侯志強講講吓，話自己講粗口就叻，仲話唔介意教人講粗口。
八卦陣
侯強戴頭盔撐兄弟
不怕神一般的對手，最怕豬一樣嘅隊友。人稱「高佬和」嘅曾樹和同何君堯，之前喺革走戴耀廷吶喊大會高叫「殺無赦」，被全城圍插，連建制派都紛紛與他割席，何慘變過街老鼠。同為新界佬嘅侯志強，就冇咁衰仔玩自保，戴起個頭盔力撐佢兩個。
侯強話大家都有言論自由，每句話都要視乎大家感受，仇人同情人講同一番話，就有唔同感覺，佔中者唔係奸淫擄掠殺父仇人，你殺咗佢要接受法律制裁。佢又幫手解釋話，高佬和同何君堯未必真係想殺人，只係一時氣憤純粹發洩。
不過侯強都醒目，同記者講完又補飛，話其他人勇過佢，自己就唔會講咁激進嘅言論喇。佢仲話自己講粗口就叻，後生仔要講粗口就搵佢，唔介意免費教授，因為自己喺三教九流地方長大，講粗口都大把「技術」，最高境界係講完你都唔知佢鬧緊你。記者心諗呢吓真係高，被人鬧完都唔知有人鬧。
周博賢鬧何君堯過火
聲援一百一十七名入獄或面臨審訊政治犯音樂會，星期日喺中環愛丁堡廣場舉行。雖然天文台懸掛一號風球，時晴時雨，但都無阻熱心人士以行動同歌聲支持一班政治犯。音樂創作人周博賢到場聲援，對於近來社會發生嘅事，佢都睇唔過眼。
好似最近城中熱議人物何君堯，周博賢直斥其非，「我都係讀法律出身，都算係半個行家，佢係以好唔恰當嘅身份去講呢啲說話。佢講到殺人、殺豬殺狗、喺戰爭中殺人，完全係過咗底線。」
提到港獨，佢心知實際上冇乜可能，但認為咩議題都可以討論，就算回歸咗都可以討論，何況佢哋冇犯到法。眼見不公義嘅事愈來愈多，佢形容依家係烏雲蓋頂，希望有朝一日會天朗氣清。
同場仲有去年反釋法遊行被控非法集結嘅林淳軒，對於相繼有戰友入獄，自己同樣面對審訊，佢話雖然做好心理準備，但都會發噩夢，佢會珍惜依家僅有嘅自由，多做抗爭。原來佢都有諗過坐監情況，仲輕鬆咁話：「可能練到六嚿腹肌，講真我話減一百磅都真係得！」
錢志健落場撼葉劉楊哲安
當建制派政黨同政府愈嚟愈緊密合作，加入建制派後嘅出路，已經不限選區議員同立法會議員。好似上個月咁，民建聯同自由黨都有黨員獲委任加入政府。
自由黨嘅陳浩濂鯉躍龍門，由中西區區議員搖身一變，坐上財經事務及庫務局副局長呢個位。其實佢喺六年前區選，已經爆冷贏咗公民黨陳淑莊。前年仲以一千八百幾票，大勝支持佔中「 2047香港監察」嘅陳樹滿，唔知當初選佢嗰一千八百幾名山頂區選民，有冇被陳浩濂背棄嘅感覺？
山頂區議員議席要進行補選，聽講自由黨傾向派出做過政助嘅楊哲安出選；新民黨主席葉劉淑儀，亦自爆有意落場，硬撼自由黨「地盤」。非建制派嘅選情雖然非常之唔樂觀，但據知「 2047香港監察」打算再次派人出選，仲會由召集人錢志健親自落場。聽講佢哋都覺得勝算唔太大，但認為要俾選民有選擇。錢志健就同《壹》仔講點都會落場，仲已經搵咗山頂區選民幫手拉票。
翁靜晶多謝老闆
踢爆假艷尼而街知巷聞嘅翁靜晶，因為要應付定慧寺龐大嘅官司開支，加上又要為定慧寺支付二百幾萬維修斜坡費，連個人退休金同埋兩個女嘅嫁妝都使埋。佢於是決定復出，早兩個月加盟咗張志宇律師行，上星期律師行成立三周年搞 party，一於開支香檳，切燒豬賀一賀佢！
翁靜晶都好識做，當日揸住杯香檳不停話：「多謝老闆！」嘩，乜翁靜晶有老細照顧？原來呢間律師樓當初以人情價，幫翁靜晶打艷尼官司，大家惺惺相惜，翁靜晶幫對方打工，順便幫輕一下定慧寺訴訟費用。
當日好多嘉賓到賀，逼爆律師樓。唔講唔知，原來英皇集團主席楊受成同翁靜晶好老友，人唔到禮都到，楊受成送咗一個大花牌俾世姪女。
撰文：巫不言
news@nextdigital.com.hk
|
鍾意就快D Share啦！
|
|
|