探熱針
食女唔還錢 細佬天台危企 陳嘉桓：佢要好好反省
上週六凌晨，陳嘉桓（ Rose）細佬陳肇桓被發現因感情、金錢以及家庭等問題困擾，在旺角一大廈天台危企，警方到場游說一輪後，被勸服的他送去醫院治理，事後有網民圍插以 Black Chan在網上食女無數的陳肇桓花心，借家姐名周圍食女，兼且借錢唔還。
身在外地的胞姐陳嘉桓得悉事件後，亦忍唔住大鬧：佢要好好反省。
母親再嫁
陳嘉桓胞弟陳肇桓，今年 21歲，多年前父母離異，兩姊弟一直由姨母照顧，直至十多歲，陳肇桓搬去跟父親同住，陳嘉桓則與母親比較親厚，十六歲後一直跟母親生活。去年母親再婚，陳嘉桓不單支持，並跟同母異父的細細佬 Jaxton感情亦十分要好，經常將姊弟合照放上網晒幸福，但就鮮有提及親弟陳肇桓。
據了解，身形瘦削的陳肇桓，雖然樣貌一般，但身邊朋友指他愛出風頭，去年 9月 iPhone6開賣，排頭位的他，也因是陳嘉桓胞弟關係被傳媒大事報導。
一腳踏幾船
「佢好鍾意出風頭，家姐係藝人，以為自己都係藝人，用 Black Chan呢個名，經常喺網上同人吹水，不過實質係溝女。佢又好鍾意教人點樣可以一腳踏幾船唔俾人鬧，仲話自己試過兩日食兩女，而兩個女仔都知道對方存在，以為自己好掂。」網友大鬧。
愛同人分享感情生活的陳肇桓，在網上自爆有個拍拖四年的 model女友，不過，因花心愛食女，近月，終於有人睇唔過眼，在網上圍插爆他惡行，又指他欠前女友七千蚊唔還，不過他從來唔回應冇解釋。
「唔知係咪愈來愈多人鬧佢，佢覺得好大困擾，所以早兩晚走咗去旺角天台留咗好耐，雖然冇做啲乜，不過佢一直都有同朋友講自己近排心情差，朋友以為佢會做傻事，嗰晚報咗警。」知情者說。
事後表歉意
出事後，身在外地的陳嘉桓透過經理人公司回應：「我也很愕然，但無論如何都不應該這樣，成年人就應該對自己的言行負責任……希望他自己能夠好好反省，好好的調整自己！」
據了解，陳肇桓出院後已經回家休息，也向家人表示歉意。「雖然分開住，但其實佢哋感情唔錯，間唔中會見面食飯，好似佢生日， Rose同媽咪都一定幫佢慶祝，不過佢媽咪生咗細佬，冇以前咁多時間俾佢， Rose一開工又好忙，都唔可以吓吓睇住佢，所以佢要識諗生性。」知情者說。
親母變經理人
陳嘉桓家庭背景奇情複雜，其父母 Jacky、 Ronnie乃中學同學， 16歲時珠胎暗結誕下陳嘉桓，未幾再生其弟陳肇桓，之後分手收場。母親 Ronnie避走加國，陳嘉桓姊弟 3歲始由唐姓姨公姨婆湊大，直至 16歲才跟回流香港的母親團聚。後來陳嘉桓加入娛圈簽國藝娛樂旗下，為方便照顧女兒， Ronnie隱瞞身份任其經理人，直至 11年陳嘉桓被陳浩民、馬德鐘在橫店狼擒，母女關係始曝光，繼而坎坷身世被踢爆。早前 Ronnie再婚並誕下一子，陳嘉桓對細細佬呵護備至。
撰文、攝影、攝錄：娛樂組
|
鍾意就快D Share啦！
|
|
|