王衞屋企有 16個廁所，做佢工人真慘，有排洗。
中環人語
王衞 16廁大宅「白金級」
上期《壹》仔發現順豐老闆王衞嘅九龍塘大宅，有十六個廁所，水為財，唔知係咪風水布局？老友話大宅外觀好有 Frank Lloyd Wright風格，呢位被譽為「最偉大的美國建築師」，曾起過美國嘅落水山莊（ fallingwater），又係被譽為「最偉大的建築物」。
其實王衞間喇沙利道大宅，設計來自 Original Vision公司，佢哋設計部總監係 Ken Leung，並非鬼佬。間公司專接東南亞生意，以香港和泰國為業務中心。佢哋以獨立屋建築同豪宅設計最出名，其中淺水灣道 56號、清水灣 Casa Bosques、同筲箕灣 Green Tower嘅概念，正正出自佢哋手筆。
講到王衞間屋就巴閉囉！佢哋公司介紹，係以定向同集中手法，納入周圍街景，彰顯其顯著的街角位置，而臥室強調清晰同簡潔。大宅設計同時考慮環保，喺「能源消耗」、「用水」及「創新與革新」等環節，都達到「白金」級數。睇番啲室內模擬圖，用上咖啡木色，又有大量落地玻璃採自然光，而外形就好似一個「方盒」打斜放喺平台，夠過癮也！
家長為馬化騰仔女瘋狂
騰訊老闆馬化騰早已經係新香港人，近排加拿大國際學校班家長，聽到馬化騰對仔女入咗紙申請入學，仲興奮過校長即刻周圍唱，唉，呢個世界附旺不附衰，明白嘅。之不過有條口痕友一盆冷水潑落班闊太度，謂：「可能 German Swiss收佢，到時就唔入加拿大國際」咁又係，攀到上 German Swiss（山頂德瑞國際學校）同影帝張家輝個女做同學卡士又唔同啲。
慶回歸廣告有辱國體
超人李係首富，佢間鋪頭長江集團又係股市冧巴溫，兩者皆為香港嘅象徵。
長江集團推出慶回歸優惠，俾有回鄉證嘅人半價入住旗下內地酒店，應不乏捧場客。但係個廣告則搞到烏厘單刀，認真失禮。回鄉證上「慶回歸」三隻字用正體字寫已經唔啱規矩，所用之漢語拼音 HING WUI GWAI（而非 QING HUI GUI）更加係不知所謂，甚至有辱國體。
幫得超人李間大寶號做嘢亦得加多兩錢肉緊乎？認真啲得唔得吖，阿哥？
肖建華賣身家
自從年三十晚喺四季酒店「被失蹤」後，金融巨鱷肖建華大大話話有近半年無晒消息。佢手頭有大量銀行、保險股份，以及一批香港殼股。最近 market就流出咗一份出售名單，係肖建華手頭嘅資產要變賣，其中主要係內地嘅證券行同銀行，咪話唔珍貴！收到呢張 list嘅金融老闆話，每一個項目通通無價錢，有興趣就埋枱傾。咁肖建華仲喺內地協助調查，點樣越洋指揮？有人就暗示，批貨係肖建華一班幫手揸庄嘅頭馬私自掟出嚟，印證咗「最信任嘅人會出賣你」嘅江湖大道理！
|
鍾意就快D Share啦！
|
|
|