13年， DaDa在道歉會上一臉迷惘，表現無助，同今日的自信截然不同。
娛樂偵訊
DaDa唔同晒：遇過兩個乜（仆）街！
13年憑《低俗喜劇》奪得金像獎最佳女配角後， DaDa陳靜壓力爆煲，以「生活好累，人言可畏」為理由宣布引退，但兩個半月後又戲劇性地公開道歉，宣布復出。
過去幾年，變得低調的 DaDa蒲頭為電影《 S風暴》做宣傳，眼前的她多了幾分成熟，不再肥腫難分眼神空洞，她說轉變是同遇上兩段南轅北轍的感情有關：「一個人，總會遇一、兩個乜（仆）街！」
是咁的！那緋聞傳到似層層的彭于晏，還有國內富二代王思聰又是否榜上有名呢？
同彭于晏似層層
今日的 DaDa，有問必答，同三年前比，明顯改變不少。
曾幾何時，她以為自己可以在二十六歲結婚、一年後生小朋友，事到如今，這念頭早已打消得一乾二淨。
「經歷（遇人不淑？）試過㗎，一個人，總會遇過一、兩個乜（仆）街，哈哈哈！我喺呢方面（感情）好弱，仲未知自己想要咩，所以先會去試。朋友話好，就試吓一齊，又同過好聽我話、乜都以我諗法為第一位嘅人，但我又覺得唔鍾意喎。人鍾意開心經歷，我同時都享受唔開心嘅經歷，絕對係一個契機，去令自己改變。」 DaDa說。
DaDa自稱現階段單身，暫時亦無意拍拖。過去三年，感情經歷令她有停一停的打算。
「其實都係兩個啫（彭于晏？）唔係，真係唔係！呢單簡直係個問號，我都唔知發生咩事， question mark嚟㗎！」
不過， DaDa卻大讚傳媒想像力豐富，可將她從荔園掟公仔得來的大象毛公仔，以及送給同住好姊妹的彭于晏圖像生日蛋糕（對方是超級粉絲），作為兩人有 road的證據。
多做事少說話
憑《低俗喜劇》爆炸糖一角， DaDa奪得第三十二屆金像獎最佳女配角，同年宣布退出娛樂圈，六個月後又戲劇性回歸。一三年，是事業豐收期，也是人生低潮期。
「我中間（內心）缺咗一『忽』（內涵），會冇信心，壓力就更加大，以前就會逃避，匿埋，好驚去解決事情，一走了之啦，冇諗後果，只為自己感受，係任性㗎！過咗呢個難關，望番轉頭，我好開心呢件事發生得早，令我而家睇嘢擴闊咗，同人相處，關係亦穩固咗，係得着！」
多做事少說話是這幾年 DaDa的鐵規， encore拍風暴系列《 S風暴》，與兩大型男張智霖同仔仔（周渝民）合演對手戲，第一日埋位，就要捉住 Chilam狂打狂鬧； DaDa聲稱自己真心入唔到戲，全靠對手不厭其煩，從旁幫手，才順利完成拍攝。
對周渝民死心
原來 DaDa是仔仔的忠粉，同偶像合演情侶，令她興奮了好一陣子。
「開頭覺得佢（仔仔）好內斂，唔多出聲，但原來佢都好幽默同講得笑，又好識照顧人。有場戲我就唔到力，俾玻璃𠝹傷，自己唔敢同工作人員講，因為當時好趕，進度有啲落後，不想自己小小皮外傷，進一步影響拍攝進度；但仔仔好快就留意到，仲提議停一停機俾我休息吓，嗰一刻，真係好感動。」 DaDa說。
仔仔不單為人細心，揸電單車更加溝死女，戲中兩人有場《天若有情》式電單車場口，導演一 take收貨，只可惜對方已為人夫， DaDa還是死心了！
離奇引退
憑 E cup身材走紅的陳靜（ DaDa）， 10年入行，憑《低俗喜劇》成為金像獎最佳女配角後，突然在微博貼文「生活好累，人言可畏。壓力、痛苦，總是一起來。」在未有同經理人施念慈商量下，單方面公告情緒受困，要退出娛樂圈。息影兩日， DaDa又突然復工，秘密為彭浩翔執導的《曼珠莎華》補戲，行為飄忽。
有傳 DaDa因為黐到澳門有米娛樂猛人，自恃有大水喉射住，罔顧合約精神。人間蒸發兩個多月後， DaDa現身公開道歉並宣布重返娛樂圈；自此變得低調。主力拍電影的她，今年同家姐合資六位數字開童裝店，極速歸本之餘，分店開完一間又一間。
撰文、攝影、攝錄：娛樂組
化妝、髮型： Annie G Chan、 Leo Tam
場地提供： Partyland
|
鍾意就快D Share啦！
|
|
|