同富商老公何祖光結婚17年嘅溫碧霞，早排突然婚變兼分居4個月，好彩最後和好如初，佢仲語重心長講咗句：「原來愛已經成為了我的習慣。」世上最遙遠嘅距離，係大家瞓埋一齊，都唔知對方有幾愛自己。識得今天憶當初，我只愛你一個嘅話，有咩係解決唔到？
結婚17年 猛火變死火
我Nuts哥同好多識佢哋嘅朋友一聽到婚變都嚇親，皆因佢老公係愛妻號，畀好多自由，溫碧霞等於冇腳雀仔一樣咁Freestyle，去蒲去玩幾多點返歸都冇問題，識返屋企就得！雖然老公大把錢，但冇話唔畀老婆做嘢，完全冇Set底線，只要老婆鍾意拍乜都得，就算着衫打扮都一樣！講到生仔，老婆一句話唔制，老公都冇詐型，仲收養孤兒當自己仔咁湊！明明綠燈轉眼變成紅燈，為乜搞到婚變？原來嫌唔夠激情！話老公係生意人好理性、自己好Emotional嘅溫碧霞，查實時刻需要無止境嘅激情同驚喜，大家長期為工作少見，話題多數都係個仔，搞搞吓猛火都變文火，文火再變死火，激情喺手裏面都化為灰燼！
你可能會話，大佬，都51歲啦，唔係咁狼，仲咁多需索嘛？兩個加埋都過百歲，要激情做乜？15歲拍電影《𡃁妹仔》出道嘅溫碧霞，一直保持「𡃁妹仔」心態，即係無論身心同婚姻，乜都要「活化」！先講佢本人，仍然係25歲嘅甫士、30歲嘅打扮，打吓美容針Keep住靚樣，永遠都只見到佢靚同埋靚，唔會見到素顏爆瘡打晒褶，「跌膊」都跌足25年！當年佢做「海潮」要靚到一個點，走難都要化「行」妝跌住膊，你話劇情離晒罩啫，但依然大把人受，今時今日憑「海潮」喺內地吸金，吸到啲錢好似海潮一樣啪啪聲冚埋嚟，唔使靠老公，都已經係億萬富婆！跌膊真係咁易？唔Keep點跌呀？叫黃夏蕙跌吖！
得閒鴛鴦浴 活化愛情
男人最怕女人係死魚，溫碧霞就係唔想做死魚，要做梗係做飛魚！對老公依然係「停不了的愛」，成日搞好多浪漫心思花臣嘢，肉麻當有趣，將屋企變咗個Resort咁整埋個露天浴池，得閒就好似楊貴妃出浴咁浸吓玫瑰花瓣浴，一係就旅行過二人世界，做咁多嘢，佢當咗激情同浪漫就好似打美容針一樣，間唔中拮吓，拮拮吓又拮番啲愛火花出嚟，令婚姻保鮮，愛情活化，真係好似童話嘅王子同公主乜都唔使做就永遠幸福咩？灰姑娘只係同王子跳咗Part舞，仲要咁啱冇人着得落隻玻璃鞋，先有得上岸，但係慣咗踎喺廚房做阿四，覺得Macaron好味唔過人間美食缽仔糕，同食慣鮑魚嘅王子個Gap咁大，如果唔諗計仔，冇激情同愛情，王子應該都好快再開P！
形容自己係調景嶺灰姑娘嘅溫碧霞，睇住老竇爛賭搞到冇飯開，爭啲連佢都賣埋畀人，所以十幾歲就離家出走。佢深信要靠自己，冇人信得過，尤其係男人。難得大家族出身嘅何祖光唔理閒言閒語，話：「為咗證明我愛你，我哋結婚！」感動到冇法唔着玻璃鞋。時代唔同，以前講離婚係叫做唔見得光，呢代講離婚，係講大家Timing唔啱，不如好心分手一早放開我，溫碧霞同何祖光揀咗重修舊好，就係覺得結婚同做人一樣，唔好忘本：「你是最好的。」
|
鍾意就快D Share啦！
|
|
|
