釋心慧同釋健釗早前被踢爆二人蜜遊夏威夷，釋心慧仲著住比堅尼露股。
中環人語
釋健釗釋心慧財來自有方
冇錯，又係佢哋，釋心慧同釋健釗，佢哋俾人影到喺夏威夷歎世界，釋心慧仲著住比堅尼露屁股曬太陽，佢哋嘅料愈爆愈多，愈揭愈臭。
今次話你知，釋心慧財來自有方，佢同釋健釗係南天竺寺嘅董事，由於南天竺寺屬慈善團體獲稅局豁免交稅，董事係唔可以收取酬金，之但係根據我哋收到嘅絕密文件，釋心慧同寶蓮寺高僧釋智德喺一間叫「梵唄和音有限公司」嘅私人公司擔任董事，一月至三月份收取七萬五千元董事袍金，平均每個月兩萬五千蚊，好過唔少打工仔收入，相當和味。
呢間公司實際業務係咩就唔太清楚，但就肯定同南天竺寺有關，因為公司嘅註冊地址正正就係釋心慧揸 fit嘅南天竺寺。除咗釋心慧，亦有五人收取顧問費，包括寶蓮寺前任住持釋智慧同現任住持淨因。查實成日周圍飛嘅釋心慧生活不知幾咁多姿多采，成日喺 Facebook打卡，去過北京米芝蓮餐廳食嘢，又去過北海道旅行，而家仲揸 Jaguar新車，好多網友都呻入錯行，原來出家可以咁歎。
寶蓮寺資產達十三億元，有名你叫「寺院界富豪」，寶蓮寺喺夏威夷嘅分會都唔差，持有夏威夷銀行等股票，長期投資逾三百多萬元，一五年用八十三萬元買蘋果公司嘅股票，鍾意影相打卡嘅釋心慧，會唔會都係果迷呢？雖然醜聞多籮籮，近日釋心慧同釋健釗仍「拍拖更」出席上海佛教活動，釋心慧刻意站在釋健釗背後，你有你鬧，佢哋照樣笑面迎人。
縱橫遊老闆無覺好瞓
縱橫遊上星期俾黑客 hack咗，二十萬客戶資料被鎖，門市拉閘，用人手白紙黑字接單，與顧客溝通都要逐個打電話，成件事好似返咗去七十年代。
CEO袁振寧嘅身邊人話，呢單嘢搞到老細心情好差，幾日都瞓唔着，諗極都唔明點解會出事。佢哋估計，應該係好熟悉公司運作嘅人做，因為客戶資料已分開放喺超過十個 server，「無理由全部 hack晒。」而且佢哋覺得黑客不可信，好可能俾咗錢都攞唔番啲資料。
縱橫遊老闆袁士強七○年在東洋留學，七九年返港創立公司，專攻日韓。當年佢好搏，個仔袁振寧一歲時已帶埋佢出埠去日本，生意上軌道後移民加拿大。幾年前袁振寧已經接棒，做咗集團 CEO，比老豆仲搏。今次被勒索，袁振寧話絕對唔會俾贖金，寧願重新建立系統。佢都唔係第一次咁勇，一一年日本東北大地震，未夠一個月，佢已親自去仙台送善款。今次輪到公司出事，亦由佢諗辦法收拾殘局。
男人的 birkin
楷女郎梁洛施俾人影到喺餐廳同人激啜，又係時候重溫佢生完 B同小小超溫馨合照。重點喺小小超隻右手度，隱約見到佢戴嘅錶，係 Patek Philippe（百達翡麗）。
呢個牌子好多有錢佬都鍾意收藏，限量版更加係身份象徵。入門款都要幾十萬，由 5711到 Chrono都炒到飛起，其中 Calatrava 5522A定價十七萬元，早排喺大陸炒到五十萬元。好多限量款更加唔使講，上年拍賣全球限量四隻嘅不銹鋼萬年曆計時 Ref.1518，連埋佣金計番港紙要七千八百幾萬，比起預算價高三倍。小小超當日戴嗰隻 PP 3712無咁貴，不過網上見到都賣緊接近六十萬。
Patek Philippe嚟緊又會出新錶，成個中環都等緊，等於女人嘅 birkin咁重要。
王穎妤幫手賣殼？
上星期五晚有間主板市值四億幾嘅冠亞商業（ 104）出通告，大致內容係前一日某位公司董事，收到個獨立第三者嘅電話，約第二朝早傾吓收購佢公司，而呢位董事又真係應約喎。春江鴨於是狂炒冠亞，股價半日升咗兩成三，呢個時候冠亞才主動停牌，強調商討只是非常初步。
有江湖人士就話呢招非常好橋，就算今次賣盤不成，起碼曲線公諸於世，冠亞歡迎各位嚟傾買殼，費用全免，披露易變成了宣傳易。
查實呢間咁奀豬公司亦唔嘢小，請到純官紅顏知己王穎妤做獨立非執董，仲要一做就超過十年，唔知佢會唔會就係嗰位接到神秘電話嘅董事，負責出去傾生意呢又？
題外話，喺冠亞今年嘅年報簡介內，指藍血王小姐係香港執業大律師，但據法律界人士講，其實佢已 debar多時，小宗查過大律師公會名冊，亦唔見佢大名，按理唔可以稱自己為「執業」，情況同何君堯差不多。
沈大師牙骹戰連環輸
近排網上有句好精警潮語：「問君能有幾多愁，沒買騰訊沒買樓。」由此可見冇買呢兩瓣升到嘭嘭聲資產，真係慘到冇朋友，眼淚在心裡流。而呢一刻小宗諗起財經演員沈振盈，事關佢長年睇淡樓市，自己亦身體力行做無殼一族，再加上佢又睇淡騰訊，更公開同公仔箱觀眾 side bet，喺騰訊股價三百三十蚊時輸賭，上落五十蚊定勝負，結果上星期股王衝破三百八十蚊大關，大師即刻俾人翻舊賬要求找數，請對方食飯。
查實沈大師賭性相當強（平時愛過大海及賭馬仔），周不時同人進行牙骹戰。線人報料原來佢幾年前亦同友人 side bet，喺獨立第三方見證下，押注實施咗超過三十四年嘅港元聯繫匯率制度，會喺兩年內取消，仲話到時香港便會大亂，樓市崩盤，銀紙貶值等等（下刪一千字）。友人覺得贏面太高勝之不武，講明就算係上調七點八呢個數，都當大師勝出。
結果兩年過去，聯繫匯率穩如泰山，沈大師輸得無話可說咯，但該名友人無意要佢找數。唔知係咪驚大師輸落好多牙骹戰，約佢食飯要輪到出年乎？
|
鍾意就快D Share啦！
|
|
|