Terry在街上永遠找不到稱身的衣服，好在淘寶夠包容，「我本身傾向著高腰裙。就算食荷爾蒙都好，始終都唔係葫蘆形，裙襬喺高啲散出來，好睇啲。」
非常人語
東方不敗與葵花寶典 Terry Hui
《葵花寶典》第一回：欲練神功，必先自宮。
Terry並非江湖中人，卻肯定當中有詐：「假嘅。自宮點會令功力提升？」他是跆拳道黑帶三段，嗜好打 war game，身高五呎十吋，體重超過一百八十磅，偏偏有顆女兒心。為了令自己表裡如一，兩年前開始接受荷爾蒙治療，卻犧牲了一身好武功：「肌肉明顯鬆弛咗，以前都冇拜拜肉嘅。」他揚一揚手臂，三頭肌回盪，像洩了氣的氣球。
「師兄話，我而家嘅功力得番以前六成。」上帝疏忽，肉身枉受罪，值得嗎？「要得到一樣嘢，係要失去一啲。」同一副皮囊，穿迷彩軍裝的叫小鮮肉；著花邊裙仔，卻變了大隻妙。埋沒本我固然痛苦；抵抗歧視眼光，也很疲累。
Terry卻毫不猶豫的選了後者，「我鍾意而家多啲，自在啲。如果接受唔到自己，點叫人接受你？」「當我哋愈收埋，形象係點，就任由其他人老作。我嘅方法係盡量出嚟多啲。啲人睇慣咗，就唔覺得特別。」身先士卒， man過好多高官和富二代。
少女風與 Terry魁梧的身形不太搭配，但他一於少理，「我揀日韓款，好彩 XXXL淘寶都有。歐美款我唔係好啱，冇乜 detail位，唔收腰，著到好似 Q太郎咁。」他隨身帶備負離子梳，保持長髮柔順。香港人鍾意食套餐，貪其方便快捷唔使用腦。但 Terry集大隻、武功與喱士花邊於一身，整個 package非比尋常，「阿媽見個女著裙擘髀，就話女仔要斯文啲。個仔喊，就話男兒有淚不輕彈，掉轉又唔會喎。自細咁教育，就定咗型。」性別（ sex）、性別認同（ gender）、性取向和性格理應各自表述，「啲人成日炒埋一碟，好似套餐，事實我眼見唔係咁。」他與真女人之間，尚欠胯下一刀。雌性荷爾蒙的影響卻逐漸浮現，「生理上的改變好顯著。脂肪分布明顯唔同咗。應大的地方大咗、應幼的地方幼咗。」腰肢收窄，但豪爽的性格和喜歡女生的本性，卻不曾改變。
電視迷
姨媽姑姐的想法根深蒂固，其實要多謝 TVB。 Terry本身是電視迷，對劇集情節如數家珍，「無綫啲電視劇，跨性別人士或同性戀者，一係變態殺手，一係被變態殺手殺死，總之冇個好角色。」「最離譜係《八卦神探》，講個女仔被男性侵犯，所以好憎男人。潛台詞係：被男性侵犯過就會鍾意女人。係咪所有直男都俾男人侵犯過，所以鍾意女人？唔會㗎嘛！」他自問沒有童年陰影，「我同導演反映過，佢話：社會係咁諗，要迎合佢哋。結果造成更強烈的訊息，變了惡性循環。」「其實佢都係迎合嗰七百五十個機頂盒啫。」
Terry早在幾歲大時，已自覺是女生。他曾經跑到天台，以為一躍而下便可重新開始。但回心一想，如果輪迴過後仍是男生，豈非多此一舉？悻悻然返回地面。中學時讀教會男校，因為生得高大，又故意不剃鬚，混在一班雄性動物之中毫無破綻，「而家諗番，我以前係扮 man、扮粗魯。而家我粗魯，都係因為扮慣咗，我會盡量改善。」他調整一下坐姿，把雙腿疊好。
Terry自詡「好戲」，穿女裝的慾望卻不曾減退，僅有的零用錢都花在女裝上，自己躲在房間顧盼自娛，出廳食飯時又變回男裝。當年大台晚晚播《城市追擊》，追訪變性人妃嬙，由婚禮、吸毒、賣淫到入獄，最後自殺，是相當重口味的電視汁，「當時唔知自己係易服癖定係跨性別人士，總之係負面。阿媽對住電視係咁鬧變態，我更加收埋自己。」
林青霞
公仔箱令人困惑， Terry卻在大銀幕找到偶像。「我好沉迷林青霞在《東方不敗》的角色。有一幕講佢以女裝現身，在妓寨唱歌飲酒，好正啊！又靚又好打，我都想學功夫！」後來無綫翻拍了《笑傲江湖》，「其實魯振順個版本係最跟原著。但……我唔係好接受到囉。」 Terry修習跆拳道多年，噸位十足的他屬力量型、出腳狠。但女性荷爾蒙使肌肉減弱，負荷不了重型骨架，令膝頭舊患惡化，「師兄拿着拳靶，我打落去的力最多都係得番以前六成，最差時得兩成。」神功練不成，卻像神龍教主般，丟失了大半功力，餘下的只能教姊妹們防狼，「女子自衞術其實都係跆拳道，不過係旁門左道嘅招式。」
Terry過兩個月便要入手術室，修補前十字韌帶和半月板。卻未知何時引刀成一快，「隨緣啦。全港唯一做變性手術的袁維昌醫生退咗休之後，都未知醫管局點安排。聽講有人五月會做，不過未經證實。」他今個月底便會開始接受手術評估，然而這段最後直路會有多長？無人知， Terry也不着急，「用咗荷爾蒙，有啲人會暴躁、易發𤷪，有啲會情緒低落。我呢，無慾無求，似信咗佛。」
他的性情慾念原本就沒什麼漣漪。年過廿五才第一次拍拖。對方是個外表柔弱、性格堅強的女孩，與 Terry剛剛相反，「我係個西瓜。同我唔熟，會以為我係綠色；如果你切開我，會發現我係紅色。」女友覺得跟他一起沒安全感，拍拖三年後提出分手。「當時性緒好低落。但掟煲冇掟蓋，後來又一齊番。」其間他在電台聽到變裝皇后（ drag queen） Coco Pop的訪問。 Coco著女裝只為閃爆全場、享受讚美； Terry著女裝，卻並非為了扮演什麼，只覺自然不過。後來他透過跨性別團體認識了同道中人，終於認清自己不是易服癖，而是想做女人。
他鼓起勇氣向女友出櫃，「對佢來講，係晴天霹靂，但又唔係好意外，因為佢覺得我同其他男仔好唔同。」證實「唔鹹濕就唔係男人」是真理。「佢要拗直我，唔俾我接觸呢邊啲朋友，當然唔成功。」二人最終在○八年分手。乾涸多年，不覺寂寞？「有就有、冇就冇，緣分到咪隨緣。始終我哋同一般人唔同，異性戀嘅女仔，我唔會考慮。無謂到時佢接受唔到，又想拗直我就盞搞。注定流淚收場，不如唔好開始。」
催淚彈
Terry作為長子嫡孫，向家人出櫃恐怕會引發核爆，「我出世時，佢哋好緊張係仔定女。我媽講笑：生咗個女呀，佢哋好失落；知道係仔，就開心晒。」他約爸媽去同志中心，「我諗過，喺屋企有起事上嚟，冇得走；喺餐廳，又無謂做戲俾人睇。不過到嗰一刻，佢哋都估到了。」媽媽不住搖頭，爸爸沉默良久，開腔時卻說：「我唔理你係我個仔、定我個女，屋企嘅門永遠為你而開。」一眾彩虹囝囝把耳朵貼在門外偷聽，「佢哋好多都係被屋企人趕出家門，所以好緊張。聽到我爸講啲咁感動說話，佢哋都好高興。」事實上，他 WhatsApp的頭像一早轉了女裝，每年萬聖節都以 Lolita造型出現，「好似炸彈咁，收得埋就爆得勁。如果逐啲擠出來，濕水炮仗，點極都唔響啦。」
這一役使 Terry壯大了膽。但驅使他站出來面對群眾的，卻是那八十七枚催淚彈。九二八前夕，他在電視見到一名穿短裙的女孩被警察拖行，膝頭在水泥地上磨到血肉模糊，「我覺得一定要出來，支持學生。原本諗住去觀禮啫，點知變咗去飲。」當日穿男裝還是女裝？「男裝啦，當時我都仲未成日著女裝。不過要拖行我都唔容易！」第一枚催淚彈就落在他面前，「第一個反應係，六四？好嬲，衝埋去想淋熄佢。呢個行徑係好衝動，走到埋去第二枚又爆了。同埋催淚彈一爆有三十二粒彈頭，你冇可能逐粒淋熄晒。」面對暴政，縱有一身好武功亦無用武之地，令他反思何謂真正嘅勇武，「既然對着專權政府，我都夠膽走出嚟，面對性別平權，點解我又唔夠膽出聲？」「世上有啲國家，每日都會將同性戀者推落樓。我哋沉默，最終只會被歧視到不能容忍。」
他決定向世界出櫃。 Terry在設計公司工作，男同事平日相當口賤，看見他以女裝現身，粗口橫飛、訕笑辱罵不斷。老闆體諒，卻提出他在辦公室時要換上男裝。每日放工要躲在廁所變身、化妝，普通人不用遭受這種「禮遇」吧？「真心講，我老細讓一步，我咪讓一步，大家好做。我做平權啫，但無法逼我的同事接受。佢開出呢個條件，我袋住先，但唔會袋一世。」
性別認同障礙算是精神病，受《殘疾歧視條例》保障，「如果一個同志因為性取向而被炒，就唔係犯法，所以立法好重要。」「我講平權咋喎，唔係講特權。有啲團體話我哋爭取特權。佢哋成日執住一點，就係社會有爭議。如果冇爭議，根本就冇歧視，唔使立法啦。」過去幾年，在平機會推動下，同志們以為《反性傾向歧視條例》終於有眉目，但新主席陳章明未上任，已講明不贊成立法，倒車返回一九八四年，「我唔想喺訪問過程中講粗口鬧人。你係平機會主席，唔熟書都唔怪你，仲要話永遠都唔會熟？咁請你做乜？我納稅做乜？」
撰文：蔡慧敏
攝影：高仲明
攝錄：葉漢華
news@nextdigital.com.hk
|
鍾意就快D Share啦！
|
|
|