11月 19日羅霖出席品牌活動，問到梅小青是否加了戲份給她？羅霖直認：「小青姐好錫我，話如果我時間多啲，拍到嘅集數又多啲！」
娛樂偵訊
新劇谷湯碗胸 羅霖人工奀過廿年前
現年 51歲的羅霖，憑凍齡外表加 34C身材再搏殺娛圈，出完噴血寫真集，稍後又返大台拍新劇《深宮計》大騷湯碗胸，大台向來出手低，羅霖騷錢竟然奀過二十年前，不過一千蚊一騷的她並無異議，原來力邀她回巢的監製梅小青，以戲份補償，講明每集加戲份，女配角變二線，跟女二陳煒睇齊。
騷錢一千
當年因佗 B得罪高層曾勵珍，被迫在長命劇《真情》「慘死」，羅霖一直未有機會再返大台，相隔廿三年，由剛返無綫穩坐第二山頭的金牌監製梅小青拉線，在她頭炮金裝劇《深宮計》演出。
新劇明年二月正式埋位，孭正女一的劉心悠跟胡定欣早前開始試造型，在劇中飾演宮廷服飾部阿頭的羅霖，旅行充電後亦排隊埋位。
「 Candy今次返去拍劇唔係為錢，佢同無綫簽嘅係普通藝員約，冇底薪，一個騷都係一千蚊左右，講出嚟可能冇人信，比起以前拍《真情》，佢份人工仲要奀好多，當時佢係無綫親生女，有底薪，開工時間穩定，拍到佢同黃智賢嗰段感情戲時，仲試過一星期開足七日工，爆晒騷。所以平均計，佢當時有成二千蚊一個騷，叫做高人工。不過咁，今時今日 Candy都唔志在啲騷錢，事關佢做緊洋酒生意，又出美容產品，好多瓣數賺錢。」知情者說。
簽祖藍拍電影
回復單身，羅霖去年書展推出噴血寫真，早前又簽約王祖藍經理人公司，有意發展內地市場，十分積極。
「其實 Candy不嬲都鍾意做戲，不過以前戀愛大過天，掛住拍拖，結婚之後又要照顧三個兒子，前夫又唔係咁支持，佢先放棄。但依家識諗咗，事業放喺第一位，加上祖藍又係自己友（基督徒），好清楚佢嘅要求，咪再試吓擺時間睇吓有冇得發展，簽咗兩年，除咗返內地，都會拍電影。」知情者說。
拍劉心悠做女二
有機會拍宮廷劇，羅霖擺明要戲份唔要錢，據了解，監製梅小青亦十分識做，將會靜靜哋加重她的戲份：「本來佢個角色戲份唔多，主力都係騷身材，不過因為人工唔高，小青姐私底下同 Candy斟好，每集都會加佢少少戲份，同埋加重佢條線嘅古仔，依家佢個角色會拍住心悠，好多發揮。陳煒係第二女主角，但 Candy戲份同佢一樣多，之前出記者會，佢企喺心悠隔籬，陳煒反而企喺側邊。不過接得呢部劇，大家都冇諗過賺錢，好似 Chrissie（周秀娜），佢客串八集就更加少錢，但話晒呢部係佢响香港第一部電視劇，製作認真反而最緊要。」知情者說。
賣肉深宮計
梅小青回巢大作之一的《深宮計》，賣點並不在三生三旦，真正「戲肉」乃劇中一班女人，包括外援羅霖、周秀娜及主角陳煒等，全部要倒模范冰冰在內地劇《武媚娘》造型，以性感谷胸宮廷服吸睛。
其實鞏俐主演的電影《滿城盡帶黃金甲》，才是真正大賣事業線古裝劇始祖，贏票房又搶到話題。
同人唔同命
羅霖 23年後回歸大台拍劇，人工少過廿年前拍《真情》，並非人人同等待遇，近期有唔少舊人回巢幫手打仗，好似林文龍、宣萱、馬仔等，人工冇跌反升添！
林文龍
早前夥宣萱回巢拍杜之克揸旗新劇《不懂撒嬌的女人》，據知文龍身價是三萬一集，完成 28集劇就袋走 84萬，難怪他自爆人工是以前幾倍。
宣萱
宣萱拍完《不懂撒嬌的女人》後，又再接拍《使徒行者 2》，有指密食宣萱一集收兩萬五。
馬浚偉
一度是曾勵珍愛將的馬仔，近年多在內地開工，明年一月將以男一身份埋位拍《深宮計》，人工兩萬一集走唔甩。
羅琳隱瞞有餡激嬲高層
羅霖今鋪返大台助陣，幫小青姐拍《深宮計》，順勢爆響口話當年因為得罪高層，搞到無緣現身《真情》結局。 96年羅霖在《真情》飾演「雙雙」，同「阿海」黃智賢的一段情搶到唔少收視，高層本來打算食住個勢發展，但羅霖卻急剎停，以「移民」為由向高層請假。當時有指她與男友劉坤銘情海翻波，棄事業飛加拿大箍煲。在歡送 party，羅霖說：「監製也說過如果我要回來，隨時可以返回《真情》。」
羅霖其後被爆當日急離《真情》是發現有餡，要急飛加國跟劉坤銘秘密結婚。有指珍姐不滿被騙，事後將「雙雙」在《真情》尾聲現身一幕刪走。
撰文、攝影、攝錄：娛樂組
|
鍾意就快D Share啦！
|
|
|