【短片】【獨家有片】貼地又親民幫遊客截的士 發哥同司機selfie影埋的士做背景
2016-09-20 11:33:00 HKT
（相片由讀者何先生提供）
發哥嘅霸氣！（相片由讀者何先生提供）
其實發哥都係幫遊客截的士啫（相片由讀者何先生提供）
佢仲好nice咁同何先生合照（相片由讀者何先生提供）
（相片由讀者何先生提供）
（相片由讀者何先生提供）
要見到國際巨星本身就係一件好難嘅事，能夠遇到巨星仲會幫你搵埋路就簡直天方夜譚。不過日前，奧斯卡影帝里安納度就喺紐約，細心咁為一對公公婆婆帶路。(相關新聞： http://bit.ly/2cH5pZg )唔使咁遠去到紐約，喺香港都係有一個親民巨星，佢就係成日都同市民自拍嘅發哥——周潤發。
一直都係香港人心目中偶像嘅周潤發，貴為國際級巨星嘅佢，非常貼地又親民，除咗會撘地鐵、行街巿之外，但凡任何人喺條街野生捕獲到佢，只要問一句話可唔可以合照，即刻可以得到「與發哥selfie」機會x 1，GOTCHA！
發哥親民嘅程度直頭可以做新一代旅遊大使，無論去到邊都咁nice。本報讀者何先生日前透過本報「爆相爆片」，親身見證發哥親民嘅一面。任職的士司機嘅何先生話嗰朝早喺西貢北潭路，本身諗住出返去市中心，點知喺途中見到發哥企喺路中心截的士，原來發哥當時係幫三個遊客截的士，佢哋嘅目的地係東壩，之不過因為路途遙遠，行入去差唔多要三個鐘頭，所以發哥知道之後幫佢哋手截車。
何先生仲話：「發哥當時好nice咁同我影相，仲拉咗我去車頭影，佢話咁樣先可以影埋架的士同車牌，之後啲乘客仲話好好彩，咁都俾佢哋撞到發哥。」之後《蘋果》向發哥了解，但係佢話唔回應喇！真係夠晒低調！
來源 source: http://hkm.appledaily.com
|
鍾意就快D Share啦！
|
|
|