豪語錄
Let it Go!樂基兒
樂基兒從來是這麼近那麼遠。一個原本只屬於時裝、名人版的名字，因為成為黎明的另一半，在娛樂版出現的頻密度，比起天王公司旗下的藝人還要多。婚姻四年玩完，樂基兒沒有一哭二鬧，純粹撇脫離開，重新開始。五年後今日，剛剛開始第二段婚姻的樂基兒接受訪問。比起新電影中揸槍做 SDU，大家更有興趣當日同黎明離婚是誰先提出！
空中飛人
八月再做人妻的樂基兒，跟從事有機食物生意的 Ian Chu在美國 LA拉埋天窗。新婚三個月不夠便埋位開工， Gaile分外神采飛揚，面對場地狹小，人又多，心情半點不受影響。習慣新的稱呼？「都慣！因為其實都好多人不停叫我朱太！」 Gaile甜絲絲說。 Gaile說再婚不代表失去自我，生活一切如常，繼續半年時間香港，三個月美國，三個月峇里或其他地方。聚少離多，不怕影響感情嗎？ Gaile搖搖頭堅定說：「 No！每個人嘅關係，要嘅嘢唔一樣，在我來說，一段關係最重要是大家各自工作，可以坐埋一齊大家交換意見，溝通是好重要。再講，拍拖時先生已知道我個時間表，佢自己都成日飛，好忙，但係佢會俾 surprise我，試過飛去我做嘢嘅地方探我，係好簡單嘅嘢，我已經好開心。」
愛簡單
跟黎明的一段情，至今依然令人津津樂道。四年婚姻於一二年結束，樂基兒沒有公開說過對方半句，直接問她對前度男友怨恨，她坦白說：「 I don't want to talk about that!」但拐個彎問她是否一個愛恨分明的人，她又不介意將心中所想公諸同好。「我諗自己係一個樂天性格嘅人，覺得愛與恨唔需要天天去定義，其實愛好簡單，唔需要太複雜，等如你好多嘢想做，但唔代表好大壓力，應該享受過程。」用五年時間收拾心情再披嫁衣，樂基兒除了生性樂天，意想不到是她比想像中硬淨。「我唔係好怕受傷害，我覺得人係要經過失敗，同埋受傷；如果你成日怕受傷，呢個係一件好錯嘅事，你會失去好多機會，喺失敗中學習係人都會經過， no big deal!即係，我今日煮一味餸好食，聽日煮一味餸係失敗嘅，咁係咪以後唔再去煮嘢食呢？你應該 find out點解唔好食，聽日再煮會唔會再好食呢！」
開心
樂基兒經常提着煮餸，全因有新搞作，計劃拍片出烹飪書，純粹自娛，沒有其他。實質是長年外地頻撲工作換來的一技之長。「其實煮餸好多年，因為好年輕就做 model，之前喺馬來西亞住六個月，喺日本住六個月，無朋友無屋企人，住服務式住宅，都唔可以日日出街食飯，好多時間要自己煮，因為收入唔多，所以去 grocery store（雜貨店）都會好開心。 So far，都係想做一個實驗，做一啲電子烹飪書、拍片同網頁，我係無諗住收錢，只係想分享自己少少嘢俾大家！」訪問在「香港亞洲電影節」開幕禮前進行，電影的監製早在現場打點一切。樂基兒影相時大家閒聊起來，對方指她首部擔正的電影不單有發揮，而她亦比其他新人交出有水準的表現。屈指一算，第一部電影已經是十六年前，男主角之一的黃浩然已轉戰電視，陳文媛亦已嫁人。可能廣東話不太靈光，樂基兒這些年拍過的電影三隻手指數得晒，最新一部是孖住周秀娜、鄧麗欣合演的《女士復仇》，從來人靚真的有着數，只是識講唔識睇的 Gaile有監製、幕後陪讀陪記劇本，當然大部分都是男性！戲中飾演飛虎隊，第一日開工是揸刀又揸槍，動作連場，但 Gaile竟然無半點傷，神奇。「真係無，可能導演同劇組全部都愛錫我，反而我唔識用力會整傷人哋。」 Gaile對上一套電影，是十三年前的《甜絲絲》，加上中文是有限公司，周不時有蝦碌出現。「佢要我講中文時，我講咗英文，突然導演要我講成段英文，唔知點解我又講咗中文！」豈不是 NG不斷？「都有嘅，不過而家唔係菲林，係數碼，可以不停 NG。」
係唔同啲
上個星期，無意間睇到無綫台慶劇《誇世代》，夾啱時間飾演千金小姐的李佳芯出場，滿口 JM式的英文，真心好好笑！聽完樂基兒訪問，才發覺 Gaile都係 JM式英文：「你自己嘅 live， but大家 live together""」聽落唔突兀，又知道當事人想講咩，唔通 JM當年有向前老闆娘偷師？
撰文：陳琳 攝影：黃志明
|
鍾意就快D Share啦！
|
|
|