上月15日，突然爆出有香港女仔準備去日本拍AV，大家第一個反應係……打真軍唔係講玩㗎喎！當時麥紫莉(Chili)嘅製作公司Hotline TV透露，會安排Chili喺8月出發，表明會同日本製作公司一齊合作，安排Chili跟日本著名AV男優南佳也、清水健、中村DAIKI等演出，仲有機會喺日本玩街頭真人騷，瞄準目標即埋牙開戰，講到勁刺激。(相關新聞﹕http://bit.ly/2uP0ikV)但成件事雷聲大，雨點小。過咗一個月，Chili到o依家都未有聲氣幾時出發。《蘋果》根據香港商業登記及公司註冊資料，以「Hotline TV」、「製作公司Hotline TV」、「Hotline TV Production House」及「Hotline TV Limited」均沒有相關登記。佢哋公司亦有個手機app，裡面分6個項目，包括電影公司、演唱會及舞台劇等等，但只有Hot Girl有嘢睇，其他係空嘅，Chili係其中一個Hot Girl，着住件泳衣喺沙灘跑下玩波波，身材蕩漾。一直以嚟，Chili嘅幕後老闆身份都好神秘，只有一名姓陳嘅負責人，但係Chili每次出席活動都未有見過真人。據悉Chili近月經常向身邊友人狂呻，話自己從來冇應承過拍AV，向傳媒聲稱拍AV只係照公司安排，覺得「簽咗約，唔可以唔聽話」，所以乜都乖乖照做。而Chili近日再出活動，亦唔敢再落實講自己幾時出發，成日將個「波」交番畀公司。而認識Chili幕後老闆嘅人，則向本報爆料，話佢曾私下同人講，話拍AV只係權宜之計，或者安排Chili去日本「走一轉」，跟住都可以冇下文。Chili噚日再被追問係咪「吹水」拍AV？佢都有所保留話﹕「其實由day one開始都係跟指引去做，都有人喺fans page或記者朋友問我幾時出發、有劇本未、對手係邊個？我都唔係想扮嘢唔想答，而係公司都仲未答到我，連我自己都未知。」
