林穎彤今日喺商台接受訪問，佢喺大台做咗多年，拍劇、主持都有做，近日喺劇集慘被姦殺而死更成話題，嚟緊又會跟同一監制合作拍劇。問佢怕唔怕被定型做悲慘被姦既角色，佢話:「唔怕，呢啲角色反而觀眾鍾意，慘情入心啲，情願做慘好過做奸，我做奸冇人信服，之前扮過奸角，啲人覺得我似小朋友扮大人。」多咗人識，又收入多咗，林穎彤承認有吐氣揚眉嘅感覺，因之前事業停滯過一段時間，不過暫時未有能力買樓，跟阿媽同住，佢哋打算裝修。可謂事業愛情兩得意，但佢否認，坦言同拍拖一年嘅容天佑近日分手，佢話:「反而係事業得意，愛情失意，我哋分咗手。」被問係咪因紅咗飛起對方，佢話:「唔係，我都怕人哋咁諗，之前我哋都搵緊相處方式，但近來好忙少見，大家覺得分開努力工作，唔想糾纏喺呢啲問題，做番朋友。」至於有冇好多追求者，佢話:「冇人追，平時相處我唔會諗人哋係咪追我，亦冇人發動攻勢追，如果你（記者）都話我個勢係吐氣揚眉，就唔諗呢啲（愛情）。」
來源 source: http://hk.apple.nextmedia.com
|
鍾意就快D Share啦！
|
|
|