點樣演繹喊嗰種層次？今次真係要向龔嘉欣學嘢喇！
以前聽就聽得多，啲人演喊戲又要滴眼藥水又剩，不過，依家仲有呢支歌仔唱咩？依家演喊戲同唱歌一樣，假喊定咪嘴觀眾一睇就知！就好似無綫熱播劇《幕後玩家》中嘅龔嘉欣，苦等咗9年，終於一喊上位獲得激讚！
N場喊戲
網民之所以咁Buy龔嘉欣嘅喊戲，其實唔係單純佢流嗰一、兩滴眼水，而係嗰種有高潮起伏，層次分明嘅演技！喺劇中做賢妻嘅佢，喊咗無數次，當中包括畀劉佩玥挑機激動喊、向張繼聰訴苦喊、嫲嫲慘死喺醫院喊仲有喺靈堂啲淚水啷吓啷吓咁喊…而當中最打動人心嘅一次相信係尋日畀老公黃宗澤（Bosco）飛起嗰幕！
搭緊飛機哭不出聲
正所謂「一啖砂糖一啖 ＿」，Bosco喺個飛機艙咀完龔嘉欣，龔嘉欣勁冧豬以為可以雨過天青，但點知Bosco要享齊人之福，話要照顧小三劉佩玥同個BB喎！喺呢個Moment，龔嘉欣開始變臉入戲，表現出嗰種無奈想喊但又要強忍淚水嘅感受，話晒都搭緊飛機，嘈親人唔係幾好嘛！
再受刺激要忍手
不過Bosco唔單止接受離婚，仲竟然講咗句：「其實我真係好想你留喺我身邊…如果你接受Emma…」叫個正印接受個小三？龔嘉欣已經由零眼水喊到淚崩，突然激動出手想摑Bosco不過又要忍住！最後只好掩嘴痛哭攬住個女，世界都彷彿剩下佢哋兩母女相依為命咁！
有晒起承轉合
其實，大家可以設身處地咁諗吓，係咪都試過想喊但又唔想畀人見到同聽到嘅經歷？龔嘉欣就好似咁，唔係齋哽咽，齋嚎哭，所以話呢，依家喊戲唔係淨係睇對眼有冇通紅，而係要成個過程都要有起承轉合㗎！
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
來源 source: http://hk.on.cc
|
鍾意就快D Share啦！
|
|
|