李漫芬同老公肉緊咀嘴10秒，Sweet到爆！
藝人李漫芬（Fanny）與圈外男友談成坤拉埋天窗，今日晚上於尖沙咀廷開23圍宴請賓客。夫婦二人於五點半見傳媒，新郎以白色禮服亮相，女主角Fanny則穿上婚紗谷三吋事業線示人，他們更應記者要求咀嘴10秒，女方主動攬實老公，相當肉緊。
感覺亡父喺度
Fanny接受訪問說：「心情好緊張呀，個心卜卜跳，呢個台上過嚟好多次做司儀，今次做主角心情好唔同。（有冇喊？）今朝喊到豬頭炳咁，尋晚上頭已經喊，因為同Daddy（亡父）講嘢而喊到收唔到聲，搞到媽咪又一齊喊，不過好感動。」Fanny講到亡父又眼濕濕，問喊了幾多升眼淚？她說：「每個姊妹都兩包紙巾！今朝一跪低斟茶又喊，雖然眼見媽咪一個，但感覺到Daddy都喺度，之前Daddy臨終時侯，都叫佢唔好咁快走，因為仲未斟茶畀佢，點知第二日就移民咗去天堂喇！」
零用得20蚊
老公談成坤接受訪問，講到擔任司儀的Fanny出名牙尖嘴利，問有否馭妻術？他說：「佢平時唔係咁㗎！」Fanny搶答說：「係口齒伶俐，我有教老公講嘢，之前佢拎唱K神器練演講，練咗70幾次，驚失禮呀！（今朝有講愛的宣言？）我會鑲起佢！佢應承每日零用得20蚊（港元）！（計劃生B？）個心仲係15、16，有長輩叫我生，亦有單身朋友話冇小朋友好自由，我哋冇家庭壓力，兄弟姊妹都有小朋友喇，隨緣囉！」而老公即場請教記者生仔秘方，獲賜招學「倒樹蔥」，認真搞笑。
曾住90呎劏房
問Fanny婚後會否做全職太太？她說：「唔會，都會繼續做嘢，因為要養家，依家就冇咁大壓力，有個鍾意嘅人喺屋企等自己，食白粥都開心！自己之前環境唔係太好，一個女仔住90呎劏房，但依家有人分擔。覺得老公係Daddy帶畀我嘅，之前係Daddy負責換燈膽，老公之前上嚟換，覺得係Daddy帶住佢嚟。」
來源 source: http://hk.on.cc
|
鍾意就快D Share啦！
|
|
|
