阿蘇同密友金燕玲輪住病，慘！
DJ蘇施黃早幾日喺社交平台指上星期五金燕玲發高燒患上甲型流感，而自己星期一又病埋。阿蘇現身電台接受訪問時表示：「我已經好番啦，嗰條友（金燕玲）就未，燒就去到37.4，退咗好多，但奄奄一息咁囉。」問到阿蘇係咪要好好照顧對方？佢話金燕玲入咗醫院唔使佢照顧，不過最大鑊就係金燕玲咳同頭痛：「禮拜五睇醫生，燒到102度，醫生就驗到有甲型流感。食特敏福，但一路都唔好，禮拜一到我都病，就一齊去睇醫生，去照肺。到禮拜二我好番可以返工，佢仲繼續病，真係要入醫院。」
但阿蘇話今日出咗報告，指金燕玲染上H1N1同埋甲型流感，因為對方好少病，所以唔意識到咁大件事：「我都試過H1N1，今年都死咗二百幾三百人，尋日佢好病軟弱無力，一定要去吊吓藥，攰到冇晒氣力，連床都唔起，所以決定入醫院。」她又指對方昨日口腔開始損，連食至愛嘅腐竹糖水都話唔好味。
問到金燕玲病之前有冇外遊，阿蘇表示對方去了內地拍戲。另外，阿蘇話放工就會去醫院陪金燕玲，病房裏面有隔離，亦有大廳同工人陪住金燕玲。問到擔唔擔心？阿蘇話：「唔擔心，佢不嬲身體都好好，我成日都話啲菌好似上帝咁無處不在。（幸好退到37度。）有時呢啲會突然去到102度，上上落落幾日，希望大家都注意身體。」
來源 source: http://hk.on.cc
|
鍾意就快D Share啦！
|
|
|