豪語錄
公平咩？ 歐鎧淳
世間滿目瘡痍，惟歐鎧淳無塵無玷。
連童星都堅持化妝才肯出鏡，她素顏、濕身依然零死角；競技場上人人臉容扭曲，她在衝線一刻仍是如花似玉。生於中產家庭，自小讀名校。曾三次參加奧運，是多項香港游泳紀錄的保持者。最重要是青春無敵—雖然對職業泳手來說，廿五歲已開到荼䕷，但誰會懷疑歐鎧淳退役後的出路？除了她自己。「呢一切，都係游水俾我嘅。離開咗游水，其實就咩都唔係。我好清楚，一直都知。」
里約奧運後，歐鎧淳無處不在，硬照廣告、雜誌封面、品牌活動，都見她的身影。行外人不知她仍然每日練水四、五小時，「到而家啲人都仲係話：吓，你仲有游呀？」奧運開幕禮，她代表香港持旗進場，驚鴻一瞥，中港網民發現新大陸，「大家睇嗰三十秒，就轉移咗視線去另一邊。可能我嘅成績又唔係話咁超卓、唔係世界冠軍。所以大家會覺得，佢都係得個樣。」「女仔就會有呢個問題，外貌同能力有個掛鈎。你靚啲，可能就冇咁叻；你叻，可能就冇咁靚啦。如果你兩樣都有，個天就好唔公平啦。」
這世界當然沒有公平，歐鎧淳惟有在運動競技中，追尋她心裡的平等。
30秒
音容宛在的 689講過：「體育界對經濟冇貢獻。」歐鎧淳打趣說：「唔係吖，我對自己嘅收入有貢獻，叫做幾好。」搭地鐵，笑靨如花的淳 BB向你兜售洗髮水、護膚品；上 facebook，見到她與一眾網絡紅人齊齊推銷銀行服務；在 YouTube，張敬軒主打歌的 MV女主角，又係歐鎧淳。「（收入）比運動員嘅津貼的確係多。但我好清楚，呢啲係一時，可能我成世女得一次機會。我好好彩，係被選中嘅幸運兒。」
且回到去年奧運前的七月，香港代表團舉行授旗典禮，霍震霆跟歐鎧淳說：「我個仔揀咗你做持旗手喎，你有無信心㗎？」她以為是在典禮上頒贈錦旗，隨口答道：「好呀。」霍啟剛確係幾有眼光，「揀我，係因為我係三屆奧運選手。平日訓練之餘，亦有做運動相關嘅推廣，例如青年奧運大使。」
村民唔係咁諗。總有人認為她是因為外形而雀屏中選，歐鎧淳扁嘴兼皺眉：「每屆奧運都有靚仔靚女。係咪每次揀中靚仔靚女，都唔使理佢嘅能力？市民知道嘅話，都鬧到傻」「我九歲已經開始訓練。多年來，俾咗好多心血去游水。有冇可能係我由細到大、一路編排到二○一六年，就係為咗做三十秒嘅持旗手？」
鎂光燈
人不知而不慍，可是歐鎧淳有排都未到不惑之齡。鎂光燈的用處，她倒是很清楚，「其實呢三十秒帶俾我嘅好多。我感激有過呢件事，係因為……佢令我可以用運動員嘅身份，去好多唔同嘅地方、做好多其他人覺得運動員唔會做嘅事。」「變相令大家知道，運動喺香港唔係末路。其他運動員見到，都覺得自己有可能做得到、鼓勵到更多人。」
美人魚本是野生物種，習慣被路人捕獲乎？「前排會多啲，剪咗呢個蔭之後，啲人都唔係好認得啦。都係照樣篤魚蛋。哈！完全冇儀態可言。」路人善忘，狗仔隊卻眼利得多。歐鎧淳被拍到與現任男友、《點五步》的棒球手胡子彤街頭吻別，連帶把舊男友的前傳一併抽出，「的確會唔慣……不過都冇嘅， life goes on。」「又唔係有啲咩唔見得光嘅嘢。就算有人認得我、跟我，都冇需要避。」「但師兄師姐話，你可能都要避忌啲……盡量囉，調整吓。」
0.23秒
關於歐鎧淳轉戰幕前之說，其實也非空穴來風。她在即將上畫的《春嬌救志明》過鏡十秒，但堅持下個目標是一八年亞運，而非娛樂圈，「本身我講話一六年游完就退休。」奧運上水一刻，記者向她求證，她口快快答到：「好開心！係呀。諗住完咗呢件事，就順理成章、好圓滿。」當晚泳隊師姐施幸余問她：「你真係唔游嗱？」她又動搖：「你叫我即刻唔再落水、唔去泳池，好似爭啲嘢……但反悔已經嚟唔切，新聞已經出晒。」
安徒生筆下的美人魚為愛情而上岸，歐鎧淳當然不是，但少女的心意一般難以觸摸：「係悶囉。本身游水唔係一項好有趣嘅運動。唔係雙人、冇互動、重重複複一個動作。」「時間耐咗，自然有呢個諗法。我都好老實同教練講，我可以繼續練習，但唔想渾渾噩噩咁繼續出糧。唔應該係咁嘅態度。」教練總是哄她還有進步空間：「其實佢好似呃緊我咁。某程度上教練都擔當住呢個角色。你唔信自己時，佢係咪都話，你係得嘅。我傻傻哋嘅又繼續去練。」
其實歐鎧淳差點就與里約奧運失諸交臂。為爭取入場券，她自一五年起不斷參賽，但距離 A標（奧運資格）總差一點點。最接近的一次，她在一百米背泳游出 1分 00秒 48，與 A標只差 0.23秒。後來港隊憑女子 4× 100米混合泳，擠上奧運的尾班車，才有往後的歷史，「個人項目達唔到 A標，我自己好淡然。我真係用晒所有時間去訓練，每一個比賽都搏到 120%，已經唔止係盡力。」
歐鎧淳在○八、一二年奧運都有個人項目入圍。但世上永遠有人比你更努力、更有天分，「係嘅。競技運動，就係同其他人去比較，而且同世界級泳手去爭。」「啱啱見到美國大學聯賽嘅成績真係好快，一百米嘅紀錄又推前兩秒。但未到下一個比賽，我都唔會縮。」「喺亞洲，我都仲可以爭排名。至少努力咗亞運先。」
異鄉
為應付○八年奧運，歐鎧淳在會考前休學一年，到深圳受訓。以為可以擺脫每日放學、飛的去練水、回家還要做功課的港孩生活，誰知地獄在北方，「首先係訓練量加多咗成倍，每日游萬幾米，一開始直頭跟唔到。而家諗番，都覺得嗰陣嘅自己好犀利。」肉身疲累事小，失去自由事大，「冇電腦、唔可以同爸媽聯絡，軍訓式嘅生活。六點起身練青蛙跳、食飯、游水、跟住又食飯。夜晚六點睇新聞聯播、唱軍歌，跟住瞓覺，日日如是。」「唱歌都算了，睇新聞聯播最辛苦，嗰半個鐘就咁坐喺度。電視嘅唯一功用就係睇新聞聯播，好嚴重。」
跟她一起接受「國民教育」的，是無數窮家小孩，「佢哋幾歲就被人踢入嚟。屋企環境唔好，希望仔女有日做到全國冠軍，就係脫貧嘅工具。」「我係嗰種你逼我、我就唔想做嘅人。但當時嘅目標好清晰，就係要去我人生第一次奧運會，冇必要跟自己作對。」泳池最多池中物，比她游得更快的，都只能載浮載沉，「喺香港做運動員係好幸福嘅事。嗰邊太多人爭了，可以去到奧運嘅，（每個項目）只得兩個。」
競爭激烈，在美國亦然。歐鎧淳後來獲加州大學柏克萊分校取錄，會考後直接去彼邦升學、受訓。但對她來說，那是另一個荒島，「簡單嚟講，去到大陸，你嘅身份比較特殊，但美國就唔係。我由香港第一，跌到中下游，教練又唔係好睇我哋啦。」後來在柏克萊對史丹福的比賽中，歐鎧淳勝出。上水後，教練拋下一句：「 Oh， so you can swim。」
鬼妹隊友講美國的肥皂劇，她搭不上嘴，童年回憶一片空白。就連衣著打扮都格格不入，「譬如我而家咁著，佢哋都會話：嘩，你著得咁奇怪，好 Asian呀。」美國人不著衫乎？「佢哋都係淨色、鬆鬆哋、好自然咁囉。」即係 pair，「哈哈，係呀，好 pair。」「其實四年來都冇適應過。諗番轉頭，都係鍾意香港多啲。我係一個不折不扣嘅港女。」
港女
港女是怎樣鍊成的？看歐鎧淳便知，「以前成日俾媽咪湊住，過到去美國，以為甩繩馬騮好自由，但全部嘢都搞唔掂。」歐太至今每逢週末，仍會陪伴女兒練水，自己在池邊玩「 Candy Crush」，「爭取親子時間嘛。」難得女兒受落，「游水呢個項目，家長係好 involved。」
有次奧運後，歐鎧淳休息，去日本觀戰。混在隊友的家長之中，她感到氣氛有異，「我係運動員，知道用咩方法令自己平靜，要以平常心態先可以有好成績。佢哋老遠飛過來，又冇嘢可以做到，坐喺看台上仲擔心過你，嗰種感覺好強烈。」 Auntie們你一言我一語，就算只是鼓勵說話，都足以令氣壓急升，「嗰吓我真係覺得……媽咪，呢幾年你都辛苦了。」
撰文：蔡慧敏
攝影：葉志明
攝錄：羅錦波
|
鍾意就快D Share啦！
|
|
|