上月廿八日， Baby帶住十個月大的「小海綿」返港，萬眾期待的「小海綿」終於曝光！
娛頭
獨家真面目： Angelababy抱巨 B返港，小海綿似足黃曉明未紅時
黃曉明剛剛度過了四十歲生日，在他生日的凌晨，老婆 Angelababy就上載了一張合照祝賀老公，但係這種大日子依然唔見囝囝「小海綿」的踪影！眨吓眼「小海綿」已經十個月大，不過他的真面目一直保持神秘，愈神秘一班網民愈想見，終於在上月廿六日，本刊獨家捕獲 Baby帶住重磅「小海綿」返港，萬眾期待的「小海綿」真面目終於曝光！肥嘟嘟的「小海綿」，頭髮濃密，皮膚白雪雪，個鷹鼻仔同一對內雙眼皮仲似足爸爸剛出道時的樣子，好得意！
10個月大內雙眼皮
為下一代驗面
眾所周知， Baby出道以來一直飽受「整容」傳聞困擾，為了還自己一個清白，前年 Baby曾到北京整形醫院進行「驗面」，以證實自己五官純天然絕無添加。不過網民依然是咬住唔放，更對「小海綿」的廬山真面目非常好奇， Baby同黃曉明為保護囝囝，一直都非常小心，就算今年四月， Baby在《奔跑吧兄弟》讓「小海綿」破例出鏡，但最多都係露過少少側面，未能夠睇到 Baby個 baby全相。「曉明之前都講過喇， Baby去驗面主要原因係怕影響下一代，唔想小朋友因為呢啲傳聞受到委屈，俾人評頭品足。」 Baby身邊人透露。
渾身是肉
嫁夫隨夫，婚後長居北京的 Baby，最近經常帶住「小海綿」四圍飛，上月尾本刊捕獲 Baby湊住「小海綿」返港。當日 Baby一身 causal wear，戴住 cap帽、囗罩，紥馬尾，黑衫黑褲黑鞋，勁低調兼遮晒樣，盡量無咁易俾人認出，她身邊仲有一名保母幫手湊 B。落機時， Baby堅持親手抱住阿仔，十個月大的「小海綿」睇落分量十足，手仔腳仔肥嘟嘟，塊面又圓碌碌，渾身是肉勁可愛，難怪 Baby前排接受訪問時都講笑話：「他的面已是正方形了。」不過一向骨杉杉的 Baby抱住重量級 BB，完全冇手軟，果然訓練有素！當日「小海綿」戴住蜜蜂圖案口水肩，食住奶嘴，全程眼仔碌碌四圍望，仲成日笑，人仔細細，頭髮同眉毛都勁濃密，遺傳了爸爸的鷹鼻，仲有一對佛耳，好有福氣。最得意梗係一對內雙眼皮，似足黃曉明剛剛出道時樣子，好有父子相，絕對唔似網民惡搞造成的合成照模樣。
帽仔遮面
單拖湊 B， Baby做足準備，一共拖了四個大喼、兩個行李袋，仲要勞動機場工作人員幫手送行李上車，一出閘 Baby吩咐保母幫「小海綿」準備帽仔，自己一手抱 B，一手用帽仔遮住阿仔塊面，慎防乖仔曝光，見閘口人多， Baby加快腳步行去停車場，見司機未到， Baby惟有折返，盡量避開人群。等車期間，「小海綿」一直俾媽咪用手遮住塊面，他開始唔耐煩四圍擰， Baby見有陌生人行過，再用力㩒住阿仔個頭，點知阿仔反抗，之後保母又想幫「小海綿」戴番帽仔，「小海綿」繼續掙扎，仲扭計爆喊。角力完一輪，司機終於嚟到， Baby將「小海綿」攬到實一實，箭步衝上車。
奶奶催生
一五年黃曉明同 Angelababy在上海豪花半億人仔搞世紀童話式婚禮，當時曉明媽透過傳媒講到明心急抱孫，身為家中獨子的黃曉明，肩負傳宗接代重任，好彩他們兩公婆不負厚望話咁快交到功課。不過距離奶奶想抱半打孫的目標仲有一段距離，睇嚟 Baby要加把勁！「 Baby同曉明媽感情好好，結婚之後一直都一齊住。曉明又出名錫媽咪，所以曉明媽鍾意湊孫， Baby都有晒心理準備，生多幾個都無問題，反正今年先廿八歲，最緊要老人家開心。」 Baby身邊人說。
減產湊 B
近年憑住綜藝節目《奔跑吧》， Baby喺內地火速走紅，賺到盆滿鉢滿，仲密密買「磚頭」。今年初 Baby以媽咪嘅名義用一億二千萬掃入西半山豪宅天匯高層單位，加埋手上兩個貝沙灣單位，年紀輕輕已經坐擁近一億六千萬物業，絕對是小富婆。不過為咗「小海綿」， Baby決定減產，今年只會拍一部戲。「小海綿開始大，有表情有反應， Baby唔捨得成日放低佢去開工，有時一飛就飛幾日，所以而家盡量都帶埋佢去，奶奶間唔中都會跟埋去幫手凑 BB。」
撰文、攝影：娛樂組
|
鍾意就快D Share啦！
|
|
|