「港姐殺手」袁偉豪嘅港姐新歡張寶兒，同港姐舊愛岑杏賢，今日一齊到將軍澳新都城中心，出席《潮食遊踪揭幕禮》。
新歡舊愛同場，寶兒同岑杏賢雖未有不快場面出現，但見到岑杏賢就明顯有點唔自然，而佢哋喺出場前，一齊企埋一邊，仲有講有笑，出場時寶兒仲好有禮貎咁拉一拉岑杏賢嘅手一齊行。上到台，司儀陸浩就問佢哋中秋點樣過？岑杏賢就笑陸浩話佢冇睇佢噚晚嘅直播：「我噚晚同朱千雪一齊開live，之前已同家人慶祝咗中秋。」寶兒就話自己同親戚一齊食飯，一家人開開心心，之後佢哋仲喺台上分享過往嘅難忘中秋。
其間，陸浩就問到佢哋煮嘢食叻唔叻？岑杏贀就話自己煮嘢食唔算叻，但喺英國煮一人份量時就叻啲。而寶兒亦話自己讀書時會煮俾同學食，但就算好叻。之後陸浩再問點keep住好Taste品味？岑杏賢就話：「最緊要心情開朗、樂觀同正能量，好多好味同好品味嘅嘢就會黐埋嚟！」寶兒就覺得品味好個人嘅，自己就有寫嘢嘅習慣，會留意番自己諗法、價值觀，會發掘番自己品味嘅變化。分享完時，岑杏賢就望住寶兒，兩女仲相視而笑，岑杏賢仲好好咁幫寶兒整理頭髮。之後佢哋仲玩遊戲，即場設計T恤。
來源 source: http://hk.apple.nextmedia.com
|
鍾意就快D Share啦！
|
|
|