40年前香港經濟環境欠佳，但大劉做風扇廠卻賺大錢，當年20幾歲仔竟然喺銀行現金存款已超過一億，真是超越常人。到08年金融海嘯，大部份人都輸身家嘅時候，大劉反而賺咗約4、500億，但係大劉竟然話：「我絕對唔係一個成功嘅富豪。」大劉嘅從商之路經歷過不同高低起跌，自言並唔係「打得」，亦都「怕輸」，不過佢話：「一個人食得鹹魚抵得渴。」【「狙擊手」有跡可尋】
24歲時連出院5,000蚊都冇，當時嘅心情大劉仍然好記得：「嗰種憤怒你唔會明！」同時亦造就大劉「出手狠」嘅性格，佢話：「雖然今日我哋唔會郁手殺人、放火，但當時心態係邊個擋住就殺邊個。」40年前做風扇廠已經充滿膽識，大劉憶述：「我買咗40幾萬呎廠房，而當時最大風扇廠都係用緊6萬呎廠房，我夠膽買4、50萬呎都事小，投資機器先係天文數字，用咗3、400萬成本開間工廠，總投資超過2億幾。」除咗投資金額龐大，當時工人數量亦極具規模，大劉表示：「已經係38、9年嘅事，高峰期工人約有萬幾人，佔當時香港勞工人口1.67%係好厲害。當時買嘉慧園都係3、40萬一層，投資咁大冇回頭路一定要去，有好多人有咁嘅諗法，未必有咁嘅膽色，你仲要把握到重點，唔易呀！我因為喺前線，乜都親力親為係好緊要。」【果斷斬纜：個個衝住我嚟做】
「出手狠」令當年大劉嘅風扇廠一年賺幾億，更是全港惟一一間廠房有美國安全資格，所以訂單接不停，大劉稱：「當年個美國客幫我買咗24萬把風扇，係我嘅救命恩人，但喺美國嚟講，唔算係最大嘅客。」雖然對方唔係大客，不過呢張單為風扇廠建立口碑，帶來更多生意：「其他大客慕名而來，個個俾單我哋，當時我哋做一把風扇大約係27蚊美金成本，賣俾客就129.95美金，零售價就賣299.95美金，佢哋真係賺到咪咪嘴偷笑」既然風扇廠賺大錢，點解後來大劉會結束生意，轉投地產、金融業呢？大劉解釋：「大概做咗6、7年左右，由每年幾億純利，到後期跌到得番2、3%純利，咁我係讀數出身，計下啲機器耗損程度，我又成年冇返過公司就更加擔心。呢個利潤不值得長守，個個又衝住我嚟做，知道我哋搵到錢，我合指一算，當時總供應量香港同台灣加埋係美國市場需求嘅幾十倍，咁你話係咪死梗呀！」做生意除咗要「狠」，仲要目光長遠，所以大劉果斷決定：「咁我即刻落Order，一支螺絲批都唔俾再買，買嚟都係報銷，所以我拿拿聲唔做，嗰時啲機器用咗咁多年，賣去印尼仲可以賣咗幾千萬。」【慘痛教訓：食得鹹魚抵得渴】
其實喺結束風扇廠前，大劉已經有染指金融業，特別係外國債券，而且當時上落贏錢注碼係5,000萬到1億美金，投資如此狠，難道大劉唔怕一鋪清袋？大劉笑言：「我點會唔怕輸啫！你估我打得呀！不過一個人食得鹹魚抵得渴，去賭場賭錢都唔會包贏，贏錢全憑自己經驗判斷！」雖然一直都係長勝將軍，不過大劉喺投資方面都經歷過慘痛教訓。96年底大劉以超過36億元高價將娛樂行賣俾希慎，但97金融風暴令佢輸咗200億，賣娛樂行賺返嚟嘅錢一鋪輸清。大劉憶述：「華置當時原本賺咗40幾億，金融風暴後冇晒，仲倒輸30幾億，來回唔見咗成80億，而我私人輸咗百幾億。當時嚟講係好多錢，輸得好甘，最慘好多係俾朋友累，依家費事講咪成座娛樂行賣咗得番嚟啲錢輸晒囉！但又唔會唔掂！」慘痛教訓唔止一次，不過最緊要有轉機：「以前做廠都經歷過好多高低潮，初初做廠都賺咗好多錢，我就試去做地產。曾經有一塊地皮同政府拍賣出嚟，用咗2億幾銀。」後來因為當時港人害怕咗97，令大劉大失預算：「只有賣家冇買家！我塊地估值得番500萬，真係擔心！自己做廠最得戚時，好似一起身就俾人扑落嚟，當時求神拜佛，啲廠訂單俾多一年或最好兩年，但唔夠年半已經賺回之前輸晒嘅錢！」大劉話：「贏錢憑自己經驗判斷」，到08年發生環球金融海嘯，當大部份人都輸身家時，大劉反而賺咗約4、500億，佢解釋：「有時唔係我哋叻，係有少少運氣，雷曼爆煲前我急流勇退，套現咗好多錢。爆煲後我哋大肆出擊投資好大，好似買外國銀行債券，每隻都買4、5億美金甚至10億美金咁買，大大話話真係贏咗有400幾億。」【處世之道：心中富有咪得囉】
今年《福布斯》公佈香港十大富豪，大劉排名第4位，被指財富達1,200億港元，但有說佢今年為免有人爭產，將身家分予長子鳴煒及太太甘比，二人合共分得超過1,500億，遠超《福布斯》所指的1,200億，大劉有否覺得財富被低估？佢回應：「我唔敢評論呢啲嘢，因為無論我係與唔係都會俾人鬧；我亦相信香港德高望重嘅富豪，更加識收藏自己，唔會趷個頭出嚟俾人知佢有幾多財富。所以我絕對相信頭嗰20個身家係俾人低估咗，雖然我心中知邊個最有錢，但我真係唔方便講，因為呢啲係好敏感。」講到財富，大劉自言：「我絕對唔係一個成功嘅富豪。」隨住年紀漸大，心境亦有所轉變。大劉表示：「以前冇錢出院時充滿仇恨，好多嘢好進取，東征北伐，但今日嚟講健康最重要，健康唔好隨時瓜老襯。中國人有句說話『健康係最大財富』，真係啱嘅，俾你賺幾多嘅錢，但如果過兩日就拜拜，咁又有乜意思？」經歷過順、逆境，大劉總結出自己嘅處世之道：「錢有機會就搵，但唔需要刻意，都已經夠食夠着，已經好夠，唔需要去爭做第幾富豪，我要引述好多人講『我心中富有咪得囉！』」
統籌、採訪：陳月媚
攝影：陳俊強
攝錄：NEO、馮嘉銘、吉吉【劉鑾雄講大劉（1）】
獨家 千億富豪劉鑾雄 24歲問家傭借錢入院割膽
http://bit.ly/2ngVqNq
【劉鑾雄講大劉（2）】
走過三輪水貨 「風扇劉」血淚史：唔夠半年已經冇錢出糧
http://bit.ly/2obalOj
【劉鑾雄講大劉（3）】
遭猶太人出賣 大劉：我係廢柴中嘅廢柴，懵炳中嘅懵炳！
http://bit.ly/2mPTGzh
【劉鑾雄講大劉（4）】家道中落 老父開廠俾人呃晒 大劉10歲前冇床瞓
http://bit.ly/2nr56WG
【劉鑾雄講大劉（5）】大劉親剖與父關係：初則口角，繼而動武
http://bit.ly/2on7WQC
【劉鑾雄講大劉（6）】聘福臨門廚師為家廚 大劉狠批昔日飯堂：依家唔啱胃口！
http://bit.ly/2oLevsv
【劉鑾雄講大劉（7）】保鑣變毛巾黨 大劉驚握手：啲男人小完便唔洗手！
http://bit.ly/2oBDr69
【劉鑾雄講大劉（8）】渣甸山大業主帶鎚仔收樓：扑爛咗，再做過！
http://bit.ly/2nzVt76
【劉鑾雄講大劉（9）】大劉鬧廢青：叫佢咪去旅行？仲慘過殺佢老竇老母！
http://bit.ly/2oBFA51【話你知】同大劉有關係嘅名人、美女有幾多? 即睇「大劉人物關係圖」: http://bit.ly/JosephLau
|
鍾意就快D Share啦！
|
|
|