智雯拍攝時，錯手打爆曾海昌眼角，事後智雯內疚爆喊。
忙於拍攝無綫劇集《三個女人一個「因」》的藝人黃智雯（Mandy），日前因缺乏拍打戲經驗，不慎打爆《功夫新星》出身曾奪得世界健身先生銀牌的曾海昌左眼角。事後Mandy直認內疚爆喊：「我角色有多重人格，第二人格好狂野同暴躁，成日打人發洩。咁啱有場戲見到曾海昌飾演嘅賊仔打我男友陳智燊，所以我上前用手㬹批佢個頭。點知批錯位打中佢眼角位，即刻爆開咗3cm傷口，仲流好多血，我見到都忍唔住喊！」
學過拳用慣死力
Mandy稱得悉對方入院後證實無大礙，才放下心頭大石，但會繼續傳短訊問候對方，直言以後會打醒十二分精神度準位置：「冇諗過自己破壞力咁強。（食過夜粥？）為拍劇同興趣學過蔡李佛拳，可能用慣咗死力。」她直言尚要拍不少打戲，目前仍有陰影而不敢出手，幸得監製潘嘉德及同事安慰才平復心情。曾海昌事後亦表示傷口已經埋口，並謂：「意外嚟啫！唔使縫針。」
發難打埋袁偉豪
至於早前與Mandy到中環開工的袁偉豪（Ben）透露有安慰對方：「動作戲少不免受傷。（避開佢嚟拍？）我會就位。（佢好大力？）平時唔多覺！可能佢錫住我！」現場所見，劇中被Mandy發難動粗的Ben出手反擊，向對方使出「壁咚」及「抱抱」，足見二人交情不俗。
同劇的陳智燊，則稱事發後再與Mandy拍打戲時，眼見對方出手時有所避忌，故曾主動聆聽對方傾訴。
來源 source: http://hk.on.cc
|
鍾意就快D Share啦！
|
|
|