媽呀～我望唔到落去喇！！！
香港小姐向來「美貌與智慧並重」，入得圍嘅質素自然有番咁上下，好似「民選港姐」朱千雪、「咪神」林泳淘同「宅男女神」湯洛雯等，個個Package都咁掂，要放低靚女包袱拍劇都唔易，不過有人就大膽就唔介意，扮其貌不揚嘅鄉下妹，憑醜樣闖出一片天！
亂髮油臉爆牙肉
前晚播出嘅無綫劇集《迷》，曾參選港姐嘅31歲劉思希終於登場，平日佢多數飾演富家小姐，着得靚一靚，今次竟然形象大反轉，做爆牙醜女「肖小紅」，合埋把口仲呃得吓人，一開口就突晒啲牙肉出嚟勁肉酸，嚇到人個心離一離！呢位「牙肉妹」造型方面亦娘到爆，鮮黃色小背心、銀色珠片衫統統着上身，加上一頭亂髮同油臉，由頭醜到落腳指尾，視覺上勁大衝擊，連網友都忍唔住講句：「好難頂喎！」
同金剛一夜情
做「牙肉妹」已經好大犧牲，劉思希仲要扮鄉下妹，講嘢好重鄉音，好似將「香港」講成「鄉港」，難怪一開口就笑料百出，最爆嘅係劇中佢竟然同金剛有過一夜情，之後仲會發展戀情𠻹，搞到一班網友都話要晚晚煲劇，仲話好期待佢哋演出一夜情個幕，認真重口味！
網友「讚」好醜
入行近六年嘅劉思希終於憑「牙肉妹」上位，成功引起話題，唔少網友都話佢個角色真心好醜好核突，睇得出佢真係用心去演醜女，完全博到盡唔理形象咁話。有網友仲話「牙肉妹」同由湯盈盈飾演嘅經典醜女「李笑好」有得揮，雖然兩個角色都其貌不揚，但演得夠放又搞笑，反而愈醜愈多人Like𠻹，睇嚟劉思希有望做新一代醜女喎！
網民有話兒：
XXshidaDXX：爆牙又成面油，個造型仲要勁娘，好難頂！
DavXXXsu：係差在啲口音，發音同咬字都太正，唔多似鄉下妹。
XXXmencha：醜樣程度同李笑好有得揮！
X成：你變咗好多，開始越（愈）來越（愈）喜歡你，加油！
來源 source: http://hk.on.cc
|
鍾意就快D Share啦！
|
|
|
