模特兒鍾浠文（Zelia）、楊洛婷同設計師何國鉦今日喺金鐘出席「Centrestage大匯演」記者會，Zelia係大會嘅模特兒之一。講到近況，Zelia就話現時半停工，原因係爸爸患咗不治之症，佢話：「上個月爸爸喺內地，入咗院，係肺嘅病，好嚴重，冇得醫，因為佢同媽咪分開咗，我接咗佢過嚟香港，日日陪住佢，希望佢可以正面啲，呢排佢心情好啲。佢仲講話想坐遊輪，我計劃緊呢個月尾或下個月頭抽五日陪佢去。」問Zelia醫生有冇講爸爸仲有幾多時間？Zelia就眼濕濕話：「醫生好保守，我唔想講幾耐，好難受，想佢諗啲開心、正面嘅嘢。o依家工作上係需要放棄，呢啲係將來嘅回憶，唔想有遺憾。」因為Zelia係獨女，父母離異，所以兩個有咩事Zelia都要負責照顧，之前佢媽媽嚟香港，又整親膝頭，所以佢都要保持好嘅狀態，Zelia話：「一個太辛苦，我有諗過以後生嘅話，唔可以只生一個。」同場嘅楊洛婷一直都希望生B，佢好搞笑咁話最近畀父母鬧，叫佢唔好再掛住玩，要努力造人，佢就話：「老公下個月演唱會，想搞佢都搞唔到，留返年尾，聖誕節warm啲，我都想下年生雞仔，因為我哋兩個都係屬雞，真係應承咗年尾嚟真，好多人畀啲資料我哋，介紹排卵捧、用咩姿勢，我哋喺屋企條樓梯試擺嗰啲姿勢，應該會high啲，o依家朝早食冬蟲草飯做早餐。」
來源 source: http://hk.apple.nextmedia.com
|
鍾意就快D Share啦！
|
|
|