知道係賭王個仔即搵番護照
猷君斥香港航空揀客不負責任
又一次關公災難！賭王何鴻燊公子何猷君大前晚跟生意拍檔搭香港航空抵上海，拍檔不慎遺留護照在機艙，猷君多次致電航空公司求助，在機場呆等7小時瞓通宵都冇消息，最後有職員認出他是賭王兒子，十分鐘後火速尋獲護照。猷君怒轟港航：「唔係我係何生個仔，就即刻搵到。」昨港航以「本少」嘻笑回應，猷君譏諷：「我向你們道歉，不該使用你們的服務！」
猷君前晚在微博貼瞓機場相，留言指搭香港航空飛上海，拍檔將護照留在機艙內，致電港航求助無果。
現年22歲的何猷君是賭王何鴻燊和四房梁安琪的兒子，在麻省理工學院畢業後現於上海創業，前晚猷君在微博貼瞓浦東機場相，留言指大前晚跟拍檔坐香港航空抵上海，惟拍檔護照留在飛機上無法入境，多次求助港航都愛答不理：「態度極其差，因是經濟艙？我們不得不在機場的座椅上等了一夜，直到機場某位管理人員認出我，護照十分鐘之內找到了！可悲，致每一個不被公平對待的我們！」
猷君更貼圖證明由凌晨1時至翌早8時，多次致電港航的紀錄，最後因為他的賭王兒子身份才解決問題，留言狠批：「我確定香港航空，在我心裏變為了一家勢力的服務商。」前晚猷君在電話表示：「航空公司話幫我哋搵，搵完話畀我知。搵咗又好，冇搵又好，佢哋都冇同番邊境人員、過關保安局班人講。」
猷君（圖）陪拍檔在機場等通宵，只冚羽絨保暖。微博圖片
猷君拍檔。微博圖片
猷君直言與拍檔的事業剛起步，沒理由要坐頭等艙。
四太認同待客平等
結果等到早上7時15分才收到電話，猷君說：「佢哋話搵唔到passport，我同朋友都嬲，搵唔到又唔講，至少我同朋友可以住酒店。我問佢哋可唔可以搵多次，佢哋支吾以對，好似唔係咁想搵。跟住7點半有人返工，有個香港航空女仔認得我，叫人快啲搵，『佢係何生個仔』，十分鐘後即刻搵到，我咪覺得有問題，應該係一視同仁，唔係我係何生個仔，就即刻搵到。」
事件經本報披露後，立法局議員楊岳橋在《蘋果》facebook給like，網友力讚猷君坐經濟客位夠貼地，猷君昨說：「我係一個創業者，出嚟做嘢未賺到錢，冇理由同拍檔公幹要坐business、頭等，唔應該要考慮我屋企喺社會上身份。我希望無論搭飛機坐邊個class，佢哋都係要幫乘客解決問題。」而四太對兒子被讚表示：「我唔會表揚佢，不過都認同所有服務行業，應該要對客人有平等對待。」
猷君是賭王和四房梁安琪的兒子，網友讚他坐經濟客位夠貼地。
CoCo心痛男友猷君要瞓機場等通宵。互聯網圖片
除了坐經濟位，去年6月猷君更搭港鐵。
港航以「本少」回應
袁紫僑（CoCo）昨在電話力撐男友猷君：「我梗係撐，佢一直自己創業，成日坐經濟客位，咁啱今次發生呢件事，佢都有同我講。佢冇乜嘢，只係覺有少少不公平，嗰邊呢個做法令佢哋等咁耐，正常人都難接受，冇得返屋企，喺機場7個幾鐘。」問以後會否再搭港航？CoCo說：「睇吓佢哋點處理，自己以前都坐過呢間航空公司，覺得佢哋服務都幾好。」
港航昨在官方微博以「本少」自稱，以嘻笑態度回應：「經過搜尋，終於在60E座位前方seat pocket的雜誌裏面找到一本美國護照，淚目！藏的這麼深，本少的同事去玩密室逃脫應該可以百試百通關了。」猷君在微博譏諷港航回應強勢：「對於別人的不幸，還可以有這樣的工夫去調侃。香港航空做事做人的態度，了然於紙上。無需道歉，我向你們道歉。不該使用你們的服務。」港航昨回覆本報：「對本次事件為相關乘客帶來不便深表遺憾，本公司對於有需要的乘客已提供盡可能的協助。」
採訪：唐如、皓騫
|
鍾意就快D Share啦！
|
|
|