歌手鄭欣宜的處女演唱會請來天后容祖兒任表演嘉賓，在Encore時，祖兒於台中升上台，以金長裙示人的祖兒掀起全晚高潮。向來大頭蝦的祖兒，唱唱吓突然俯身在台上執回耳環，並笑說：「跌咗耳環添。」唱罷即與欣宜擁抱，二人更來個深情咀嘴，十分激烈！祖兒說：「首先恭喜你今晚順利舉行，我不下數次同佢通WhatsApp，佢喊住同我講好驚、好擔心，我知個唱令佢好大壓力。」隨即憶述認識欣宜經過，祖兒說：「我同佢認識係好多年前去溫哥華做騷，欣宜跟住肥姐（沈殿霞），嗰時佢喺嗰度讀書同住，好難得見到個肥妹仔超級有自信，Oh my god！喺後台未見到個人已經聽到佢把聲，我覺得佢好搞笑。」
祖兒話欣宜似自己
祖兒亦大讚欣宜非常孝順，她說：「佢畀我好深印象就係當時肥姐坐輪椅，佢好乖安置好晒肥姐上機，即係好似我囉，呢樣嘢唔需要謙虛同要承認，同埋有一樣嘢好似我，唔知大家覺唔覺得我同欣宜，都係嗰種觀眾第一下望落去，尤其是男觀眾，會吞口水嗰啲女人，通常都係反白眼，我好早就知呢樣嘢，我同自己講既然做唔到嗰種類型，我就要做你哋聽到我把聲，你哋就會喜歡嘅類型。」即獲全場拍掌鼓勵！祖兒續說：「呢幾年見到欣宜好努力，除咗磅數係有數字上嘅飄忽之外，佢努力尋求音樂路向，同唱好佢嘅歌，觀眾慢慢睇到佢嘅努力。」
笑祖兒緊張過自己
祖兒提到首次做個人騷，全場觀眾都是用耳聽，她說：「所有人都合埋眼睇，聽聲就得架啦，但係經過多年努力，觀眾發現佢哋眼睛係雪亮，如果今晚八號風球咪聽晚嚟囉！」欣宜透露祖兒原定做昨晚頭場嘉賓，由於受颱風影響變為今晚嘉賓，欣宜說：「佢真係好好，佢緊張過我哋，親自聯絡工作人員，如果打風點算？都會照樣嚟。」隨即表示母親曾跟她說要學祖兒努力工作及唱好歌，欣宜說：「我覺得我未做到，但係你真係好好嘅榜樣，你可以喺我生命出現真係好開心。」
笑欣宜大
祖兒直指兩人有同一特質就是有頑強生命力，祖兒說：「無論人哋點講，我哋都同自己講係我哋做得未夠好，可以做好啲，直到大家覺得夠好入嚟睇騷，希望佢好好享受大家畀嘅掌聲，快啲有個更大型場地畀佢發展做個大騷。」當祖兒表示要走時，欣宜即要求說：「唔好呀，我真係你歌迷，我可唔可以膽粗粗要求唱多一首歌，當送畀我聽吖。」由於欣宜穿上印有自己歌詞的衫，抵死的祖兒即望住對方胸口說：「好大呀，我唔識畀反應。」欣宜更為祖兒伴舞。
自嘲脾氣大兼零記性
欣宜答謝一眾主辦單位、唱片公司及幕後工作人員時，特別大讚好友許廷鏗，她說：「佢係一個講真話嘅人，我唔鍾意聽嘅嘢佢都會講，之前仲陪我去加拿大。」當唱到最後一首歌時，欣宜淚流滿面說：「我知道自己唔係特別好，脾氣大又零記性，成日不斷問人令人擔心，以為自己一個人可以應付到，唔放手畀人搞，最終搞到好麻煩。今次呢個騷睇到大家好錫我，我知道我唔係孤單，唔係得自己一個人，所以好多謝大家。」欣宜全晚更一共喊足九次！
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|