又到聖誕！霍啟剛、郭晶晶一家三口週一起程去美國過聖誕。
名人動態
服侍國寶晶晶 霍啟剛拎心心奶粉袋
富二代圈子中，霍英東長孫霍啟剛都算最貼地！娶到個國寶老婆郭晶晶，霍家頭號繼承人就算做阿四，都冇所謂。聖誕節就快到，霍啟剛兩公婆趁住假期，帶埋囝囝霍中曦（ Lawrence），一家三口飛去美國度假。
冇工人冇助手同行，推完一車行李去 check in，之後霍啟剛仲幫晶晶拎埋個奶粉袋，粗重工夫，做晒！
親力親為
本週一（十二月十九日），霍啟剛一家三口現身機場，準備出發美國之旅。行程足足十日，兩大一小加上要帶備厚衫，霍啟剛一個人推住四個大喼，前面孭個袋，後面再加一個背囊。
老公三頭六臂，國寶晶晶就負責照顧寶貝仔中曦，輕輕鬆鬆！
出埠唔帶工人，郭晶晶霍啟剛事事親力親為。晶晶全程拖住囝囝行，三歲的 Lawrence戴住公仔 cap帽，沿途扎扎跳，又不停撩媽咪傾偈，好精靈！
之前傳大肚的晶晶，身形明顯發福，著住短裙加 leggings再襯長 boots的她，是日一改樸素，罕有地孭住個八萬蚊才有交易的黑色 Hermes Kelly。
去到 check in櫃位，霍啟剛自動自覺辦理登機手續，落手搬行李過磅；讓媽咪拖住的 Lawrence，開始等到不耐煩，扭計要抱。
分開入閘
為了安撫兒子，晶晶打開 BB車，但囝囝唔肯坐定定，不停周身郁，之後還一手除低 cap帽丟落地。
之後晶晶發現記者拍照，立即拉低 BB車冚，免得兒子入鏡；但好奇心十足的 Lawrence卻不停探頭四圍望，搞到晶晶冇晒符。
辦好登機手續後，霍啟剛兩公婆刻意前後腳分開入閘。其時，晶晶將手上的淡粉紅色心心奶粉袋交到老公手上，自己就拖住 Lawrence先行。
雖然四喼行李已寄艙，但入閘時，霍啟剛依然左一袋、右一袋再後面一袋，廿四孝老公！
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|