愈老愈有型，遇上有發揮可令劇集起死回生的奸角， 57歲吳岱融一鋪翻生。
探熱針
三級夫妻 鍾淑慧孭起頭家死忍爛蒲老公 吳岱融靠姦翻身
昔日敗走大台的吳岱融，憑住《巨輪 II》高天鷲一角，奸到引起觀眾、高登巴打高度關注，順勢同大台簽下一紙六年合約，吐氣揚眉回歸。
當年和他情侶檔拍三級片的老婆鍾淑慧，近年專注照顧吳岱融兩仔爺，少有參與幕前演出，只是偶然登台、出活動。隱身多時，週一（ 17/10）下午四時，鍾淑慧單拖現身中環，一身全黑打扮，保養得宜，沒有半點師奶除，點睇都不似五十有二。
吳岱融事業再上高峰，兩公婆的獨子吳政樺亦長大成人，入伍當兵。今日的幸福畫面，全靠鍾淑慧當年忍得住老公爛蒲爛玩更不時闖禍，她一個咬緊牙關，跑勻中國登台養起成頭家。
冇師奶味
《巨輪 II》今個星期大結局，死咬住養女 DaDa（陳凱琳飾）不放的高天鷲，有何下場，好快有答案。吳岱融憑住這個角色，獲觀眾、網友激讚「一個高天鷲救起整套劇」，沒想到連在新加坡定居的鍾淑慧，都專程返香港陪老公睇大結局。
週一（十七日）下午四時，神隱十年的鍾淑慧，由中環一幢商業大廈離開，素顏的她，眼鏡、口罩上齊全副裝備，依然可以一眼認出，今年五十有二， keep得好好。
只見一身全黑打扮，沒有半點師奶味的鍾淑慧，急步行落港鐵站，搭荃灣線過海。近放工時間，港鐵車廂人頭湧湧，鍾淑慧全程做低頭族傳短訊，避開同途人有眼神接觸。
途中轉線到九龍塘站落車，鍾淑慧 keep住摩打腳，目標明確行去又一城 Taste超級市場，不夠十分鐘，便捧住兩袋生命麵包離開，之後行落商場落客區，從一名中年男子手上接過自己於兩年前已買落的車，上車踩油離開。
一「婦」當關
近年吳岱融於國內吃得開，一年兩劇走唔甩，鍾淑慧疊埋心水相夫教子，幾乎絕跡幕前，只偶然接登台、商演，賺快錢。
「 Lily（鍾淑慧）喺內地跑場跑咗十幾年，識落一班舊客，就算冇拍戲咁多年，都 keep住有人搵佢做嘢。所以佢一直肯俾時間心機 keep住自己唔走樣！」一名與鍾淑慧有合作的人說。
一個女人仔跑勻全中國登台、商演，全因老公吳岱融拍完露雀三級片後，加上撞正盜版港片黑暗期，有段時間長期冇工開，當時囝囝只得幾歲，鍾淑慧決定自己一「婦」當關，擔起頭家。
大漢圍毆
其時只有三十多歲的吳岱融就算冇收入，爛玩依舊，加上有型有款女人緣旺，兩公婆終日吵大鑊。
○一年，吳岱融在油麻地地踎夜總會消遣，酒後被多名大漢圍毆至爆缸，上埋港聞頭版。事後鍾淑慧形容同丈夫關係是「一條死路」，「我依家唔知自己應該點，但我絕對唔會係開聲叫人走嗰個，我做唔出。」鍾淑慧於訪問說。
帶埋囝囝搬走
事發後兩個月，有指鍾淑慧因無法忍受老公爛蒲無影，帶同兒子搬離西貢住所，定居廣州，當時，鍾淑慧隻字不提吳岱融，也拒絕回答兩人是否已辦離婚手續。
至於繼續地獄黑仔王的吳岱融，同大台簽了一年部頭合約，只拍了一套從來冇出過街的《蕭十一郎》後，亦隨着醉酒惹事，被大台再次棄用。直至近年轉戰內地拍劇，加上年紀大逐漸修心養性，為頭家仆心仆命，死忍多年的鍾淑慧應該可以鬆一口氣。
搏到盡
已經五十二歲的鍾淑慧， 87年「環球小姐選拔賽」冠軍，其後簽約無綫主持《 K-100》及客串劇集，星途平平；至於年屆五十七歲仍保養得宜的吳岱融， 87年由新加坡來港簽約無綫，受大台力捧一劇接一劇，拍過《絕代雙驕》、《邊城浪子》等代表作，後來因吳岱融私自去亞視宣傳個人唱片，得罪公司被雪藏，之後更遭無綫解約。
之後兩人決定放手一搏，情侶檔拍三級片，一齊合作有《滅門慘案之孽殺》及《替天行道之殺兄》，戲中兩人剝到盡埋身肉搏，鍾淑慧之後更在《弱殺》中露盡三點。
鍾淑慧與吳岱融 92年合作《人鬼狐》撻着， 95年，二人結婚並誕下兒子，多年來屢傳婚變，更一度出現第三者。
鍾淑慧想復出
問：老婆有冇睇《巨輪 II》，有乜嘢意見？
吳：有睇，佢有睇，佢話 OK，好入戲，佢有 follow up，一路都有俾意見，讚賞多。
問：老婆有冇戲癮想復出？
吳：想㗎，如果有機會，我諗佢想出嚟㗎，但要睇吓撞唔撞啱，如果有我諗佢有興趣。
問：會唔會夫妻檔再拍戲？
吳：冇壞嘅，冇話夫妻唔夫妻嘅，睇吓製作組會唔會搵你做呢件事。
問：我哋見到鍾淑慧仲 keep得好靚喎？
吳：（得戚樣）哈哈！ OK嘅，佢有個咁好嘅老公，佢老婆梗係好靚
問：囝囝會唔會入行？
吳：佢服緊兵役，佢對呢行有冇興趣我唔知，但如果佢想我都支持嘅。
脫星一代男
九十年代，香港三級色情片大行其道，除了有大批知名女星剝衫拍戲外，亦有好多男星加入脫星行列，時至今日，唔少脫男仲堅守前線。
吳啟華
91年，與「波霸」葉子楣合演《玉蒲團之偷情寶鑑》，曾創下最賣座的三級片紀錄。事後吳啟華聲稱當年曾想過拒拍，不過一旦毀約要賠二千萬，事後更一度想退出娛樂圈； 94年，再與翁虹合作，拍三級片《滿清十大酷刑》，兩戲票房都好收得。
撰文、攝影、攝錄：娛樂組
|
鍾意就快D Share啦！
|
|
|