名人動態
換走男神 C君 Bingo隊長冧爆林作：佢似柯南加王祖藍！
再見亦是朋友，十優港姐麥明詩跟林作分手，上週她 25歲搞 party，前度亦被邀齊齊慶祝。沒有另一半，林作日前跟新人女子組合 Bingo拍旅遊宣傳短片，全程盡情發揮雄性本色，搞到隊長 Carman（關嘉敏）冧爆笑唔停，還將他與自己心中男神 C君相比：「佢（林作）個樣似柯南加王祖藍。」
自薦拍 MV
上週三（十二月十四日），林作在澳門拍旅遊宣傳片，午飯空檔期間，他接受訪問：「唔辛苦，好 hea，做幾個表情，講吓對白，最緊要記到唔好阻人收工，我做到令大家可以早收工。」
感情告一段落，林作收心養性，早前到倫敦進修一個月法律課程，至於會否繼拍宣傳片後拍戲，當事人坦言冇人會對他有興趣。「如果真係有，會再睇吓，但純粹玩票性質，冇咩熱誠。」
提到今次拍宣傳片跟女子組合 Bingo合作，他顯得眉飛色舞。
「好正！尤其隊長，好有潛質。（何以見得？）睇到就睇到！各方面由外到內強烈推薦，其他成員都好好。」
宣傳短片的故事講述飾演二世祖的林作，力追扮演 OL的 Bingo隊長 Carman，二人在戲中亦有一些身體接觸，但只是係咁意，林作表示若要再進一步，他亦可以接受。
「無任歡迎我咁講可能無恥咗少少，但冇所謂，都係拍嘢玩吓啫！我之前喺頒獎禮見過佢哋（ Bingo），跳得好 pro，啲女仔幾靚女幾叻。（有冇考慮過搵佢哋教你跳舞？）跳舞我真係唔識，佢哋之前搵咗 C君做 MV男主角，隊長（ Carman）已經應承下次搵我，唔知佢哋經理人會唔會食言。」林作說。
係心儀對象
被林作大讚， Bingo隊長 Carman原來亦好欣賞對方。「佢（林作）好風趣幽默，有場戲講佢跌倒要我扶，佢將其中一句對白『使唔使幫你 call白車』改成『使唔使人工呼吸』，最後我真係俾佢洗腦，講咗人工呼吸，好搞笑！我好鍾意識搞笑嘅人，所以男神係（農夫） C君，我覺得佢（林作）啲幽默感同 C君有得比，但佢個樣就似柯南（漫畫人物）同王祖藍，好得意，我都有同佢講過。」 Carman說。
林作有條件， Carman大方承認對方是自己杯茶，但二人是否有發展機會？
「都有，我揀男仔係幽默感行先！可能，有一日佢令我笑到喊，就會感動到我。」 Carman說。
撰文、攝影、攝錄：娛樂組
|
鍾意就快D Share啦！
|
|
|