呢一啜，為求快、狠、準，事前多番彩排試位，結果一 take過。
娛樂偵訊
《瑪嘉烈與大衞》劇透 周家怡潘燦良摩天輪舌戰
被網民指劇情貼地，但主角背景離地的 Viu TV自家劇《瑪嘉烈與大衞系列綠豆》，手法破格贏口碑。至於劇中搞咗幾個星期曖昧的周家怡與潘燦良，終於抵受唔住，背叛林保怡偷情，劈腿男女將浪漫摩天輪當偷食勝地，兩個仲啜到攝製人員停咗機都唔知。
朋友妻當好西
邊拍邊播的《瑪嘉烈與大衞系列綠豆》，近日出街的劇情已發展到周家怡（瑪嘉烈），醞釀劈腿，與男友林保怡（大衞）的老死潘燦良（趙子龍）搞曖昧。
早前周家怡同潘燦良在中環拍偷食場口，在劇中飾演林保怡老死的潘燦良，實行將「朋友妻當好西」咁食，二人在中環的摩天輪啜爆。
呢幕係偷食重頭戲，工作人員要塞埋在另一格摩天輪卡廂內，捕捉男女主角轉到水平線位置一刻的幾秒鐘，男女主角仲要邊嘴邊聽住 walkie talkie，留意導演指令。
導演大整蠱
唔想嘥大家口水，周家怡同潘燦良事先試位排練多次，務求一嘴即中唔 NG；結果，兩人投入到連拍攝隊的卡廂已經轉走咗都唔知。
「我哋一路嘴，嘴到卡廂轉咗另一邊，佢哋影唔影到都唔知。一路嘴住，心諗點解咁耐！直到聽到導演喺 walkie問：『點呀，你哋係咪仲錫緊？』轉走咗（停埋機）都唔出聲，擺明整蠱！」周家怡說。
俾人鬧都要做
離開大台後，事業更上一層樓的周家怡，演劈腿「瑪嘉烈」演得到肉，惹來睇得投入的網民鬧爆。但原來當事人事前曾經過心理掙扎，怕偷食角色翻唔到身。
「都真係擔心過角色唔討好。不過諗深一層，其實呢個世界真係有瑪嘉烈呢種人，只要角色有血有肉，就應該放膽做。就算有人鬧同唔鍾意個角色，都唔緊要。」
劇情貼地，水準又唔膠，觀眾自然加晒分。
Hehe有伏線
《瑪嘉烈與大衞系列綠豆》首集中，一對同志在的士車廂內嗌交，令網民 like爆，大讚 ViuTV斷背情夠到肉，唔似大台永遠將 hehe包裝成乸形，悶爆。其實這對 hehe情侶是潘燦良與林保怡隱藏 hehe味的伏線。
分享劇透！潘燦良勾義嫂，原來是要向中學時他暗戀的對象林保怡證明，女人靠唔住。上週其中一幕，潘燦良從周家怡口中得悉林保怡唔肯同女友去旅行後說：「真係一天都光晒，如釋重負。」因為當年林保怡曾拒絕他邀約去旅行，這塊心頭大石，終於可以放低。
劇中潘燦良損人不利己，但最後始終不得逞，更把心一橫由攣變番直，選擇同周家怡的姊妹湯怡一齊，加埋廖碧兒，五角關係錯綜複雜。
屋主係日本人
主角林保怡在劇中飾演的士司機，但屋企裝修中產有格調，被外界批評不切實際。呢間主景離地屋，是位於佐敦文匯街的舊樓，屋主是位日本女士，去年以七百六十萬購入單位後大執，玻璃門取代鐵閘，變成門中有門外，劇中林保怡踎過的坐廁，廁板有暖氣，百分百日式。
撰文、攝影、攝錄：娛樂組
|
鍾意就快D Share啦！
|
|
|