，更向每人送了一個小金牌。
鬧亞視無良
因為做出佳績，有電視台和雜誌邀請他們過檔，但阿肥選擇留在亞視，因覺得亞視對自己不薄，「因為節目有收視，當時嘅人工一倍倍咁加，真係好風光。」而當時，他亦投資得利，持有五百萬的股票，可惜其後轉炒期指一鋪清袋。
對於未來有何打算？阿肥矢言一定要追討欠薪，一定要把亞視清盤，「一日未攞到欠薪，我一日都在捱苦。轉行？我已五十多歲，仲可以做乜嘢呢？」他直斥亞視是無良僱主，弄到如斯田地，是傳媒的悲哀。
他的一生，最風光的時間是在亞視，但最艱苦的日子，也是因為亞視。
冇錢俾家用
「坦白講有點羞家，咁耐以嚟未試過唔俾家用。」在亞視做了接近四年導演未婚的 Chris（ 34歲），亦是今次欠薪事件其中一名受害者。
當初滿腔熱誠加入亞視做導演的 Chris，做過《亞洲小姐》、《感動香港》、《六合彩》和賽馬節目，沒想過亞視真的會倒閉，「三年前，情況冇咁差㗎，當時（亞視）嘅品牌冇咁嚴峻冇咁差，亦冇想過會變成依家嘅鬧劇，以及見證佢倒閉。」亞視執笠，他亦被欠薪，「一月同二月嘅人工，因為佢係解僱我，要補一個月代通知金，總共大約九萬蚊。」
失業兼被拖糧， Chris的生活大受影響，連帶影響七十多歲父母的生活，「我最慚愧係冇能力俾家用，父母已退休，要我供養。」
未能給家用，母親還反過來幫他，「媽媽好錫我，成日會問我夠唔夠錢用，之後就將幾百蚊塞入我袋中。」 Chris坦言很難過，「我自問唔係一個懶惰嘅人，好努力工作，冇想過大富大貴，但都估唔到搞到咁嘅田地，要父母時時刻刻替我擔心。呢樣嘢我真係介懷，但我又可以做乜嘢呢？」
電視行業步入寒冬， Chris也擔心很難找工作，先後兩次到有線面試也沒回音，到無綫應徵，被要求降職，「無綫應徵廣告部，佢哋問我做唔做助導，叫我由助導開始做，助導薪金少一截，我覺得冇理由咁樣做番助導，過唔到自己，所以冇接受。」
Chris又說，如再找不到導演工作，便會轉行做地盤，因為要吃飯養家。
同事更需要幫忙
亞視雖然已熄機，但員工之間仍然團結。在亞視工程部做了二十多年的曾憲國，雖然自己亦失業，但沒有急於搵工，暫時做了亞視欠薪關注組召集人，全力幫同事追討欠薪，「現在大部分時間係幫同事，因為好多事情要鋪排思考。老實講，我將自己搵工計劃放在次位，次一等嘅位置。」
對於這年多來亞視經常拖糧，阿國坦言不好受。而亞視現時仍欠他兩個月薪金和一個月代通知金，大約六萬元。他結了婚，雖然沒有兒女，但也影響生活，「以前會經常出外用膳，依家少咗，盡可能返屋企食，喺屋企煮。無謂消費會減少，可以咁樣講，生活質素相應下降咗。娛樂亦減少，因為娛樂要用錢嘅。」
中年失業搵工難
他預計要到五月才會有時間搵工，但電視這行業正值低潮，「會有擔心，因早前跟幾名新聞部同事傾過，大家都發覺市況好差。」尤其是忽然間多了數百（亞視）人湧入市場，市場吸納有限的。搵工，難上加難。他又擔心自己已經五十二歲，競爭力不及別人，「我都想做番呢行，但要有心理準備，我未必可做番呢一行，要用一個中年人嘅角度去思考，唔可以再用一個年輕人心態去思考。」
這段時間，他除了處理追薪事件，其他時間都是留在家裡，感覺自己是退休老人。太太安慰他，就當作給自己休息，但這個假期感覺一點也不好受，「好似我太太所講，就當休息吧，但呢種休息真係唔舒服。」
撰文：程志康
攝影：田俊
news@nextdigital.com.hk
|
鍾意就快D Share啦！
|
|
|