Janice出街執都唔執吓，街坊到呢！
娛樂偵訊
冇黎明接濟 衞蘭 cut cost揸殘車
曾經是老細眼中識生金蛋的衞蘭，同黎明結束 12年賓主關係，為了讓孖生細妹衞詩有機會再出碟，不惜自降身價，說掂華納唱片，一同將兩姊妹收歸旗下。
一個搵錢兩個人分，加上轉會後收入大不如前， Janice甚至連自己第一架 dream car寶馬都要放棄，改揸待劏級別的萬事得錢七。日前，錢七電池打柴，身形 keep住電單車的 Janice，披頭散髮衝入北角油街附近的呔鈴鋪求救，搞足成個鐘，架車先郁得番，一額汗！
電池打柴
近幾年，衞蘭對於自己的外形一直採取放任態度，口講話要搣甩部電單車，改以單車為目標，實質是邁向同坦克車睇齊，好大鑊！
磅數有上冇落，但工作量則相反的衞蘭，過檔華納後亦無甚起色。日前，記者發現肥腫難分的衞蘭，與衞詩現身北角油街，兩姊妹素顏街坊打扮，冇人認得出。衞詩離開後，衞蘭兜圈再兜圈，終於走入一間呔鈴鋪，指手畫腳一輪，再急急腳行去附近的櫃員機撳錢，然後又折返呔鈴鋪，會合店員行去 AIA大廈停車場。
一三年考獲車牌後，豪擲五十萬買下 dream car寶馬 X3，但現場所見，出入代步的 BMW，已改由車齡至少有十五年的錢七萬事得 Premacy取代。因為錢七的電池玩完，呔鈴鋪職員捧住嚿全新電池，跟衞蘭去停車場換。
「架車咁舊，嚿電池打柴有幾咁出奇呀，呢啲小兒科啦，六百蚊搞得掂！」呔鈴鋪的職員說。
緊縮開支
由黎明一手捧紅的衞蘭，老細登台開騷，一定有份，更一度愈住愈豪，由郝德傑道低密度住宅，搬去月租四萬的九龍塘畢架山一號。直至年前拍板同老細「分手」，遲遲未泊到新碼頭的衞蘭，焗住搬到比九龍塘平租的大圍福來別墅。
今非昔比，為了讓衞詩有機會再出碟，衞蘭不惜割價氹華納唱片簽埋胞妹，但撞啱市道差，登台走埠買少見少，一個搵兩個使，經濟有壓力，生活開支，縮得就縮。
「養架寶馬皮費唔輕㗎，淨係油錢都唔嘢小，阿 Jill（衞詩）又冇咩收入， Janice焗住換架殘車，慳番啲錢！」一名與衞蘭相熟的教友說。
寶馬又好，錢七都好，衞蘭都要面對現實。
撰文、攝影、攝錄：娛樂組
|
鍾意就快D Share啦！
|
|
|