難得唔使開工，郭晉安都會幫輕老婆，負責去接阿仔放學。
探熱針
郭晉安 7千萬物業 歐倩怡第三胎照冇嘢過手
郭晉安在新劇《致命復活》激減二十磅，扮野人生吞蛇同青蛙，搏晒老命目的就係想搏攞第四次視帝。
不過原來安仔已經中了獎，最近發現他老婆歐倩怡肚凸凸，行路又掗吓掗吓，孕味極濃，個肚大到似佗住五個月身紀。
不過，結婚十年追生到第三個小朋友，郭晉安對老婆都係採取唔過錢政策，他搵埋搵埋現在共持有五個物業，市值約七千萬，全部都冇落歐倩怡名，淨係 12年買了架價值五十多萬寶馬，用了歐倩怡個名做登記。
肚凸凸湊女
郭晉安同歐倩怡結婚十年，已經生了一仔一女，但最近有消息指歐倩怡又再有喜，已經佗住五個月 BB，早兩星期就發現肚凸凸的歐倩怡帶住女兒郭以雅（ Blair）到西貢公園玩。
當日歐倩怡著住一條深藍色貼身裙，好明顯見到個肚好凸出，加上她行路姿勢掗吓掗吓孕味十足，由於冇工人跟身，她要孭住自己個手袋之餘，仲要幫阿女孭埋個布袋，之後她帶了阿女去公園玩，從後幫阿女搖韆鞦，由於粗身大細容易攰關係，她陪阿女玩了一陣，就要坐埋一邊休息，由得 Blair自己繼續玩。
星期一（ 21/11），問到郭晉安有關老婆大肚一事，他仍然否認。
壹：我哋早排見到你太太喺西貢帶住小朋友，咁發覺佢原來好似大咗肚，想恭喜吓你！係咪有計劃㗎？
郭：冇！（係意外？）唔係，係冇大肚！
壹：我哋見佢好似真係有咗，諗住恭喜吓你之嘛！
郭：唔係！唔係！冇咁嘅事！
壹：咁有冇計劃生多個？
郭：暫時未有！
壹：差唔多時候喎，個囡囡又開始生性。
郭：未呀！未有！有我會通知嘅，多謝關心！
戒口唔食雪糕
玩了大半個小時，歐倩怡同阿女離開公園，其間 Blair要食雪糕，歐倩怡都有買俾阿女食，但她自己就一啖都冇食過，大肚婆需要忍口，唔食生冷嘢是常識吧！
由於近期郭晉安要拍《老表，畢業了》，所以湊小朋友的重任落在歐倩怡身上，因為阿仔郭令山同阿女讀唔同學校，所以每日一早歐倩怡就要做司機接送兩個小朋友返學，到放學接晒小朋友後，又要去超市買餸，家中大小事全部由她一腳踢。
代替老婆做司機
不過，只要郭晉安唔使開工，他都會幫手湊小朋友，好似上星期三（十一月十六日）他難得唔使開工拍劇，可以頂替老婆做司機接囝囝放學，兩父子十足餅印一樣，他們手拖手之餘，郭晉安更幫阿仔攞住個大型樂器，認真廿四孝老豆。
結婚十年，郭晉安同歐倩怡都表現恩愛，歐倩怡更全面退出娛樂圈，專心相夫教子，又有幫手打理老公有份投資的美容同保健成藥生意，但全部都係得個做字。
原來郭晉安多年來搵埋唔少，又經常有投資物業，目前他手頭上已有五個物業，除了他們所住的匡湖居單位是在婚前（○五年）買入，其餘物業全部都是在婚後購入，但所有業權都沒有落歐倩怡個名，市值約七千萬物業只有他一人持有。
終於有車揸手
「其實安仔唔係唔錫 Cindy（歐倩怡），不過佢家姐一直都好反對佢將啲物業落埋老婆名，慌死個老婆會吞佢份身家咁，咁安仔又好聽佢家姐話，所以咁多年嚟物業同公司股份都冇加過老婆個名。」歐倩怡身邊人說。
之但係歐倩怡又唔係乜都冇收過，一二年郭晉安就買了一架價值五十多萬寶馬俾老婆代步用，更破例用歐倩怡做車主登記，認真
難得。
財政獨立
圈中不少夫妻婚後齋講心，堅持財政獨立，物業全部唔過對方手。
蒙嘉慧
當年同邵美琪拍拖，鄭伊健部分物業已加對方名，二人分手後，伊健全數轉贈邵美琪作補償，自此吸取教訓。 13年，同蒙嘉慧拉埋天窗，伊健名下物業全部冇老婆份。早前，慶祝結婚三周年，鄭伊健終於豪番次，豪擲 80萬買架 Tesla俾蒙嘉慧。
撰文、攝影、攝錄：娛樂組
|
鍾意就快D Share啦！
|
|
|