抗抑鬱自強 47歲李綺虹轉行做精神科護士 [壹週刊 - 1413] __,李綺虹,M1,

李綺虹：「照顧小朋友病人，我會緊張到唔敢去食飯。怕接我更嘅同事交帶得唔夠仔細。所以呢一年做到好攰，太上心。」探熱針抗抑鬱自強　47歲李綺虹轉行做精神科 ...

李綺虹：「照顧小朋友病人，我會緊張到唔敢去食飯。怕接我更嘅同事交帶得唔夠仔細。所以呢一年做到好攰，太上心。」

探熱針

抗抑鬱自強　 47歲李綺虹轉行做精神科護士

現年 47歲的李綺虹， 94年港姐季軍，憑傻大姐形象在演藝事業一帆風順， 97年香港娛圈進入寒冬期，事業受影響的她，連帶情緒指數亦向下滑患上抑鬱症。

婚後索性移居加拿大，間中回港拍戲的李綺虹， 13年拍完楊采妮執導的電影《聖誕玫瑰》，便絕跡香港。

闊別四年，原來李綺虹在加拿大報讀護士課程，畢業後在 Royal Inland Hospital任職護士，她說：「我 15年畢業，做咗兩年護士。」走過地獄的白衣天使，李綺虹以過來人撫慰同路人。

日做十二粒鐘

四十七歲才轉行，毅力來自了結從家人而起的心願。○一年李綺虹患過抑鬱，要苦難不枉過，那裡跌倒，就在那裡爬番起身。「入行前，我喺大學讀心理學，因為媽咪喺我十三歲時患上抑鬱，之後我又試過，所以一直對呢方面都好奇，亦覺得有意思。」當日當選港姐，無計劃入娛圈，然後在人生下半場找到自己方向。「我覺得好似人生兜咗個圈，先返回初衷，我想入嘅一行。」兩年護士生涯，李綺虹咁形容：「一日工作十二小時，但我返工好開心。呢一年我負責兒科嘅精神科，個部門好細，得三張床，好多時唔爆，我就去急症或老人嘅精神科幫手。見到啲病人，覺得我當日九個月嘅抑鬱只係好輕微，佢哋比我辛苦好多，值得幫佢哋。」

13年她報讀護士課程， 15年畢業即到醫院工作，她說之後會攻讀碩士。

李綺虹工作的醫院 Royal Inland Hospital，位於加拿大 BC省甘露市，只有二百個床位，屬細規模公立醫院。據了解，在當地任初級醫護，時薪約加幣 31元（約港幣 180元）。

其實佢哋幫緊我

提到一個又惡、又不讓人接近的患口腔癌及精神病露宿者病人，李綺虹心裡有一團火。她憑一份率真，把精神病人的心牆打破。「佢好難相處，我成日諗點樣可以幫到佢。我會將止痛藥溝落咖啡度氹佢飲。佢入院一個月，但雙手依然好污糟，起晒皮兼手指長期屈埋，有晚我趁佢醒咗同佢講：『可唔可以俾我幫吓你，我想用啲 cream幫你搽吓隻手，為你按吓。』點知佢點頭。嗰刻我覺得自己好犀利，做到護士嘅愛心。但之後再諗深一層，以為自己幫緊人，其實係佢幫緊我明白對任何人、包括身邊嗰個，俾佢一個細微嘅關心，可能勝過為佢做一件大事。就好似嗰位病人，佢可能最需要，只係坐喺佢旁邊陪住佢，唔使講任何嘢。」

同家人返港探親，兩公婆帶住十二歲囝囝李志德去迪士尼玩。玩到攰，率性的她唔理藝人身份，同家人坐地下開餐。

10年返港幫大台拍劇《老公萬歲》，已為人母，唔介意同謝天華拍嘴戲。

13年客串《北京遇上西雅圖》，演醫生，現實她已成為專業護士。

藝人光環成妙藥

李綺虹算是香港最早一批北上賺人仔的藝人，她曾經跟當時紅爆中、港、台的林志穎及蘇有朋合作電視劇《絕代雙驕》。

藝人的光環，更令她成為醫院 Teenage病人的妙藥。「有時年輕病人唔易俾你接觸，我會分享做演員嘅經歷，令佢哋放開啲（戒備心）。不過通常都係同事踢爆我做過演員，仲上網搵埋我啲相俾佢哋睇。」歲月神偷，一直在觀眾心目中的甜姐兒，今日臉上已留下一條又一條的細摺皺紋，像印證她由燦爛星途、抑鬱病、精神科護士……人生一段又一段的經歷。

不會退出幕前

見李綺虹全情投入護士工作，順理成章問一句：「係咪退出唔拍戲？」她碌大雙眼，反應極大：「 No……我永遠唔會話退出，只係年紀大咗，加上我為家庭，返加拿大定居，咁自自然少咗人搵你。就算搵我返嚟拍微電影，但最後考慮要出機票俾我飛返嚟，又要租酒店，最後都冇。」

九七年香港一場金融風暴，百業蕭條，電影工業萎縮，出道即嘗蓬勃滋味的李綺虹，亦由高峰向下滑，○一年決定跟老公 Corey執包袱返加拿大定居。「當時又唔係冇辦法嘅，有人建議我去北京或上海住，方便繼續搵食，但我唔係咁鍾意，雖然我喺呢行做得好開心，但個趨向愈嚟愈唔啱我性格。」

96年電影《金枝玉葉 2》起用的都是當年炙手可熱藝人，李綺虹（右一）是其中一位，跟張國榮、梅艷芳巨星合作。

李綺虹是同屆最快跑出拍劇的港姐，第一部《阿 SIR早晨》，便有機會跟天王黎明做情侶，一劇即紅。

94年港姐質素高，入圍五強的包括有後來居上的視后張可頤（右二），以及古天樂前度黃𨥈瑩。

嗰啲 worry唔係真

七年前她在訪問時曾透露當日因面對環境變化，擔心經濟壓力，而導致抑鬱，今日李綺虹懂得退後看清局面。對於是否有過財困，她說：「其實冇試過！當日我返加拿大，經濟完全唔差，拍內地劇，我係酬勞收得最高嗰個，有樓有車，真係最高峰，但諗咗負面方向，怕啲嘢冇晒會點呢？你嘅 worry係辛苦過你嘅現況，件事未發生就擔心。呢個就係導致抑鬱原因，因為嗰啲 worry唔一定係真。其實生活發生緊咩，未必對抑鬱有影響，反而係你點諗，先至係問題。」

李綺虹喜歡做運動，當年馬拉松未成潮流前，她已經玩三項鐵人賽，型到爆！

囝囝今年十二歲，向來喜歡研究航空知識，李綺虹今次帶埋他來探訪香港航空青年團做交流。

囝囝遺傳她的運動細胞，在加拿大，兩母子經常做戶外活動，除踩單車、也愛游水滑雪。

25年情婚姻有風浪

李綺虹一入行，身邊的男人就是現時老公 Corey，當紅後依然高調拍拖。為了他，當年杜絕唔少富二代追求。 25年情，李綺虹說婚姻經過多次風浪。「好多，到今時今日都仲有，試過去到拍枱搵律師。好多次係佢挽救番，尤其我有抑鬱時，佢好痴情，冇放棄我。」自小擔起頭家的她，也因婚後擔子繼續落在其身上，成為夫妻最大的磨擦。「 Yes！我係搵錢多過男人，頭家主力我孭。見到一啲朋友個老公負責養家，有時係會羨慕。不過自從我去學打坐，睇得開咗，發覺好多問題其實係出於我點睇，唔係對方。我老公都去學打坐。」

約會小環

譚小環跟李綺虹屬同屆港姐，一直保持聯絡，李綺虹兩年前回港拍戲，也幫襯過小環第一間小食店，不過當時她不在鋪頭，二人未有見面。今次李綺虹回港，又有約見面，小環說：「我當時喺台灣，之後佢又忙，大家都未見到面，希望佢下次返嚟留耐啲，唔好得兩星期咁短。」至於李綺虹轉行做護士，譚小環說並不意外：「佢之前喺 FB話讀護理課程，原來轉做護士。」

一個轉行　一個入行

今次專訪，陪住李綺虹身邊，唔係囝囝，而係當年做過她助手的親表妹 Stella。

李綺虹華麗轉身，投身醫護。表妹 Stella（周沂），走入樂壇。表姐讚她才華橫溢：「佢啲音樂好聽㗎！」 10年參加 Cash流行歌曲大賽，演繹自己填詞的《第五季》奪冠。音樂有主見，花了七年時間再磨利把刀，物色強班底，今年自資出唱片。主打歌，是她從黑洞爬出來的心聲，也是表姐的寫照。 Stella的理想，唔係幕前。「我終極目標係唱片監製。」

撰文、攝影、攝錄：娛樂組

場地提供及髮型： Kenrick Siu@ Fifth Salon

來源 source: http://hk.next.nextmedia.com

鍾意就快D Share啦！

下一篇 》