大台娛樂主播李漫芬（Fanny）今日結婚，與游泳教練談成坤(Alvin)喺尖沙咀朗庭酒店延開23席，陳煒、Kawaii做姊妹，米雪、傅嘉莉、陳庭欣、譚凱琪等到賀。Fanny無名指戴住閃亮鑽戒，穿上性感婚紗接受訪問，並應記者要求又攬又錫，錫完一輪新郎哥笑笑口話﹕「有口水喎。」Fanny回敬﹕「鼻水嚟嘅。」Fanny直言緊張到心肝卜卜跳，話由噚晚上頭開始喊到今朝接新娘都未停過，佢話﹕「我最錫父母，爸爸有病時，我叫佢『唔好咁快走，仲未斟茶畀你』，佢答我『好』，可惜第二日就移民咗去天堂，今朝斟茶feel到爸爸喺旁邊。」Fanny透露婚後仍然會繼續工作，她坦言一直好想有個家，佢話﹕「以前換燈泡都係靠自己，依家知道有錫自己嘅人喺屋企，白粥都ok，我最辛苦嘅時候，一個人住90呎劏房，幾辛苦都捱過。」Fanny揚言每日只會畀20蚊老公使，但可以碌卡，而Alvin就話唔怕老婆牙尖嘴利。問到幾時生小朋友？Fanny話﹕「我都15、16，長輩叫我生，單身朋友就話生仔好困身，自己一半半，有就開心，順其自然。」而陳煒就自爆係第一次做姊妹，佢解釋﹕「Fanny係我入TVB第一個訪問我嘅主持，佢叫我嚟飲，我就自薦做姊妹。90年代好少明星藝人結婚，冇乜機會，今日見識到大妗姐、接新娘呢啲傳統中國禮節。(有幾多開門利是？)好大叠好似扇咁，但唔知幾多。」
| 攝影：仇志德 | | |
| | | |
| | | |
|
鍾意就快D Share啦！
|
|
|
