何雁詩唔係小三鄭俊弘認錯！
鄭俊弘（Fred）與何雁詩被本報踢爆秘密撻着，但事情峰迴路轉，Fred再被爆原來一腳踏兩船，收埋富貴未婚妻Beebs，令何雁詩慘成第三者！偷食一事曝光後，Fred一直潛水，相隔19個小時後，昨晚終於蒲頭作交代，表示雖曾向Beebs求婚，但對方不接受，又否認一腳踏兩船，與Beebs分手亦與何雁詩無關。至於何雁詩在Fred潛水期間有回覆記者，處處維護對方，又謂將來的事甚麼都有可能。
歌手鄭俊弘與何雁詩（Stephanie）被本報踢爆暗撻數月，其實二人拍拖本是正常事，但現實竟然比電視劇情更峰迴路轉，Fred被指原來一腳踏兩船，已有一個拍拖三年的富貴未婚妻Beebs，令何雁詩蒙上小三之名，消息令人震驚！據消息指Beebs於今年2月發覺Fred開始冷淡，其時正是Fred與何雁詩合作合唱歌，之後到3月底，Fred有一晚遲了很多返家，Beebs翌日發現Uber單據，問男方點解，他自辯是送何雁詩回家，令她起疑，過了幾天二人再次爭執，Beebs更搶了電話，發現全是Fred與何雁詩通電紀錄，質問下有人承認鍾意何雁詩，自此二人決裂。
偷食一事爆出後，事件男主角Fred一直潛水，沒有聽記者電話，沒有回答任何提問，潛水19小時後，昨晚約7時半終於蒲頭，在同事及家姐陪同下返回唱片公司接受無綫娛樂新聞台訪問，並獲唱片公司CEO何哲圖及兩位職員護駕。面露疲態的Fred見到記者時還笑笑口。
自認需要反省
近一小時後，Fred在經理人及何哲圖護送下離開公司，影相時亦有微笑，神態自若。問到現時可要作出交代？他說：「好多謝呢段感情（指與Beebs），已經低調處理咗，係有求婚，想維持感情但（對方）冇接受，依家已經了結，希望繼續工作。」問到分手可與何雁詩有關？他講了兩次「絕對不是」，問到何時分手？他說：「過咗去。（點解對方要爆料？）佢有自己處理方法。」講到被未婚妻質問時曾承認喜歡何雁詩，他即避談：「過去唔講。（係咪想追佢？）唔會講。（係咪想發展？）想整理自己先。」問到剛才接受無綫訪問時可有悔意？聞言他即愕然，之後說：「覺得自己要反省，處理感情方面要反省。（有冇喊？）呢啲自己收埋，頭先叫自己要堅強啲，多謝公司同家人嘅支持，令我感受到愛。」問到此事可會影響他與何雁詩的關係？他謂絕對不會，提到有傳何雁詩有情緒病，問可擔心此事令其病情加重？他說：「經過呢件事，佢好支持同鼓勵我。」講到有網友封他為「賤男」，他說：「唔理咁多，最緊要自己情緒OK。」他一再強調與Beebs已分開一段時間，並否認曾一腳踏兩船及有影情慾照，最後由職員護駕下離開。
而昨晚10時播出Fred的訪問內容約6分鐘，Fred全程聲線抖震，坦承有向Beebs求婚：「想關係去到某個地方可以再好啲，所以衝動咗去做，但佢唔想同我結婚同組織家庭。」他承認自己在此事上處理得不好，坦言已跟前度沒有聯絡，又自認有很多缺陷：「要再學習點樣（同人）保持關係，自己有錯，一定承擔，今次上咗好大嘅課，所以會努力反省。」他澄清何雁詩非第三者，又指令她受到不必要的煩擾感不好意思。期間他講到前度Beebs時態度較冷淡，但講何雁詩時明顯略為激動。
口風一轉再轉
至於Fred潛水期間，何雁詩則有應對記者提問。她透過電話覆了兩次，前晚凌晨首次受訪時表示自己並非第三者，跟Fred只是朋友，又表示不知對方有未婚妻，但仍維護及信任對方：「佢係一個好人，希望大家畀啲空間佢。（唔開心？）我覺得佢為人正直、有責任感，佢會交代清楚。」第二次受訪時，她的聲音沙啞，她解釋是因剛睡醒，問到捲入第三者風波會否覺得很慘？她表示不慘，亦不會因此跟Fred疏遠，直言二人仍有聯絡，並力撐說：「同佢做咗咁多年朋友，相信佢為人咪維護佢囉！其實人哋辛苦咗咁多年先有咁嘅成績，唔希望一單新聞而影響咗佢十幾年嘅努力，唔值得囉！畀啲時間佢，佢都需要時間消化吓！」日前二人被影到拍拖時，當時何雁詩含春甜笑默認戀情：「你哋覺得係咪係囉！」但偷食事件爆出後，她即改口謂只是朋友，又指自己並非小三。昨日她亦在Instagram上載個人照，表示是時候寫歌及變得堅強，更hashtag「清者自清」及「行得正企得正」，獲不少好友力撐，她隨後在Facebook發文「多謝大家關心！」至於Fred現身後何雁詩再次受訪，表示多謝對方澄清，問會否接受對方追求？她又再轉口風：「佢真係追我先算，將來嘅事咩都有可能。」
文：音樂組
|
鍾意就快D Share啦！
|
|
|