麥明詩陷寨卡恐慌兩年唔生B！
寨卡病毒近月在美洲肆虐，情況不容小覷，昨日香港更出現首宗外地傳入寨卡病毒感染個案，情況令人擔憂！「十優港姐」麥明詩過去一個月遠赴巴西採訪奧運，期間曾被蚊叮，隨時有感染危機，今日返港的她直言未有時間驗身，幸暫未出現病徵，但已決定未來兩年不生育避過生畸胎風險！男友林作則笑言要將她隔離，過幾日再聯絡！至於無綫高層余詠珊表示已為麥明詩等買重保險，即使感染寨卡病毒都有保障。
港姐冠軍麥明詩（Louisa）與攝製隊自7月底到巴西里約熱內盧採訪奧運賽事，期間可謂多災多難，起初選手村及傳媒村問題多多，「搵食艱難」的Louisa要到超市買餸下廚，房間廁所的洗手盆有組件脫落，其後更遇「傳媒村老鼠」被偷約數千港元現金！捱過約一個月後，Louisa今日返港，卻又要面對寨卡病毒危機！
主要透過蚊蟲叮咬傳播的寨卡病毒，連香港昨日亦出現首宗外地傳入寨卡病毒感染個案，情況絕不能睇小！Louisa在巴西上機前接受訪問，直認曾在巴西被蚊叮，存在「中招」風險，問到今日返港後會否進行檢驗？她說：「我後日（28日）會做金牌運動員訪港匯演，之前又要採訪，工作排咗好多，所以未有時間！」
無綫買重保險
寨卡病毒感染的病徵包括皮疹、發燒、結膜炎、肌肉或關節疼痛，但大部分感染者並無病徵，Louisa直言身體未感不適，但潛伏期2至7天，因此不敢掉以輕心，她說：「唔覺得有任何病徵，當然有啲嘢未必feel到，所以有時間都會去檢驗吓。」講到寨卡病毒對孕婦影響最大，有機會令初生嬰兒出現小頭畸形，Louisa表示尚未有生育打算：「呢樣就唔會好擔心，因為啲研究話只要兩年內唔會有BB都應該安全，咁兩年內我應該唔會有BB囉！」
無綫助理總經理（非戲劇製作）余詠珊昨接受電話訪問，透露對於寨卡病毒，無綫在大隊出發前往巴西前已經做足準備工夫，小心處理，事前安排同事聽取有關防疫講座，並為大隊買重保險，投保範圍包括感染寨卡病毒在內，若果有同事不幸感染，保險也能提供協助及照顧。問到無綫可會要求由巴西回港的員工停工隔離？余詠珊說：「停工就唔使住，依家亦未有收到報告有同事受到感染。」
隔離幾日先見
至於Louisa的大狀男友林作，昨接受訪問時直言沒有緊貼奧運賽事，不過有留意Louisa動向，指對方雖然被偷錢又冇啖好食，但相信她捱得苦：「見佢呢兩日去咗旅行，玩得好開心，巴西咁異國風情，應該平衡得番！」講到Louisa有感染寨卡病毒的風險，問到會否擔心其健康？林作笑說：「我就唔擔心，不過啲朋友搞笑咁講，話麥小姐返到嚟要小心啲，要隔離佢，等幾日先好聯絡！（Louisa話要忙多一排先做檢查，你會否勸佢早啲？）唔會咁唔好彩啩？」
林作又跟Louisa同一口徑，笑言兩年內都不會生BB：「正路，兩年內唔會佗B似佢作風，事業搏殺期嘛！（你都搏殺期？）係呀，大家一齊搏殺，依家後生仔嘅機會真係唔足夠！（咁計劃幾時有BB？）真心冇諗過，我同廣大嘅香港年輕人一樣，搞掂咗上樓問題先，仲點有辦法養多個人？」
文：影視組
|
鍾意就快D Share啦！
|
|
|