對於女友買過億豪宅，有指李澤楷以短訊回應：「 Have a good evening!」，未有否認。
名人動態
手揸過億豪宅 李澤楷女友郭嘉文 兩週前約滿大台走人
15年港姐季軍郭嘉文被揭去年與身家 350億「筍盤之最」李澤楷密遊日本後，不單減少幕前演出，愈見心廣體胖的她，上月底再升呢，一炮過購入位於九龍塘逾億逸瓏天池屋豪宅。有指配合男友低調作風，郭嘉文兩星期前約滿大台亦決定走人，淡出娛圈。
減少演出
現年廿四歲的郭嘉文出身小康，跟父母同住馬鞍山私樓，城大畢業主修工商管理的她，參選港姐踏足娛樂圈，一六年初與李澤楷交往初期，郭嘉文生活繼續平民化，買平價衫及搭巴士，不過卻逐漸減少幕前演出。
「 Karmen最初做《東張西望》外景主持，監製都會派佢去記者會訪問自己啲同事，到俾人影到同李澤楷去日本旅行，佢好多活動都唔出席，之後索性只做關於社會民生嘅時事訪問，盡量少接觸娛樂圈人。」知情者說。
簽八年長約
據了解，郭嘉文一五年獲選港姐季軍後，跟大台簽了八年長命約，月薪萬多元，聽話的她隨即被派演出電視劇《廉政行動 2016》，成為同屆最快拍劇港姐。不過爆出跟小小超拍拖，她提出改為一年一騷合約，即沒有底薪，有權揀工作。
上月底再爆由李澤楷愛將盈大地產副主席及行政總裁李智康代簽臨時買賣合約，她跳級成為過億九龍塘豪宅主人消息後，不知是否要校啱時間，原來郭嘉文於兩週前亦剛好同大台約滿，至今雙方未再傾合作。
有車有司機
「呢大半年， Karmen只做《東張》，開工唔算密，可能成個人 relax咗，外形愈來愈富泰。今個新年一班港姐約埋去樂小姐（樂易玲）屋企團拜，佢都有份，有幾個玩得特別開心，劈酒劈到醉晒， Karmen好體貼，因為樂小姐屋企附近叫車唔容易，佢有車有司機，就順便送啲女仔返屋企。」知情者說。
跟李澤楷年紀相差二十六年，向來鍾愛成熟男的郭嘉文，不單不排除會閃婚，更公開大讚對方「好 gentleman，好 friendly」，人前人後都表現得好冧：「 Karmen雖然只係二字出頭，但處事成熟，唔似一般港女有公主病，最欣賞有思想嘅男人，佢話 Richard轉數快人又叻，教咗佢好多嘢，所以就算年紀相差一大截，兩個都溝通得好好。」身邊人透露。
衣錦還鄉
據了解，二人關係漸趨穩定，郭嘉文父母回鄉探親時都忍唔住自爆女兒跟城中富豪拍拖一事。
「其實 Karmen父母舊年返內地探親，都喺親友面前講咗嗰女同李澤楷拍拖，嗰女有個咁威嘅男朋友，難怪佢哋咁開心嘅。」知情者說。
飛上枝頭變鳳凰
娛圈女人想飛黃騰達，除咗靠自己雙手打拼，捷徑是得富豪寵倖，飛上枝頭變鳳凰，與出身成天與地的對比。
甘比成女首富
在單親家庭長大，住沙田公屋的甘比， 98年入報館當娛記時月薪只有萬多元，及後因工作邂逅大劉，即辭工入大劉旗下的廣生行打骰。與大劉的紅顏呂麗君爭鬥多年， 08年及 12年為大劉分別誕下一女一子後，母憑兒女貴在大劉心目中地位有增冇減。
近年甘比悉心照料身體欠佳的大劉，成功擊退攞埋博士的呂麗君。擁 25億身家的甘比，年初又獲贈市值 180億元的 THE ONE商場，及華置重組，甘比再獲華置 50.02%股份，身家暴漲至 500多億，當上本港女首富。換腎後生猛番的大劉，亦於年初同甘比結婚。甘比正式坐正做劉太，成鳳凰路的終極。
梁洛施無憂米
在郭嘉文之前，梁洛施亦是李澤楷一手打造的鳳凰神話。出身澳門單親清貧家庭的她，中學就輟學當 model賺錢，之後跟英皇簽下長約賣身契並獲力捧。
07年她在前輩好友楊紫瓊介紹下，認識首富之子李澤楷，兩人一見鍾情，李澤楷更幫梁洛施向英皇解約，全面私有化。 09年及 10年梁洛施為他分別誕下三子，第二胎為雙胞胎。雖然 11年二人分手，但貴為小小超的三子之母，現長居加拿大的梁洛施生活無憂。
撰文、攝影、攝錄：娛樂組
|
鍾意就快D Share啦！
|
|
|